Tala otooto o Fa’amasinoga

FALEPUIPUI LE USITA’I POLOAIGA FA’AMASINOGA

 

O le ali’i lea na le usita’i i le poloaiga a le faamasinoga maualuga, ina ua aloaia faaletulafono e le faamasinoga le tete’e o le la ulugali’i, na taofia i le toese i Tafuna i le aso Faraile na te’a nei, se’i vagana ua ia totogia le tupe atoa lea e oo mai i le vaiaso na te’a nei na te le’i totogiina.

 

Saunoa le alii faamasino e faapea, ina ua valaau le ulua’i iloiloga o le mataupu lenei i ni nai masina e le’i mamao atu, e le’i auai le ua molia i lea iloiloga, ma ua atagia mai ai lona le usitaia o poloaiga a le faamasinoga e tatau ai ona auai.

 

Sa poloaina fo’i o ia na te totogiina le ta’i $225 mo lana fanau, i piriota totogi uma a le malo i le amataga o le tausaga nei, ae talu mai le masina o Oketopa na te’a nei, e na o le $500 ua ia totogi, lona uiga e $4,000 o lo o nofo aitalafu ai o ia, o le tupe lea sa tatau ona oo mai i le taimi nei ua maea ona totogiina e tusa ai ma le poloaiga a le faamasinoga.

 

Saunoa Michael Kruse, ua manino i le faamasinoga, ua le usitaia e lenei alii lana poloaiga, ma o lona faasalaga o le taofia lea i le toese sei vagana ua totogi uma le tupe lea e oo mai i le taimi nei ua tatau ona ia totogiina mo lana fanau.

 

RONALD WELLS

 

O le alii lea na ta’usala e le faamasinoga i le moliaga o lona umia faasolitulafono o vaega o le pauta faasaina o le aisa, sona o le faalavelave lea na osofa’i ai e leoleo o ia i le masina o Me 2012 ma maua i ai se tama’i taga pepa o lo o i ai se vaega o le pauta faasaina o le aisa, ua nofovaavaaia nei mo le 5 tausaga i lalo o poloaiga a le faamasinoga.

 

O nisi o poloaiga a le faamasinoga sa tuuina atu ia Ronald Wells e tatau ona usita’i ai ina ua valaau lana mataupu i le aso Faraile na te’a nei, o lona tuliina lea o masina e 20 i le toese i Tafuna, ae talu ai ua atoa le 20 masina o taofia o ia i le toese e faatali ai taualumaga o lana mataupu, na faia ai loa le faaiuga ina ia tatala o ia i tua i le aso Faraile na te’a nei.

 

Na talosaga Wells mo se avanoa se’i toe fo’i atu ai i lona aiga, e faaauau ona tiute faatama i le tausiga o lana fanau e to’alua ma si ona to’alua, ona e foliga mai ua avea lona atalii matua e 21 tausaga o le ulu o le aiga i le taimi atoa na taofia ai o ia i le toese, ona o ia lea ua gafa ma le tausiga o le la tina ma si ona uso laititi e 6 tausaga, ae o tiute tonu ia e tatau ona ia faatinoina.

 

Na tutu faatasi loia a le malo ma le loia a Wells e talosaga i le faamasinoga ina ia aloaia le fautuaga o lo o taua i le ripoti a le Ofisa Nofovaavaaia, ina ia nofovaavaaia le ua molia ae aua ne’i toe faaopoopoa nisi aso e toe taofia ai o ia i le toese, lea fo’i na talia e le faamasinoga.

 

E tausaga i le toese ma le salatupe e $2,000 na manatu le faamasinoga e faasala ai Wells, peitai o le a faamalumalu lona tuliina o lenei faasalaga, fuafua lea i lona usitaia o poloaiga a le faamasinoga.

 

Ua faasa ona ia toe tagofia le ava malosi poo fualaau faasaina i le umi o lana nofovaavaaia, faasa foi ona toe mafutaga i tagata o lo o tagofia le ava malosi.

 

O le $204 lea na maua e leoleo ia te ia i le aso na faatoa taofia ai o ia, o le a totogi ai le vaega o lana salatupe e $2,000, ae o le vaega o lo o totoe ai o le a faamalumalu le totogiina, fuafua lea i lona usitaia o poloaiga uma a le faamasinoga.

 

MISI FAIAGA

 

O se alii mai Samoa e le o lelei le tulaga o ona pepa nofomau i le teritori, ua taofia nei i le toese i Tafuna ona o tuuaiga i lona taumafai lea e faia ni uiga mataga i se teineititi e 16 tausaga le matua, a’o aga’i atu le teineititi i lona aiga ua tuua le aoga.

 

O tuuaiga faasaga i le alii o Misi Faiaga e aofia ai le moliaga mamafa o lona tagofia o itutinosa o se teineititi, taofia faapagota o se tagata, atoa ai ma le moliaga mama o lona faia o ni gaioiga e ono lamatia ai le soifua manuia o se fanau laititi.

 

I faamaumauga a le faamasinoga o lo o taua ai e faapea, o le faalavelave na tula’i mai i le aso 5 Tesema i Tafuna, i le taimi na savali atu ai le teineititi na aafia i lona aiga ua tuua le aoga, ae faafuase’i ona alu atu le ua molia ma faatino le solitulafono.

 

Na faamatala e le teineititi na aafia i leoleo e faapea, sa la talanoa ma le ua molia ina ua latalata atu lana savali i le vaega tonu o lo o faigaluega ai le ua molia, ae ina ua tali atu i le isi fesili a le ua molia, o ia o le a alu i le fale ua tuua le aoga, na te’i ai ina ua oso mai le ua molia mai i le isi itu o le pa ma toso faatata lona lima aga’i i totonu o le faletaele.

 

Ina ua la taunuu i totonu o le fale taele, na faia ai loa e le ua molia gaioiga e pei ona tuuaia ai o ia e le malo, peitai na muta faafuasei ina ua maua le avanoa o le teineititi na aafia e sola ese ai, ma tama’o loa aga’i i le latou aiga.

 

O le masina o Ianuari 2014 lea ua faatulaga e faia ai le ulua’i iloiloga o lenei mataupu i luma o le faamasinoga maualuga, ina ua teena e Faiaga tuuaiga faasaga ia te ia i le vaiaso nei, ma o lo o taofia pea o ia i le toese i Tafuna e aunoa ma se tupe ua faatulaga e tatala ai o ia, ona o tulaga faaletonu i ona pepa nofomau.

Comment Here