Ads by Google Ads by Google

Tala otooto o Fa’amasinoga

TU’UAIA TUALAULELEI I LE FA’AO’OLIMA

 

Ua tuuaia nei e le malo se alii talavou mai Pago Pago i lona faaoolima i se isi alii e aunoa ma se mafuaaga tatau.  O moliaga faasaga ia Moimoi Tualaulelei e aofia ai le Faomea i le tulaga muamua, faaoolima i le tulaga tolu ma le faatupu vevesi i nofoaga faitele.

 

I faamaumauga a le faamasinoga o lo o taua ai e faapea, o le vaveao o le aso 17 Fepuari na logo ai e se Samalia agalelei le ofisa o leoleo, ona o se alii o lo o manu’a.

 

Na taunuu leoleo i Pago Pago ma auina atu ai loa lenei alii i le falema’i mo togafitiga.  Na ia ta’ua i leoleo e faapea, Ina ua agai atu e faaaoga le fale taele o lo o i tafatafa o le pa tenisi i Pago Pago, na faafuasei ona savali atu se alii ulu uumi ma fesili atu ia te ia po o fea e sau ai.

 

Fai mai le alii na aafia, e lei uma lelei le fesili a le alii lea ae tau ma lana kiki i ona foliga ma pau ai i lalo ua matapogia, na te’i a’e ai i le isi taimi ma tau tolotolo i le Evalani mo se fesoasoani, ina ua ia faalogoina le tiga o ona foliga.

 

Na fiu leoleo e tau saili le tagata na faatinoina lenei solitulafono, ae na taua e se molimau i leoleo e faapea, na faamatala atu e Tualaulelei ia te ia lona fasiga o le alii na aafia, atoa ai ma lona tia’ia i se kalone lapisi i tafatafa o le faleoloa o le TSM o lana ato na alu atu ma ia.

 

Ina ua fesiligia e leoleo le ua molia e tusa ai o lenei faalavelave, sa ia ioeina ai lona faaoolima i le alii na aafia ma manu’a ai, ina ua fesili atu i ai poo fea e sau ai, ae tali mai o ia e sau mai Pago Pago.

 

E $25,000 le tupe lea ua faatulaga e le faamasinoga e totogi ona faatoa mafai lea ona tatala le ua molia i tua mai le toese i Tafuna.

 

FA’AAOGA TUPE GAOI E FAATAU AI MEAAI

 

O le alii lea o lo o tuuaia i lona osofaia o se fale i Pava’ia’i ma ave faagaoi ai ni meatotino sa i totonu e aofia ai ma se tinoitupe e $200, sa ia faailoa i leoleo e faapea, sa ia faaaoga le tupe na ia gaoia e faatau ai ana meaai, ae o isi mea sa ia aumaia mai le fale sa ia tuuina i le fale o le isi ana uo, e faatali ai se tagata e mafai ona ia faatauina.

 

O moliaga mamafa e fa ua tuuaia ai e le malo le alii o Jess Shane Pogia e aofia ai moliaga e lua o le talepe fale i le tulaga lua, faapea ai ma moliaga e lua o le gaoi.

 

Na teena e Pogia tuuaiga uma faasaga ia te ia ina ua tulai i luma o le Faamasinoga Maualuga i le vaiaso na te’a nei, i lona teena ai o tuuaiga a le malo, ua faatulaga ai loa le isi ana iloiloga e faia lea i le aso 10 Aperila 2013.

 

I faamaumauga a le faamasinoga o lo o taua ai e faapea, o le masina o Aokuso 2012 na logoina ai e le alii e ana le fale na gaoia le ofisa o leoleoi.  O meatotino na gaoia na aofia ai pea seevae, pulou pesipolo, o se fana o le ituaiga o le .22, atoa ai ma se fagu sa teu ai ana tupe e tusa ma le $200 le aofai.

 

E toatele ni molimau sa latou faailoa i leoleo lo latou vaaia o Pogia o ia umia ni isi o mea sa gaoia mai le fale o le alii na aafia e pei o se DVD player, filifili auro, tino i tupe e $200 ma se uati. Na taua e le isi molimau i leoleo e faapea, sa faamatala atu e Pogia ia te ia lona talepeina o se fale i Pava’ia’i  ma le gaoia o meatotino sa i totonu.

 

Sa ioeina e Pogia lona osofaia faalua o lenei fale i Pavaiai.  Na taua e Pogia e faapea, o isi mea sa ia gaoia sa ia tuuina i le fale o lana uo, ae o le fana sa ia faatauina atu i le isi tagata i le tau e $130, ae o le tupe sa faaaoga e faatau ai ana meaai.

 

E $20,000 le tupe lea ua faatulaga e le faamasinoga e tatala ai le ua molia i tua, ao faagasolo ai taualumaga o lana mataupu i luma o le faamasinoga maualuga i le taimi nei.

 

TUUAIA SIULUA I LONA TALEPEINA O SE FALE I LE 2 TAUSAGA TALU AI

 

O le alii talavou lea o lo o tuuaia i lona talepeina lea o se fale ae gaoi ni meatotino sa i totonu i le silia i le 2 tausaga talu ai, ua molia nei e le malo i moliaga mamafa e lua o le gaoi atoa ai ma le taliaina o ni oloa sa ave faagaoi e ni isi tagata.

 

O le vaiaso na tea nei na tulai ai i luma o le faamasinoga faaitumalo le alii o Nathaniel Siulua ona o tuuaiga faasaga ia te ia, ma ua toe taofia nei o ia i le toese i Tafuna e faatali ai le isi ana iloiloga lea ua faatulaga i le vaiaso nei.

 

O le afiafi o le aso 20 Setema 2010 ina ua manava atu le aiga e ana le fale na aafia, na latou iloaina ai ua talepe e le tagata le latou fale ae gaoi ni isi o meatotino sa i totonu e pei o telefoni, laptop computer, kitara, mea pu’eata ma fagu uaina.

 

O le aso 8 Oketopa 2010 na toe fesootai ai le aiga i leoleo ma faailoa i ai, o le ua molia o lo o masalomia na talepeina le latou fale.

 

O ni isi o ofu o lo o tuuaia e le malo Siulua sa ia gaoiina mai i le fale o le aiga na aafia, sa ia foa’i atu i se tasi alii, ma maua ai loa e le alii lea le ID o le tamaloa e ana le fale i totonu o le taga o le ofuvae sa tuuina atu ia te ia, ma ia faafoiina ai loa le ID i le aiga.

 

Ina ua fesiligia e leoleo le alii na foa’i i ai e le ua molia ofuvae pupuu, sa ia taua ai i leoleo e faapea, sa ia fesili ia Siulua pe sa i ai ni ofuvae na sau ma ia i lana malaga mai fafo, lea na tali atu ai le ua molia ioe, ae o le aso na sosoo ai na tuu atu ai e le ua molia ni ofuvae iat e ia, ma ia mauaina ai i totonu o le taga o le isi ofuvae le ID a le tamaloa e ana le fale na faaleagaina.

 

I le masina lava o Oketopa 2010 na toe faafoi ai le laptop na gaoia i le aiga e ana ia lea meatoino, ae ina ua fesiligia e leoleo le ua molia e tusa ai o lenei mataupu, sa ia taua ai e faapea, sa ia maua le laptop o afiafi i se ofu Lakers i fafo o le fale o le aiga, ao ia moaina le vao a le aiga i le masina o Setema.

 

Na teena e Siulua tuuaiga o ia na talepeina le fale ma gaoi meatotino sa i totonu.

 

E $20,000 le tupe lea ua faatulaga e totogi ona faatoa mafai lea ona tatala le ua molia i tua, afai ae mafai ona tatala o ia i tua, ua faasa ona ia toe taumafai e faafesootai ni isi o le aiga e ana le fale lea o lo o tuuaia o ia sa ia talepeina.