Ads by Google Ads by Google

Tala otooto o Fa’amasinoga

TUUAIA SE TAMA’ITA’I I LE FAOMEA

 

E tolu moliaga mamafa ua faila e le malo faasaga i se tama’ita’i o lo o nofo faasolitulafono i le atunuu, ona o se faalavelave na tula’i mai i Nuuuli i le vaiaso na te’a nei, o lo o masalomia ai lona taumafai e ulufale faamalosi i totonu o se Fale Su’isu’i mo le faamoemoe e fa’atino ai i totonu se solitulafono.

 

O moliaga mamafa e tolu ua molia ai Rotorua Toailoa e aofia ai le faomea i le tulaga muamua; gaoi ma le faaoolima i le tulaga lua, faapea ai ma le moliaga mama o le faatupu vevesi i nofoaga faitele.

 

O ananafi na faila ai e le malo moliaga faaopoopo faasaga ia Toailoa, ma ua faamoemoe o le taeao nei e toe tula’i ai o ia i luma o le faamasinoga faaitumalo, mo le faatulagaina o le aso e faia ai lana ulua’i iloiloga i luma o ali’i fa’amasinoga.

 

E $2,000 le tupe na faatulaga e le faamasinoga e tatala ai le ua molia i tua, ae talu ai tulaga faaletonu i ona pepa nofomau e pei ona faamaonia e sui o le Ofisa o Femalagaaiga i le fa’amasinoga, na toe suia ai loa le faaiuga a le faamasinoga, ina ia taofia pea o ia i le toese e aunoa ma se tupe e fa’atulaga.

 

MARK MULIPOLA

 

O le aso 20 Tesema, 2013 lea ua fuafua le faamasinoga e tatau ona oo atu ai ua tauaao e loia se ripoti mai le foma’i o le mafaufau o lo o galue i le falema’i o le LBJ, mo le alii o Mark Mulipola lea o lo o tuuaia i lona faaoo o ni manu’a i lona tama, ma fuafua ai loa se faaiuga a le faamasinoga, pe gafatia e le ua molia ona tula’i e tali atu i tuuaiga faasaga ia te ia, pe a oo i le aso e faataunuu ai sona faamasinoga autu.

 

O le vaiaso na tea nei na toe valaauina ai le mataupu a Mulipola i luma o le faamasinoga maualuga, ae na faailoa e lana loia ia Michael White e faapea, ua maea ona faia le suesuega a le foma’i faasaga ia Mulipola ae le’i taunuu atu lava le ripoti e tusa ai o le faaiuga o lea suesuega sa faia.

 

Na faailoa e White i le faamasinoga e faapea, o le taua o le ripoti a le foma’i, o le a mafai ai ona faagasolo taualumaga o le mataupu a le ua molia, lea ua tele masina o taofia pea i le toese ina ua le mafai ona totogi le $20,000 sa faatulaga e taala ai o ia i tua.

 

O Mulipola o lo o tuuaia i le moliaga mamafa o le faaoolima i le tulaga muamua, ona o le faalavelave lea na faatonu atu ai o ia e lona tama e alu e ao mai le vai e fai ai le fofo, ae musu le ua molia, ma i’u i lona faaaoga ai o le agaese e faaoo ai manu’a i lona tama.

 

JOE LEOTA

 

O le aso Tofi o le vaiaso nei lea ua faatulaga e faia ai se iloiloga faapitoa o le mataupu a le alii pagota o Joe Leota i luma o le faamasinoga maualuga, mo le iloiloina pe faamaonia ua ia soli tuutuuga o lana nofovaavaaia.

 

O Leota na ta’usala i le mataupu na ia ave faagaoi ai pusa wahoo mai le kamupani o le StarKist Samoa, ma faasala ai o ia i le toese i Tafuna mo le 28 masina, o se tasi lea o tuutuuga o lana nofovaavaaia e 7 tausaga.

 

O isi tuutuuga o lana nofovaavaaia e aofia ai le aua lea ne’i ona toe solia se tulafono a le malo, ae i le masina o Iulai 2012, na sosola ai Leota ma le isi pagota mai tua o le toese, ma la osofaia ai le lala o le faletupe o Hawaii i Tafuna, sosoo ai ma le la talepeina o le Fale’aiga o le KFC ma le Pizza Hut.

 

Na taua e le loia a Leota ia Joel Shiver i luma o le faamasinoga e faapea, e manaomia ona faataunuu se iloiloga e iloilo ai mau a le malo faasaga ia Leota.

 

O lo o taofia pea le ua molia i le toese i le taimi nei e faatali ai le aso lea ua faatulaga e toe tula’i ai i luma o le fa’amasinoga maualuga.