Tala otooto o Fa’amasinoga

MOLIA UNCLE I LONA TU’IINA FOLIGA O LONA NIECE

 

O le alii lea na ia tu’iina foliga o le tama a lona tuafafine, ua molia nei e le malo i le moliaga o le faatupu vevesi i nofoaga faitele atoa ai ma le faaoolima i le tulaga tolu.

 

O le faalavelave na tulai mai i Fagalii i le aso 2 Tesema, 2013 i le taimi a’o faia se taaloga volipolo, lea na taalo ai ma le tamaitai na aafia i lenei mataupu.

 

Na taua e le tamaitai i leoleo e faapea, ina ua sauni o le a alu i le fale, ae te’i loa ua valaau atu lona uncle ia te ia e alu atu, na alu le tamaitai i le fale o lona uncle, ma na te’i ina ua tu mai lona uncle ma tu’i ona foliga ma toto ai lona isu, ma i’u ina pogisa ai ma lana vaai, ae ina ua te’i ane, o lo o fesoasoani atu lona tina ia te ia.

 

O le tina o le tamaitai na aafia, o le tuafafine lea o le alii ua molia, na faafesootaiina le ofisa o leoleo i Leone mo se fesoasoani, ma i’u ina taofia ai loa le ua molia ona o lenei mataupu.

 

O lo o faagasolo i luma o le faamasinoga faaitumalo le mataupu a le ua molia, ma ua poloaina o ia e le faamasinoga ina ia tausi le filemu i totonu o lona aiga, ma aua ne’i ona toe taumafai e faafesoota’i lona niece o lo o aafia i lenei mataupu.

 

IOE VALLEN MATUAUTO I TUUAIGA A LE MALO

 

O le alii lea na tuuaia e le malo i lona tu i fafo o se faleoloa e vaai ni tagata e o atu, a’o osofa’i ma talepe e isi ana uo totonu o le faleoloa, ua ia tautino i luma o le faamasinoga maualuga, e faamaonia tuuaiga faasaga ia te ia.

 

O Vallen Matuauto na ulua’i tuuaia e le malo i moliaga mamafa e lua, o le talepe fale i le tulaga muamua ma le gaoi, ae i lalo o se maliliega sa ia sainia ma le malo ma talia e le faamasinoga, ua ia tali ioe ai i le moliaga o le talepe fale i le tulaga lua ma le moliaga mama o le gaoi.

 

I le tali ioe ai o Matuauto i moliaga e pei ona ta’usala ai o ia e le faamasinoga, sa ia tautino ai e faapea, i se taimi o le vaveao o le aso 5 Ianuari, 2012 i Satala, sa ia auai ai i se fuafuaga a nisi o alii e talepe se faleoloa i Satala.

 

Na taua e Matuauto i leoleo ina ua fesiligia o ia i lenei mataupu e faapea, ina ua o atu ana uo ma le tonu o le a talepe le faleoloa, sa o ai loa alii e toalua i totonu e talepe le faleoloa ma gaoi mai oloa, ae tu tu o ia i fafo o le auala e vaavaai ni tagata e o atu.

 

Ina ua maea le osofaiga ma ua maua mai oloa sa gaoi, sa vaevae loa e le ua molia ma ana uo oloa mo latou.

 

O lo o tumau pea poloaiga a le faamasinoga o lo o tatala ai Matuauto i tua e faatali ai le aso lea ua faatulaga e lau ai lona faasalaga.

 

TETE’E LE PAGOTA I TUUAIGA A LE MALO

 

O le ali’i pagota lea o lo o tu’uaia i lona sola i tua ma le toese ae alu ua momoe ma le to’alua o le isi tamaloa, ua ia teena le moliaga e tasi o lo o tuuaia ai o ia e le malo, o le sola lea i tua mai le toese, ina ua tula’i i luma o le faamasinoga maualuga i le taeao ananafi.

 

I le teena ai e le alii o Maeli ‘Isumu’ Pitoitua o tuuaiga a le malo, ua faatulaga ai loa lana ulua’i iloiloga e faia lea i le aso 21 Ianuari, 2014.

 

O Isumu o lo o tuli ana faasalaga soloatoa e lua i le toese i Tafuna, ina ua fa’amaonia e le faamasinoga moliaga o le fasioti tagata faasaga ia te ia i ni tausaga ua mavae, ae o tuuaiga fou faasaga ia te ia, na alia’e mai ina ua faila e le tamaloa sana tagi i le ofisa o leoleo, faasaga ia Isumu i le sola atu lea ma momoe ma lona to’alua i le po, a’o alu le tamaloa e faigaluega.

 

E le gata na faamaoia e se molimau i leoleo lona vaaia o Isumu i totonu o le fale a le fafine na aafia, ae na oo lava fo’i i le fafine sa ia ta’utino i leoleo, sa i ai le po na sola atu ai Isumu i tua o le toese ma la momoe i lona fale, ina ua mae’a sa toe fo’i Isumu i totonu o le toese i le vaveao.

 

Comment Here