Tala otooto o Fa’amasinoga

DICKLAN TE’O

 

O le ali’i mai Pago Pago lea na tuuaia e le malo i lona faaaoga o se samala e sasa ai le ulu o lona uso matua, ua ia ta’utino i luma o le fa’amasinoga maualuga, e fa’amaonia tuuaiga faasaga ia te ia.

 

I lalo o se maliliega na saini e Dicklan Te’o ma le malo, ua ia tali ioe ai i le moliaga mamafa o le fa’ao’olima i le tulaga lua, atoa ai ma le moliaga mama o le faatupu vevesi i nofoaga faitele.

 

I lona tali ioe ai i moliaga e pei ona ta’usala ai o ia, sa ia tautino ai i luma o le faamasinoga sa ia faaoolima i lona uso.

 

O le vevesi na tula’i mai i le va o Te’o ma lona uso matua, na afua mai ina ua talanoaina e i laua le mataupu e faatatau i le toe faafouina o pepa Immigration o le to’alua a le uso matua a le ua molia, lea o lo o sponsor e Te’o, ma afua mai ai loa iina se taugaupu i le va o le au uso, ma sasa ai loa e le ua molia le ulu o lona uso i le samala.

 

O lo o tumau pea poloaiga o lo o tatala ai Te’o i tua, e fa’atali ai le aso 17 Ianuari, 2014 lea ua faatulaga e lau ai lana faasalaga.

 

JOSEPH ILIMALEOTA

 

O le faaiuga o le masina nei lea ua faamoemoe e lau ai le faasalaga a se alii e 19 tausaga le matua mai Nuuuli, ina ua ta’usala o ia e le faamasinoga maualuga i le moliaga o lona umia faasolitulafono lea o ni vaega o le laau faasaina o le mariuana.

 

I le tali ioe ai o Joseph Ilimaleota i lea moliaga, sa ia tautino ai e faapea, i se taimi o le aso 28 Setema, 2013, sa ia umia faasolitulafono ai se pepa iila sa i ai vaega o lau mamago o le mariuana i lona aiga i Nuuuli.

 

O le mataupu faasaga ia Ilimaleota na afua mai ina ua logo e se molimau faalilolilo le vaega a le Vice and Narcotics a le Ofisa o Leoleo, ma logo i ai gaioiga a le ua molia o lo o faia, o lona faatauina atu lea o mariuana i tagata.

 

Na faailoa fo’i e le molimau i leoleo e faapea, sa faailoa atu e le ua molia ia te ia, o mariuana mai se tasi o lona aiga i Manu’a o lo o ia faatauina, ae a maua le tupe, ona ia tuua lea o le isi vaega ae lafo le isi vaega i Manu’a.

 

Na faamatala e le molimau i leoleo e faapea, o se inugapia sa fai i le 2012, o iina na amata mai ai ona la masani ma Ilimaleota, ma o le tele o taimi na te vaaia ai mariuana i totonu o le ato poo le fale fo’i a le ua molia, sa ia vaaia fo’i o ia faatauina atu mariuana i isi tagata.

 

Ua malamalama le ua molia, e le mafai ona toe suia lana tali ioe ua tuuina atu i le faamasinoga maualuga, pe afai e tuuina atu se faasalaga ae le tusa ai ma lona mana’o.

 

TETE’E GREAT UNCLE I TUUAIGA

 

O le masina fou o Ianuari 2014 lea ua faatulaga e faia ai le ulua’i iloiloga o le ‘great uncle’ lea o lo o tuuaia i lona faia o uiga mataga i ona niece e to’alua, ina ua ia teena tuuaiga faasaga ia te ia i luma o le faamasinoga maualuga i le taeao ananafi.

 

O lo o tuuaia le ua molia i moliaga mamafa e tolu e aofia ai le tagofia o itutinosa o ni tamaitai se toalua e laiti i lalo o le tulafono, faia o uiga mataga, atoa ai ma le faia o amioga faasotoma i fanau laiti.

 

O lo o tuuaia e le malo le ua molia i lona totogi tupe lea o tamaitai nei e toalua, e faalata ai i laua mai le faailoaina atu i o la matua o amioga mataga o lo o ia faia i ai.

 

Na faamatala e le tamaitai e 9 & 13 tausaga na aafia i leoleo e faapea, o le masina o Aokuso 2011 ina ua faatoa alu atu le ua molia ma nofo i le latou fale na amata fai atu ai e le ua molia uiga mataga nei ia te i laua, seia oo mai lava i le masina o Novema na te’a nei.

 

O lo o taofia pea i le toese i Tafuna le ua molia ina ua le mafai ona ia totogiina le $50,000 na faatulaga e le faamasinoga e tatala ai o ia i tua.

 

MOLIA SE ALII I LE GAOI FAGUPIA

 

E 22 tausaga o se alii mai Fagaalu ua molia e le malo i le solitulafono mama o le gaoi, ona o le faalavelave lea na ia totogi ai fagupia e lua i luma o le ‘cashier’ ae lua isi fagupia o lo o nana i totonu o lona ofu vae o lo o fai.

 

O le po ina ua sauni le faatauoloa e tapuni lona faleoloa, na faatoa ia vaaia ai le gaioiga sa faia e le ua molia ina ua matamata i le masini pu’eata o le faleoloa, ma ia logoina ai loa leoleo i le mea sa tupu.

 

Na taua e Anthonio Lipine e faapea, e $11 le tupe na avatu e lana uo e faatau ai ni la fagupia, peitai sa nofo ma faaaoga le $5 e faatau ai lana sikaleti, ona ia faatau lea na o fagupia e lua ae nana le isi lua i totonu o lona ofuvae sa fai. Na ova le ‘ona a Lipine i le taimi na maua ai o ia e leoleo ma fesiligia i lenei mataupu.

 

Ua tatala i tua Lipine e faatali ai le aso lea ua faatulaga e toe tulai ai i luma o le faamasinoga, faatasi ai ma poloaiga ua tuuina atu ia te ia, e aofia ai le faasa lea ona toe tu i le faleoloa o lo o tuuaia na ia aumai faagaoi fagupia e lua.

Comment Here