Ads by Google Ads by Google

Tala otooto o Fa’amasinoga

TOLOPO MATAUPU A FELISE TOILOLO

 

Ua talia e le faamasinoga maualuga le talosaga na faaulu e le loia a Felise Toilolo, ina ia tolopo le ulua’i iloiloga sa faatulaga i le vaiaso na te’a nei seia aulia le tausaga fou, ona o lea ua faamoemoe le malo o le a latou failaina moliaga faasaga i le isi tagata lea o lo o molia faatasi ma Toilolo i le mataupu lenei.

 

O le vaiaso na te’a nei na faatulaga e faia ai le ulua’i iloiloga o le mataupu a Toilolo, peitai ina ua valaau le mataupu, sa faailoa e le loia a Toilolo ia Fiti Sunia e faapea, e ono faalagolago le mataupu a le ua molia i le mataupu a le isi tagata lea ua sauni le malo e molia, o ia lea o Jennifer Tofaeono, ma ia talosagaina ai loa le toe tolopo o le mataupu a Toilolo se ia aulia Ianuari poo Fepuari o le tausaga fou.

 

Ina ua fesiligia e le faamasino sili le itu a le malo e uiga i lenei mataupu, na taua ai e Mitzie Jessop e faapea, o Tofaeono o lo o i ai i atunuu i fafo, ae ua malie o ia e toe fo’i mai i le atunuu e tali i tuuaiga faasaga ia te ia.

 

O Toilolo sa galue i le falema’i o le LBJ i le taimi na tula’i mai ai tuuaiga faasaga ia te ia, i lona gaoiina lea o le tusa ma le $3,800 mai le falema’i, e ala i le faaaogaina o credit card i le falema’i.

 

O le aso 10 Ianuari, 2014 lea ua faatulaga e toe fofogaina ai le mataupu a Toilolo i luma o le faamasinoga.

 

IOE PATI JENNING JR I TUUAIGA

 

O le aso 17 Ianuari, 2014 lea ua faatulaga e lau ai le faasalaga a le alii o Pati Jenning Jr, ina ua talia e le faamasinoga maualuga se maliliega sa latou sainia ma le malo, lea ua ia tali ioe ai i moliaga o le talepe fale i le tulaga lua ma le gaoi.

 

E tolu moliaga mamafa na ulua’i tuuaia ai e le malo ia Jenning Jr, o ia moliaga e aofia ai le talepe fale i le tulaga muamua, gaoi, atoa ai ma lona taliaina o oloa sa ave faagaoi, ae ina ua maea ona talia e le faamasinoga la latou maliliega ma le malo, na solofua ai loa le moliaga e tasi o lo o totoe.

 

I le tali ioe ai o Jenning Jr., sa ia tautino ai e faapea, i se taimi o le aso  30 Iuni, 2013 i Amerika Samoa, sa latou osofaia ai ni alii se toalua e laiti i lalo o le tulafono le fale o le aiga na aafia, ma latou ave faagaoi le tele o mea aoga sa i totonu e pei o se fana ma ututau, mea pu’eata, telefoni, iPod faapea ai ma seevae.

 

Na tautino Jenning Jr e faapea, i le aso 1 Iulai 2013, sa ia faatauina atu ai loa le fana i le tagata e igoa ia Misi Tokei Siua i le tau e $350, ma o le taimi nei, ua i lima nei o leoleo le fana ina ua maea ona toe faafo’i mai i le fale o le alii o Siua.

 

O lo o molia fo’i Siua i le moliaga mamafa e tasi o lona taliaina lea o ni oloa sa ave faagaoi, ina ua ia faatauina le fana na aumai faagaoi e Jenning Jr ma isi alii mai le fale o le aiga na aafia.

 

O lo o taofia pea Jenning Jr i le toese i Tafuna e faatali ai le aso lea ua faatulaga e lau ai lana faasalaga.

 

MOLIA RAYMOND TUSIPA I LE GAOI

 

O le alii e 31 tausaga le matua mai Nuuuli lea na tuuaia e le malo i lona ulufale i totonu o le fale o le aiga latou te tuaoi ma ave faagaoi se telefoni feavea’i, seevae ma ni mitiafu, ua molia e le malo i le moliaga mama e lua o le gaoi ma le faatupu vevesi i nofoaga faitele.

 

I faamaumauga a le faamasinoga o lo o taua ai e faapea, o le maea ai o le inugapia a Raymond Tusipa ma le alii e ana le fale na aafia, na taamilo atu ai loa le ua molia i le isi faitoto’a o le fale ma ia gaoi meatotino e pei ona taua i faamaumauga a le malo.

 

E $92 le tau aofa’i o meatotino na taua e le malo na gaoi e le ua molia, ma ua uma ona toe faafo’i atu i le aiga e ana le fale.

 

Na teena e Tusipa tuuaiga a le malo faasaga ia te ia ina ua tulai i luma o le faamasinoga faaitumalo i le vaiaso nei, ma toe tolopo ai lana mataupu e toe fofogaina i le aso 23 Tesema, 2013.

 

A’o tatala ai Tusipa i tua mai le toese, ua faasa e le faamasinoga ona toe alu i le fale o le aiga na aafia, pe taumafai foi e faafesootai nisi o le aiga poo molimau a le malo.