Tala otooto o Fa’amasinoga

NOFOVAAVAAIA LE ALII GAOI PUSA SAIMINI

 

O le alii e 23 tausaga le matua lea na ia gaoia se pusa bowl saimini mai totonu o se faleoloa i Tafuna e aunoa ma lona totogiina o se tupe, ua nofovaavaaia mo le 12 masina i lalo o poloaiga a le faamasinoga.

 

O nisi o ia poloaiga ua tuuina atu i le alii o Levi Finauvale e aofia ai lona totogi o se salatupe e $100 i le faamasinoga, atoa ai ma lona toe totogiina o le tau o le pusa bowl saimini sa ia ave faagaoi.

 

A’o le’i tuuina atu le faasalaga a le faamasinoga faasaga ia Finauvale, na mua’i faatoese le ua molia e tusa ai o lana solitulafono, ma ia talosagaina ai le faamasinoga mo se isi avanoa mo ia.

 

Sa ia taua fo’i e faapea, o lona ‘ona tele i le po na tula’i mai ai le faalavelave na mafua ai ona ia faia lenei gaioiga, peitai ua ia tautino na te le toe solia se isi tulafono a le malo.

 

O Finauvale na o ma lana uo e faatau mai sa latou pusa pia i le po na tula’i mai ai le faalavelave, a’o fesoasoani le fafine Saina e ana le faleoloa i le fu’eina o fagupia mo le uo a Levi, o le taimi lea na savali atu ai le ua molia ma uu mai se pusa bowl saimini sa i luga o le isi fata o le faleoloa, ma savali ma ia i fafo ona ia tuu lea i tua o le la taavale.

 

O le aso na sosoo ai na faafesootai ai e le pule o le faleoloa leoleo mo se fesoasoani, ina ua maua i luga o le masini pu’eata gaioiga a le ua molia sa fai.

 

FINAU ISUMU E FAATAUNUU LANA ULUA’I ILOILOGA

 

O le alii pagota lea o lo o tuuaia i lona sola i tua ma le toese ae alu ma momoe ma le to’alua o le isi tamaloa, ua ia finau i le faamasinoga faaitumalo ina ia faatulaga lana ulua’i iloiloga, ina ia mafai ai e le faamasinoga ona iloilo mau a le malo ma fuafua ai, pe faamata e lava ma totoe ia mau e lagolago ai tuuaiga faasaga ia te ia.

 

Ina ua tula’i le alii o Maeli Pitoitua poo Isumu e pei ona lauiloa ai o ia e le toatele i luma o le faamasinoga faaitumalo ananafi, sa ia faailoa ai i le alii faamasino ia John L. Ward II lona mana’o e faaauau lana ulua’i iloiloga.

 

O le itula e 1:30 i le aoauli nei, ua faatulaga e faia ai le ulua’i iloiloga o lenei mataupu i luma o le faamasinoga faaitumalo, ma ua sauni le malo e valaau le latou molimau e toatasi, o le alii leoleo suesue lea ia Sgt. Det. Poma’i Paepule mo le tuuina atu o lana molimau i luma o le faamasinoga.

 

O lo o taofia pea Isumu i le toese i Tafuna e faatali ai le taimi lea ua faamoemoe e toe tulai ai i luma o le faamasinoga faaitumalo.

 

TETE’E GRANDMOTHER I TUUAIGA A LE MALO

 

O le tausaga fou lea ua fuafua e toe tula’i ai le grandmother lea o lo o tuuaia i lona faapologa ma sasa lona grandson e 10 tausaga le matua i luma o le faamasinoga, ina ua ia teena tuuaiga faasaga ia te ia i le taeao ananafi.

 

O le aso Gafua na te’a nei na faatulaga e faia ai le ulua’i iloiloga a le ua molia i luma o le faamasinoga faaitumalo, peitai e le’i faataunuuina lea ulua’i iloiloga, ina ua manatu le ua molia e tuu sa’o atu loa lana mataupu e faataunuu sona faamasinoga i luma o le faamasinoga maualuga.

 

O tuuaiga faasaga i le ua molia na afua mai i le faalavelave lea sa ia sasa ai lona grandson i laau, laupapa atoa ai ma le faaaogaina o ona lima, e aunoa ma lona tuuina atu o ia i le falema’i mo togafitiga i le taimi e manu’a ai lana tama.

 

O lo o taofia pea i le toese le ua molia ina ua le mafai ona ia totogiina le $10,000 na faatulaga e le faamasinoga e tatala ai o ia i tua.

 

Comment Here