Tala otooto o Fa’amasinoga

TALOFA FAIMOA

 

O le ali’i mai le au lakapi a Fagatogo lea na tuuaia i lona fa’ao’olima  i se ali’i lakapi mai le kalapu a Avele i le tausaga na te’a nei, ua ia ta’utino i le faamasinoga maualuga e faamaonia tuuaiga faasaga ia te ia.

 

O Talofa Faimoa, 20 tausaga le matua lona soifua, na ulua’i tuuaia e le malo i le moliaga mamafa o le faaoolima i le tulaga lua, ae i lalo o se maliliega sa ia sainia ma le malo ma talia e le faamasinoga maualuga i le aso Faraile na te’a nei, na tali ioe ai Faimoa i le moliaga ua toe suia e le malo, le solitulafono mama o le faaoolima i le tulaga tolu.

 

I le tali ioe ai o Faimoa, sa ia tautino ai e faapea, i se taimi o le aso 26 Oketopa 2013 i le taimi o se taaloga lakapi sa faia, sa ia tu’iina ai foliga o le ali’i na aafia ma o o ai tiga i lona tino.

 

O le mataupu e pei ona molia ai Faimoa, na tula’i mai i se taaloga lakapi i le va o au a Fagatogo lea e taalo ai Faimoa ma le kalapu lakapi a Avele, ina ua lata ina fa’ai’u le taamilosaga ta’ito’a 15 a le Iuni Lakapi a Amerika Samoa i le tausaga na te’a nei.

 

O lo o tumau pea poloaiga o lo o tatala ai Faimoa i tua, e faatali ai le aso 7 Fepuari e lau ai lana faasalaga.

 

ETEVISE TOMASI

 

Ua poloaina e le faamasinoga maualuga le malo ina ia latou saili se nofoaga lelei e nonofo ai  Etevise Tomasi ma lana pepe faatoa fanau, ina ia faigofie ai e le ua molia ona fafaga lana tama a’o fa’agasolo ai taualumaga o lona faamasinoga.

 

O le vaiaso na te’a nei na faatulaga e lau ai le faasalaga a Tomasi, ina ua ta’usala o ia i le moliaga mamafa o le faaoolima i le tulaga lua, peitai ina ua valaau lana mataupu, na faailoa e lana loia fautua ia Joel Shiver i luma o le faamasinoga, o Tomasi o lo o i ai i le falema’i i Fagaalu, ona o le vaiaso na te’a nei na fanau ai e ia se pepe fou.

 

E taofia Tomasi i le toese i Tafuna i le masina o Iulai 2013 o lo o mamafa o ia i lana tama lona fa.

 

Ina ua maea ona faailoa e le loia a Tomasi le tulaga o lo o i ai le ua molia, sa ia talosagaina ai loa le faamasinoga mo sana poloaiga faapitoa e tatala ai i tua Tomasi i lona aiga se’i tausi lana pepe ma fafaga, ona toe valaau ai loa lea o lana mataupu i totonu o le isi 60 aso, peitai o lea talosaga na tete’e i ai le loia a le malo ia Stiffany Oldfield.

 

Na finau Oldfield e faapea, e le tatau ona tatalaina Etevise i tua i lona aiga, ona e fai lava si matuia o le mataupu o lo o molia ai o ia, e le gata fo’i i lea, ina ne’i toe maua ai e le ua molia le avanoa e inu ai ma toe tula’i mai ai se isi faalavelave i se taimi o i luma.

 

Na faailoa e Oldfield i le faamasinoga e faapea, o le ua molia, o se tagata e faatupu vevesi pe a oo i le taimi e ‘ona ai, e le i popole fo’i o ia i lana fanau e to’atolu i le taimi na alu ai e tafao ma inu i le Bowling Alley i le taimi na tula’i mai ai le faalavelave lea ua molia ai o ia, ae sa ia tia’i lava lana fanau laiti e to’atolu i le fale, lea e aofia ai ma lana tama laititi e tasi le tausaga.

 

I le faaiuga o faafinauga a loia, na teena ai e le faamasinoga le talosaga a Shiver ina ia tatala Tomasi i tua e fafaga lana pepe, ae ua poloaina le itu a le malo ina ia latou sailia se nofoaga lelei e tausi ma tuu i ai Tomasi ma lana pepe, ina ia mafai ai ona fafaga seia malosi, ona faatoa toe valaau lea o lana mataupu.

 

Na faailoa e Michael Kruse i le loia a le malo, e le saogalemu le toese i Tafuna mo le tuu i ai o Tomasi ma lana pepe i le taimi nei. O le masina o Mati lea ua faamoemoe e toe fofogaina ai lenei mataupu.

 

FINAUGA AKERIPA

 

O le alii ave pasi lea na se’i lona laisene mo le 6 masina i le masina o Aokuso 2013, ina ua tausala o ia i le moliaga o le ave ta’avale ‘ona, ua molia nei o ia i le solitulafono mamafa o le ave ta’avale a’o se’i lona laisene, ina ua maua e leoleo o lo o ia faafoeina se taavale.

 

O se faalavelave tau taavale na tula’i mai i Aua i le vaiaso na te’a nei, ina ua so’a e se pikiapu na faafoe e Finauga Akeripa se isi pikiapu sa paka i luma o se faleoloa, na mafua ai loa ona tula’i mai lenei mataupu lea ua molia ai le ua molia.

 

A’o faagasolo ai taualumaga o lenei mataupu, ua poloaina e le faamasinoga le ua molia e aua nei ona toe aveina se taavale.

Comment Here