Tala otooto o Fa’amasinoga

IOE JENNING I TUUAIGA A LE MALO

 

O le faaiuga o le masina nei lea ua faamoemoe e lau ai le faasalaga a le alii o Pati Jennings i luma o le faamasinoga maualuga, i le maea ai lea ona talia e le faamasinoga o lana tali ioe sa tuuina atu i le vaiaso na tea nei, i lalo o se maliliega sa latou sainia ma le malo.

 

Sa ulua’i tuuaia e le malo ia Jennings i moliaga o le gaoi, talepe fale, atoa ai ma lona talia o ni oloa sa ave faagaoi, ae i lalo o le maliliega lea ua talia e le malo, ua tali ioe ai le ua molia i moliaga mamafa e lua o le talepe fale i le tulaga muamua ma lona taliaina o ni oloa sa ave faagaoi, ae solofua e le faamasinoga le moliaga o le gaoi.

 

I le tali ioe ai o Jennings i moliaga e pei ona ta’usala ai, sa ia tautino ai e faapea, i le va o le masina o Iuni ma Iulai 2013 i Mapusagafou, sa latou osofaia ai ma nisi alii se fale o se aiga ae ave faagaoi le tele o mea aoga sa i totonu.

 

O le fale na aafia e pei ona taua i faamaumauga a le faamasinoga, o le fale o se ulugalii sa malaga i fafo ae tete’i ina ua fo’i mai ua tele mea aoga o le la fale ua gaoia ma faaleagaina.

 

E toalima i latou na tuuaia e le malo i le mataupu lenei, ma o i latou ia e aofia ai Jenning, Tokei Siua poo Misi, ma ni alii se toatolu e laiti i lalo o le tulafono.

 

O le vaiaso nei lea ua faamoemoe e fofogaina ai le maliliega a Misi ma le malo i le mataupu lenei, faatasi ai ma le isi fo’i mataupu fou na molia ai o ia e le malo, i lona umia faasolitulafono lea o ni vaega o le pauta faasaina o le aisa.

 

O lo o taofia uma Misi ma Jennings i le toese ina ua le mafai ona la totogi tupe na faatulaga e tatala ai i laua i tua, ae o alii talavou e toatolu na molia faatasi ma i laua nei, o lo o faagasolo pea i luma o le faamasinoga faaitumalo a latou mataupu.

 

MOLIA FINAUGA, AVE TAAVALE A’O SE’I LONA LAISENE

 

O le ali’i lea na se’i e le faamasinoga faaitumalo lona laisene i le fa masina talu ai, ina ua ta’usala o ia i le moliaga mama o le ave ta’avale ‘ona, ua molia nei e le malo i le moliaga mamafa o le ave ta’avale a’o se’i lona laisene, ma o lea moliaga pe afai ae faamaonia e le faamasinoga, o lo o fautuaina e le tulafono le faamalosia lea ona tuli o aso e 90 i le toese, ae le mafai ona sili atu i le 5 tausaga le umi e mafai ai ona faasala o ia i le falepuipui.

 

O le vaiaso na tea nei na faila ai e le malo le moliaga faasaga ia Finauga, ma ua tatalaina nei o ia i tua e faatali ai le aso 10 Tesema lea ua faamoemoe e toe fofogaina ai lana mataupu.

 

O Finauga na taofi e leoleo lana taavale i Iliili i le lua vaiaso talu ai, ina ua molimauina e ni alii leoleo sa tiute i lea itu o le atunuu le alu saoasaoa o le taavale ina ua latalata atu i le Malae Tapolo i Iliili, ma ia tipiina ai ni ta’avale se lua i le vaega o le auala e faasa ona tipi ai e le isi taavale le isi taavale.

 

Na taofi e leoleo le taavale a Finauga i luma o le faleaoga a Lupelele Elementary ma fesiligia le tuuina atu o lana laisene ave ta’avale, peitai na pepelo i ai le ua molia o lo o galo i totonu o le isi ana taavale lana laisene, ae ina ua faaauau pea suesuega a leoleo na manino ai, o le masina o Aokuso 2013 na se’i ai e le faamasinoga faaitumalo le laisene a Finauga ina ua ta’usala o ia i le moliaga o le ave taavale ‘ona.

 

I le aso na lau ai lona faasalaga, sa fautuaina ai o ia e le alii faamasino ia John L. Ward II, e le tatau ona ia toe faafoeina se taavale i totonu o le 6 masina lea ua se’i ai lona laisene, ae afai e maua o ia o lo o ia faafoeina se taavale, o le a mafai e le malo ona molia o ia i le moliaga mamafa o le ave taavale a’o se’i lona laisene, ma afai ae faamaonia e le faamasinoga lea moliaga, e ono faasala o ia i le toese mo le umi e le sili atu i le 5 tausaga, ae faamalosia ai le tuliina o aso e 90 i le falepuipui.

 

TETE’E LE AU FA’ALEAGA MASINI I TUUAIGA A LE MALO

 

O ali’i e to’alua ia o lo o tuuaia i lo la faaleagaina o ni masini sua auala a le kamupani fai auala o le McConnell Dowell, ua la teena tuuaiga faasaga ia te i laua ina ua la tutula’i i luma o le faamasinoga maualuga i le vaiaso na te’a nei.

 

I le tete’e ai o Fred Maloata ma Simi Vesi i moliaga o le faaleaga meatotino i le tulaga muamua, atoa ai ma le faatupu vevesi i nofoaga faitele, ua faatulaga ai loa le la ulua’i iloiloga, lea ua faamoemoe e faia i le ogatotonu o le masina fou o Ianuari, 2014.

 

O tuuaiga faasaga ia Vesi ma Maloata, na tofu atu i le ofisa o leoleo ina ua faila e se sui o le kamupani a le McConnell Dowell se tagi faasaga i a latou masini sua auala sa paka i Leone ae ua faaleaga e ni tagata.

 

O ni molimau sa latou faailoa i leoleo lo latou vaaia o Vesi ma Maloata o lo laua talepeina masini sua auala, na mafua ai loa ona fesiligia e leoleo i laua ua molia ma i’u ina molia ai.

Comment Here