TA’USALA LOIA A LE FONO I LE AVE TA’AVALE ‘ONA

E $150 le salatupe lea ua faasala ai e le faamasinoga le loia a le Fono Faitulafono ia Henry Kappel, ina ua ta’usala o ia e le faamasinoga faaitumalo i le taeao ananafi i le moliaga o le ave ta’avale ‘ona.

O isi tuutuuga o le nofovaavaaia a Kappel mai le faamasinoga mo le umi e 6 masina, e aofia ai le se’i o lana laisene ave taavale mo le umi e 6 masina, faasa ona ia toe tagofia le ava malosi, faasa fo’i ona ia toe aveina se taavale i le umi lea ua se’i ai lana laisene.

Na tuuaia e le malo ia Kappel i le moliaga o le ave ta’avale ‘ona atoa ai ma isi moliaga tau taavale afi, ona o le faalavelave lea na tulai mai i le aso 18 Oketopa, 2013 i Pago Pago, ina ua tifa i tua lana taavale ma so’a se pa i tafatafa o le auala.

Ae i se maliliega na sainia e Kappel ma le malo ananafi, sa ia tali ai e le tete’e o ia i tuuaiga a le malo, ae solofua ai isi moliaga sa totoe ai i le pepa o tagi.

Na toe faamamafa e le alii faamasino o John L. Ward II ia Kappel ananafi, le le tatau lea ona ia toe aveina se taavale ao se’i ai lona laisene, ina ne’i molia o ia e le malo i le moliaga mamafa o le ave taavale a’o se’i lona laisene, pe afai ae maua o ia o ia faafoeina se taavale.

ELDEN SIOKA

O le ali’i lea o lo o tuuaia i lona ulufale faamalosi i totonu o le fale a se aiga i Vaitogi ona taumafai lea e tagofia le itutinosa o se tamaitai o lo o moe i totonu o le fale, ua molia nei e le malo i moliaga mamafa e aofia ai le talepe fale i le tulaga muamua, fai o amioga faasotoma i se tamaitai, tagofia o itutinosa o se tamaitai, faapea ai ma faia o uiga mataga i se tamaitai e le o faaipoipo i ai.

O le vaiaso nei na tulai ai le alii o Elden Sioka i luma o le faamasinoga faaitumalo, ma ua toe tolopo lana mataupu e toe fofogaina i le vaiaso fou.

I faamaumauga a le faamasinoga o lo o taua ai e faapea, o le mataupu lenei na tulai mai i le masina o Tesema na te’a nei i Vaitogi, ina ua maua e le aiga le ua molia i totonu o le latou fale i le leva o le po, ma faafesootai ai loa leoleo mo se fesoasoani.

Na taua e le tamaitai na aafia i leoleo e faapea, na te’i a’o moe ina ua ia faalogoina se tagata o tago atu i lona itutinosa, o lea na ala ai i luga ma ia vaaia le ua molia i ona tafatafa, ona ee lea mo se fesoasoani, ae na te’i ina ua faatoese atu le ua molia ia te ia i le taimi lava lea e tusa ai o lana mea sese ua fai, ona alu ese loa lea mai totonu o lona potu.

Na maua atu e le tausoga o le tamaitai na aafia le ua molia ona ia fasi lea e ala i lona tu’iina o ona foliga, peitai na maua le avanoa o Sioka e sola ese ai ma alu i le latou fale.

Na taunuu leoleo i le fale o le tamaitai na aafia ma faamatala i ai le mea ua tupu, ona agai atu loa lea o leoleo i le fale o le ua molia ma latou pu’e faapagota mai o ia.

Na taua e le ua molia i leoleo e faapea, na avea le ova o lona ‘ona ma itu sa ia manatu ai e fia asiasi i le potu moe o le tamaitai na aafia, ma avea ai ma itu na tula’i mai ai le faalavelave e pei ona molia ai o ia.

E $50,000 le vaega tupe lea ua faatulaga e le faamasinoga e totogi ona faatoa mafai lea ona tatala le ua molia i tua, e faatali ai taualumaga o lana mataupu lea ua faagasolo i luma o le faamasinoga i le taimi nei.