WAYNE MAGEO

O se alii mai Pago Pago e to’afa i ai alii na aafia i se vevesi na tulai mai i le po o le tausaga fou, i luma o le fale faatali pasi lea e faafesaga’i ma le fale kalapu a le Evalani i Pago Pago, ua molia nei e le malo i le moliaga mama o le faatupu vevesi i nofoaga faitele.

O le vaiaso na tea nei na tulai ai Wayne Mageo i luma o le faamasinoga faaitumalo, ma ia teena ai tuuaiga faasaga ia te ia.

I lona teena ai o tuuaiga faasaga ia te ia, ua toe faatulaga ai loa le isi ana iloiloga i le faaiuga o le masina nei, ma ua toe tatala o ia i lalo o poloaiga a le faamasinoga e ao ona usita’i i ai.

I faamaumauga a le faamasinoga o lo o taua ai e faapea, pe tusa o le itula e 3:21 i le vaveao o le aso 1 Ianuari 2014 i Pago Pago, na logo ai e ni molimau le ofisa o leoleo i se misa o lo o faia i le fale faatali pasi o lo o faafesaga’i ma le fale kalapu o le Evelani i Pago Pago.

E le i umi se taimi ae taunuu loa leoleo i le nofoaga na tulai mai ai le faalavelave, ma taumafai loa e faato’a filemu ni ali’i o lo o vevesi, peitai na faafuase’i ona oso atu Mageo ma toe tu’i foliga o le isi alii sa aofia i le vevesi, ma faasaga atu ai loa leoleo ma loka lima o Mageo ae ave i totonu o le taavale.

A’o taumafai leoleo e taofia alii uma e toafa na aafia i lenei vevesi, sa faalogoina le malosi o le nanamu pia o lo o sau mai o latou tino.

Ua poloaina e le faamasinoga Mageo ina ia aua nei ona toe tagofia le ava malosi, ma aua foi nei toe taumafai e faafesootai alii sa latou vevesi i le vaveao o le tausaga fou.

LOKENI FETUAO

O le alii lea na sei e le faamasinoga faaitumalo lana laisene mo le 6 masina i le masina o Setema na te’a nei, ina ua ta’usala o ia i le moliaga o le ave taavale ‘ona, ua molia nei i le moliaga o le ave taavale a’o se’i lona laisene, ina ua toe maua o ia e leoleo o lo o ia faafoeina se taavale i le aso o le kerisimasi na tea nei.

I faamaumauga a le faamasinoga o lo o taua ai e faapea, na avea le le usita’i o le alii o Lokeni Fetuao i faailoilo o le alatele i le aso tonu o le kerisimasi na te’a nei i Tafuna ma itu na taofia ai e leoleo lana taavale, ae maua ane ai o lo o se’i e le faamasinoga lona laisene ave taavale mo le 6 masina.

O le vaiaso na tea nei na faila ai e le malo le moliaga mamafa o le ave taavale a’o se’i laisene faasaga ia Fetuao, ma ua faamoemoe o le faaiuga o le masina nei e toe valaau ai lana mataupu i luma o le faaasinoga faaitumalo.

A’o faagasolo ai taualumaga o lana mataupu, ua fautuaina o ia e le faamasinoga e aua nei ona toe ave ina se taavale i soo se taimi, aua fo’i ne’i ona toe soliina se isi tulafono a le malo.

LAGOLAGO SASAGI

O le alii lea na sola i le taavale a lona uso i le po o le tausaga fou na te’a nei ina ua ova le ‘ona, ua molia nei e le malo i le faatupu vevesi i nofoaga faitele, ma ua poloaina o ia e le faamasinoga e aua nei ona toe tagofia le ava malosi ao faagasolo ai taualumaga o lana mataupu i luma o le faamasinoga faaitumalo i le taimi nei.

Na teena e le alii o Lagolago Sasagi tuuaiga faasaga ia te ia ina ua tulai i luma o le faamasinoga faaitumalo i le vaiaso na tea nei.

I faamaumauga a le faamasinoga o lo o taua ai e faapea, o le mataupu lenei na tofu atu i le ofisa o leoleo i Tafuna, ina ua logo e le uso o le alii ua molia leoleo mo se fesoasoani, ina ua sola le ua molia i lana taavale ma tafao solo ai a’o ‘ona.

Na fiu leoleo ma le alii e ana le taavale e taamilo solo i fale kalapu e le maua i ai le taavale, ae ina ua oo atu i luma o se faleoloa e tatala mo le 24 itula i Iliili, sa vaaia ai e le alii ana le taavale lana taavale o lo o paka mai ai.

Ina ua iloa e Sasagi ua o atu leoleo, sa sola i tua o le faleoloa ma le ki o le taavale ma lafi ai, peitai na mafai ona maua e leoleo o ia ma auina atu loa i le ofisa i Tafuna mo suesuega, mulimuli ane ai taofia o ia i le toese i Tafuna, ma tulai ai i luma o le faamasinoga i le vaiaso na tea nei.