Tala otooto o Fa’amasinoga

LIKI KIRISIMASI

 

O le aso Tofi o le vaiaso fou lea ua faatulaga e fofogaina ai i luma o le faamasinoga maualuga le maliliega ua sainia e le malo ma le seila o le Lady Naomi, lea o lo o tuuaia i lona aumaia faanana o mariuana mai Samoa ma tuu atu i se alii e faigaluega i le kamupani i’a o le StarKisti Samoa.

 

O le taeao ananafi na faatulaga e faia ai le ulua’i iloiloga o le mataupu a Liki Kirisimasi i luma o le faamasinoga, ae ina ua valaau le mataupu, na faailoa e le loia a Kirisimasi o Joel Shiver i le faamasinoga, ua mae’a ona sainia e le ua molia ma le malo se maliliega, ma e manaomia se taimi la te talatalanoa ma faasoa ai e faatau i le maliliega.

 

Ina ua valaau mai e le Failautusi o le Faamasinoga le igoa o Kirisimasi, na faateia ai ali’i faamasino ina ua savali atu le ua molia ma tootuli i luma o ali’i fa’amasinoga, ona faatonu lea e le alii faamasino sili ia Michael Kruse le Masela o le faamasinoga, e alu atu e faatu i luga Kirisimasi e le o se falesa lea e tootuli ai o le potu faamasino.

 

O lo o taofia pea i le toese le ua molia e faatali ai le aso Tofi o le vaiaso fou lea ua faatulaga e toe tulai ai i luma o le faamasinoga maualuga.

 

ASENATI MALAE

 

O le tina mai Manu’a lea o lo o tuuaia i lona taumafai lea e faalavelave i molimau a le malo, ua ia talosaga i le fa’amasinoga maualuga e faatulaga loa se aso e faia ai lana faamasinoga autu.

 

O Asenati Malae, (o le to’alua lea o le alii o Hanipale Malae lea o lo o molia i lona faia o uiga mataga i ni tama’ita’i se to’atolu sa nonofo i lo la aiga ma lona to’alua), o lo o tuuaia e le malo faatasi ma lona toalua o Hanipale faapea ai ma le isi tamaitai sa aafia i le mataupu e pei ona ulua’i tuuaia ai e le malo Hanipale, o ia lea o Faasoosoo Sosaiete.

 

O Asenati ma lona toalua o Hanipale o lo o tuuaia i moliaga o le faalavelave i molimau a le malo, atoa ai ma le taumafai e ufiufi se solitulafono, a’o Sosaiete o lo o tuuaia i moliaga o lona faalavelave i molimau a le malo, atoa ai ma lona faaleagaina o mea molimau a le malo.

 

O ananafi na faatulaga e faia ai le ulua’i iloiloga a Asenati i luma o le faamasinoga maualuga, peita’i na faailoa e lana loia fautua ia Joel Shiver le mana’o o Asenati e faatulaga loa se aso e faia ai lana faamasinoga autu.

 

O le aso 5 Ianuari 2015 lea ua faatulaga e faia ai le faamasinoga autu a Asenati, ae afai e avanoa le aso 2 Iuni 2014, ona faataunuu ai loa lea o lana faamasinoga, ma o lo o tumau pea poloaiga o lo o tatala ai Asenati i tua e faatali ai le aso lea ua faatulaga e toe valaau ai lana mataupu.

 

O Asenati o lo o tuuaia i lona totogiina o le pasese e malaga mai ai le tina o Sosaiete mai Savaii i Amerika Samoa nei, ona alu lea ua ave i ai pusa moa ma le tupe mo Sosaiete ma lona tina.

 

O Sosaiete e to’atolu i ai tamaitai o lo o tuuaia e le malo ia Hanipale sa ia faia i ai uiga mataga, e ala i le faiaiga faamalosi atoa ai ma le faia ai o uiga faasotoma.

 

LAFAELE TAUILIILI

 

O le alii lea o lo o tuuaia i lona faapapa o se fana, sosoo ai ma lona faaoolima i se ta’ita’i leoleo i le Ofisa o Leoleo i Leone, ua ia teena tuuaiga faasaga ia te ia ina ua tula’i i luma o le fa’amasinoga maualuga i le aso ananafi.

 

I le teena ai e Lafaele Tauiliili o tuuaiga faasaga ia te ia, ua faatulaga ai loa lana ulua’i iloiloga e faia lea i le aso 20 Mati 2014.

 

O tuuaiga faasaga ia Tauiliili na afua mai i le faalavelave lea na tula’i mai i le vaiaso na te’a nei, ina ua vili e se fafine leoleo mo se fesoasoani, ina ua alu atu le ua molia ma faalala le fana i foliga o lana tama, ina ua mae’a ona ia faapapa le fana aga’i i luga.

 

Na agai atu leoleo ma taofia mai le ua molia i le ofisa i Leone mo suesuega, peitai sa tete’e Tauiliili na te le i umiaina se fana, na te le i faapaina fo’i se fana, o ia sa faapa lana fagaofe.

 

Ae ina ua aga’i atu leoleo i lona aiga, na tuu i ai e lona toalua le fanau, le ituaiga o le ‘12 gauge’ ma le faaupuga, o le fana lea sa faaaoga e le ua molia. A’o taofia ai Tauiliili i le ofisa o leoleo e faatali ai suesuega o lo o faagasolo, o iina na tula’i mai ai loa le faalavelave i lona faaoolima i le ta’ita’i leoleo, ina ua maua atu e le ta’ita’i leoleo le ua molia ua taumafai e oso i fafo mai le faamalama o le ofisa, ina ua mae’a ona ia sasae le screen wire.

 

Ae ina ua fai atu i ai le ta’ita’i leoleo e soia, na oso atu le ua molia ma sua le ta’ita’i leoleo i lalo ma ia faaoolima ai loa ia te ia.

 

O lo o taofia pea le ua molia i le toese i Tafuna ina ua le mafai ona ia totogi le $100,000 na faatulaga e tatala ai o ia i tua.

Comment Here