Ads by Google Ads by Google

Tala otooto o Fa’amasinoga

FA’AGASOLO SU’ESU’EGA FAASAGA I SE ALII LEOLEO

 

Ua faamaonia mai e le Komesina le tumau o le Matagaluega o Leoleo ia Leseiau Laumoli, le faia o se suesuega faapitoa faasaga i le alii leoleo o Vaughn Sagapolutele, ona o se faalavelave na tulai mai i le po o le Aso Faraile na te’a nei, lea o lo o tuuaia ai o ia i lona alu i le fale o lona to’alua muamua ma faia ai ni uiga le talafeagai a’o ia laei i toniga a leoleo.

 

I se tagi na faaulu e le toalua muamua a le alii leoleo i le Ofisa o Leoleo i Fagatogo, o lo o taua ai e le tina le faateia o ia ina ua alu atu le taavale a leoleo pe tusa o le 12:15 i le vaveao o le Aso Faraile na te’a nei, o lo o o atu ai Sagapolutele ma isi alii leoleo, o lo o ofu atu a laua toniga leoleo.

 

O se mataupu lava i le va o le alii leoleo ma le molimau na mafua ai ona tulai mai lea faalavelave, ma taua ai le lafo e le alii leoleo o ni upu masoa i le molimau, ma avea ai ma itu na fefe ai le molimau i lona saogalemu atoa ai ma le saogalemu o si ana fanau e to’alua o lo o momoe i totonu o le fale i le po lea.

 

Na taua e le tina i lana faamatalaga i leoleo e faapea, sa ia talosagaina le Taitai Uati i le Ofisa o Leoleo i le po lea ina ia fautua ia Sagapolutele e tusa ai o lana fuafuaga e alu atu i lona fale, peitai na faateia o ia ina ua oo i le vaveao o le po lava lea ae alu atu le taavale leoleo o lo o alu atu ai Sagapolutele.

 

IOE SIAULAIGA SA IA UMIA FAASOLITULAFONO MARIUANA

 

Ua tautino le alii talavou o Reupena Siaulaiga i luma o le faamasinoga maualuga, e moni tuuaiga faasaga ia te ia i lona umia faasolitulafono lea o ni vaega o le laau faasaina o le mariuana.

 

I le tali ioe ai o Siaulaiga i le solitulafono e pei ona ta’usala ai o ia e le faamasinoga i lalo o se malieliga sa latou sainia ma le malo, sa ia tautino ai e faapea, i se taimi o le aso o le Tausaga Fou o le tausaga na te’a nei i Pava’ia’i, sa ia umia faasolitulafono ai ni sikaleti mariuana se 4.

 

Na taua e Siaulaiga e faapea, o se latou inuga sa faia i tafatafa o le faleoloa o le MJ Stores ma ni isi o alii laiti, na faafuase’i ai ona o atu leoleo ma maua atu i latou ma ana uo o lo o latou inupia i tafatafa o le faleoloa.

 

I faamaumauga a le faamasinoga o lo o taua ai e faapea, ao fesiligia e leoleo i latou nei i le mafuaaga ua inupia ai i tafatafa o le faleoloa, na vaaia e leoleo le alii o Siaulaiga ua tia’i ese i le togavao se pepa sa i totonu o le taga o lona ofu.

 

Na saili e leoleo le pepa ma maua, ma iloa ai e fa sikaleti mariuana o lo o i totonu o le pepa, ina ua fesiligia le ua molia e tusa ai o mariuana, sa ia faailoa i ai e faapea, o mariuana na fai meaalofa atu ai lana uo ia te ia ao le’i toe fo’i i Samoa.

 

O lo o taofia pea Siaulaiga i le toese i Tafuna e faatali ai le aso lea ua faatulaga e lau ai lona faasalaga.

 

IOE SE ALII NA IA SASAINA LONA TO’ALUA I LE UAEA O LE ILI

 

O le alii lea na tuuaia e le malo i lona sasaina lea o lona toalua i le uaea o le ili (electric fan), ua ia ta’utino i luma o le faamasinoga maualuga i le vaiaso nei, e moni tuuaiga faasaga ia te ia.

 

O le a le mafai ona faalauiloa le suafa o le ua molia, ona o puipuiga i lalo o le tulafono i mataupu e tula’i mai i lotoifale o aiga, ae o le alii o lo o molia i lenei mataupu, na ulua’i tuuaia e le malo i le moliaga mamafa o le faaoolima i le tulaga lua, ae o le maliliega lea na sainia e le ua molia ma le malo ma ua talia foi e le faamasinoga, ua ia tali ioe ai i le moliaga lea ua toe suia e le malo, le solitulafono mama o le faaoolima i le tulaga tolu.

 

I le tali ioe ai o le ua molia i le solitulafono e pei ona tausala ai o ia, sa ia tautino ai i luma o le faamasinoga e faapea, i se taimi o le aso 17 Me 2010, sa tulai mai ai se feeseeseaiga i le va o ia ma lona to’alua, ma faia ai loa le la tuliga ma lona to’alua ma oo atu ai i tai i le sami.

 

O se taimi o le aso lava lea ina ua toe fo’i atu lona to’alua i le fale, sa ia faaaogaina ai loa le uaea o le ili e sasa ai o ia, ma leaga ai ona tauau, o ona vae ma lima, peitai na mafai ona sola ese le ua molia ina ua oso i le faamalama o le latou fale ma alu ai loa i le atoa i lona aunty mo se lavea’i.

 

Ua malamalama le ua molia, e le mafai ona toe suia lana tali ioe ua tuuina atu i le faamasinoga, pe afai e tuuina mai se faaiuga a le faamasinoga ae le tau ai lona loto.

 

O le tamaitai loia ia Leslie Cardin o lo o tulai mo le ua molia, ae o le tamaitai ia Kimberly Hyde o lo o tula’i mo le itu a le malo.

 

FAAI’U FAAMASINOGA VEVESI NA MAFUA MAI I SE FANUA

 

O le vevesi lea na tulai mai i Nuuuli i le faaiuga o le vaiaso na te’a nei i le fanua o le aiga o Fanene, na faai’u i le faamasinoga ina ua taofia e leoleo se auuso to’alua ma tuuaia ai e le malo i le moliaga o le faatupu vevesi i nofoaga faitele ma le faaoolima i le tulaga tolu.

 

O le amataga o le vaiaso nei na tutulai ai i laua ua molia i luma o le faamasinoga faaitumalo mo le taimi muamua, ma ua toe tolopo le la mataupu e toe fofogaina i le faaiuga o le vaiaso nei ma le faamoemoe, e tatau ona oo atu ai i le aso lea ua maea ona faila e le malo moliaga faaopoopo faasaga i alii e toalua ua molia, o Jerry ma Pisa Schwenke.

 

I faamaumauga a le faamasinoga o lo o taua ai e faapea, o le vevesi na mafua mai ina ua tau saili poo fea tonu o le fanua e sasa’a ai le uta palapala na faatau atu e le alii na aafia i lenei mataupu.

 

Na faailoa e ni molimau i leoleo e faapea, ina ua alu atu le loli ma le uta palapala, sa le’i mana’o Jerry e sasa’a le uta i luga o le fanua. Na taua foi e ni molimau le faafefe e Jerry o le ave loli na alu atu ma le uta.

 

E lei umi ae vaaia loa Pisa ua savali agai atu i le alii na faatauina mai le uta palapala ma ia tatu’iina loa ona foliga ma manu’a ai. O se fafine na oso atu ma taumafai e vaovao le vevesi, ae manu’a tigaina ai ma matapogia ina ua togi e Jerry lona ulu i le ma’a, e pei ona taua i faamaumauga a le faamasinoga.

 

O le alii leoleo ia Talia Seloti na gafa ma le suesueina o lenei mataupu, ma o lo o faaauau pea suesuega e tusa ai o le faalavelave na tulai mai.

 

Ua poloaina e le faamasinoga i laua ua molia ina ia tausi le filemu i totonu o le nuu ma le aiga, ma ia aua nei o la toe taumafai e faafesootai i latou na aafia i lenei mataupu.

 

TETE’E VILIAMI LOLOHEA I TUUAIGA A LE MALO

 

Ua teena e le alii o Viliami Lolohea tuuaiga a le malo faasaga ia te ia, ona o le faalavelave lea na ia faamalosia ai se tamaitai e 17 tausaga le matua i se togavao i le lua vaiaso talu ai.

 

O lo o tuuaia e le malo Lolohea i le moliaga i le faiaiga ma se teineititi e laititi i lalo o le tulafono, tagofia o itutinosa o se tamaitai e le faaipoipo i ai, faaoolima mataga atoa ai ma le faia o gaioiga e aafia ai le saogalemu o fanau laiti.

 

I le teena ai e Lolohea o moliaga faasaga ia te ia, ua faatulaga ai loa e le faamasinoga lana ulua’i iloiloga i le masina fou.