HANIPALE MALAE

Ua poloaina e le afioga i le alii faamasino sili ia Michael Kruse loia o lo o aofia i le taulimaina o le mataupu a Hanipale Malae, afai e oo atu i le aso 20 Tesema, 2013 e le’i maua lava se maliliega e faamuta ai le mataupu faasaga ia Malae, ona sauni loa lea o itu e lua e tuuina atu le mataupu e faataunuu sona faamasinoga autu.

O le aso 21 Oketopa, 2014 lea ua faatulaga e faia ai le faamasinoga autu a Malae, peitai o le aso Faraile o le vaiaso fou lea ua faamoemoe e toe fofogaina ai lana mataupu i luma o le faamasinoga.

Na faailoa e le tamaitai loia ia Sharron Rancourt o lo o tula’i mo Malae ma Camille Philippe o lo o tula’i mo le itu a le malo e faapea, o lo o faia pea feutanaiga mo se maliliega aufaatasi e faamuta ai lenei mataupu.

Na valaau faatasi i le aso Faraile na te’a nei le mataupu a Malae, faatasi ai ma lona to’alua ia Asenati faatasi ai ma le tamaitai ia Faasoosoo Sosaiete, lea o lo o tuuaia faatasi latou i le isi fo’i mataupu fou e fesoota’i ma le mataupu na ulua’i tuuaia ai Malae.

O lo o tuuaia Malae i lona faia o uiga mataga i ni tamaitai se toatolu, e aofia ai ma Sosaiete.

Ae o lona toalua o Asenati ma Sosaiete o lo o tuuaia i lo la taumafai lea e faalavelave i molimau a le malo, e aofia ai ma le taumafai e ufiufi gaioiga faasolitulafono o lo o tuuaia ai Malae.

O le aso 22 Ianuari, 2014 lea ua faatulaga e toe valaau ai le mataupu a Asenati ma Sosaiete i luma o le faamasinoga maualuga.

MAELI PITOITUA

O le alii pagota lea o lo o tuli ni ana faasalaga soloatoa se lua i le toese i Tafuna, ua ia teena tuuaiga o lona sola ese i tua mai le toese, ina ua tulai i luma o le faamasinoga maualuga i le aso Tofi na te’a nei.

I le teena ai e Maeli Pitoitua po o ‘Isumu’ e pei ona lauiloa ai e tagata o ia tuuaiga a le malo, ua faatulaga ai loa lana ulua’i iloiloga e faia lea i le aso 16 Ianuari, 2014, ma o lo o taofia pea o ia i le toese i Tafuna e faatali ai le aso lea ua faatulaga e toe tula’i ai i luma o le faamasinoga.

O lo o tuuaia e le malo ia Pitoitua i lona sola lea i tua ae alu ua momoe ma le to’alua o le alii o lo o tagi i lenei mataupu.

Na taua e le fafine o lo o tuuaia sa mafuta ma le ua molia e faapea, na avea le vili atu o Maeli i lana telefoni i le isi aso ma itu na amata ai loa le la mafutaga, ma i’u ina faia ai le tonu e alu atu le ua molia i lo latou fale i Nuuuli la te mafuta ai, ma sa ia iloaina lelei lava o Pitoitua o lo o loka i le falepuipui.

SALATUPE LE ALII GAOI

O le ali’i e 24 tausaga le matua mai Tafuna lea na ta’usala i lona ave faagaoi o se pusa o lo o i ai ni mea faigaluega sa i tua o se pikiapu na paka i luma o se faleoloa i le masina o Oketopa na te’a nei, ua poloaina e le faamasinoga faaitumalo na te totogi le salatupe e $175, ma le $321 mo tau o mea faigaluega sa ia gaoiina.

Na taua e le alii o Levi Simeona e faapea, o le pusa sa i ai mea faigaluega na ia gaoiina mai tua o le pikiapu, na alu atu ma tuu i luma o le bus stop o lo o i luma o le latou fale ina ua ova tele lona ‘ona, ae ina ua toe fo’i ane i luma o le bus stop i le taeao na sosoo ai, ua ave e le tagata.

O nisi o poloaiga a le ua molia mo lana nofovaavaaia e 18 masina, e aofia ai lona auai i ni aoaoga e fesoasoani ai i le leaga o le ‘ava, ma ia saili sana galuega e totogi ai lana salatupe i totonu o le isi 60 aso, talu mai le aso na lau ai lona faasalaga.