Tala otooto o Fa’amasinoga

NOFOVAAVAAIA SASALA MO LE 5 TAUSAGA

 

O le alii mai Fagaalu lea na ia fao faamalosi le $3 mai totonu o le taga a se alii e 14 tausaga le matua i le amataga o le tausaga nei, na magalo i tua i le aso Faraile na te’a nei, ina ua manatu le faamasinoga ua lava le umi lea ua oo mai i le taimi nei ua maea ona ia tuliina i le toese i Tafuna, e fai ma ana faasalaga i lenei mataupu.

 

O Kennedy Sasala na molia e le malo i le moliaga mamafa o le faomea i le tulaga lua, atoa ai ma moliaga mama e lua o le gaoi ma le faatupu vevesi i nofoaga faitele, ae i lalo o se maliliega sa latou sainia ma le malo ma talia e le faamasinoga, na ia tali ioe ai i le moliaga o le taumafai e gaoi ni meatotino a se tagata, na toe suia ma teuteu e le malo.

 

A’o le’i tuuina atu le faasalaga a le faamasinoga mo Sasala i le vaiaso na tea nei, na faatoese le ua molia e tusa ai o lana solitulafono sa fai, ma ia talosagaina ai le faamasinoga mo se isi avanoa mo ia.

 

Na malilie loia a itu e lua ina ia nofovaavaaia Sasala i lalo o poloaiga a le faamasinoga, e aofia ai le faasa lea ona ia toe tagofia le ava malosi. Sa finau foi le loia a le malo ia Julie Pasquale i le faamasinoga, ina ia taofia pea Sasala i le toese se’i tatala pe a maea aso fiafia o lo o lumana’i nei, aua o le isi lea taimi o le a tele ai le ava malosi e tagofia e tagata, ae na saunoa le alii faamasino sili ia Michael Kruse, afai e le usitai le ua molia i poloaiga ua tuuina atu e le faamasinoga, o lona uiga o le toese mo le isi 5 tausaga.

 

Na taua e le faamasinoga e faapea, o le mataupu ua ta’usala ai le ua molia, na afua mai i se faalavelave lea na tula’i mai i Fagaalu, ina ua fao e le ua molia le $3 mai totonu o le taga o le ofu a se tamaititi.

 

Na taua e le faamasinoga e faapea, e $30 le tupe na tuu e se tina i lana tama e alu ai e faatau mai se sipika o lana laau pese, ae ina ua oo atu i luma o se faleoloa i Fagaalu le alii na aafia, na alu i ai Sasala ma fesili i ai mo se tupe peitai na tali le tamaititi e leai se tupe.

 

Na aapa Sasala i totonu o le taga a le tamaititi ma aumai i fafo le tupe o lo o i ai, ona ia ave lea o le $3 ae toe tuu le isi vaega i totonu o le taga o le ofu a le tamaititi. Na tamo’e le tamaititi i lo latou fale ma ta’u i lona tina, ma logo ai loa e le fafine leoleo mo se fesoasoani.

 

Na maua e leoleo Sasala o lo o inu i le Paka i Fagaalu, ma ina ua fesiligia o ia e tusa ai o lenei mataupu, sa teena e le ua molia lona faia o lea gaioiga i le tamaititi na aafia, ma ia taua i leoleo e pepelo le tamaititi, ae ina ua laga e leoleo le taga o le ofu a Sasala sa fai, sa maua ai i totonu o le $3.

 

E 5 tausaga na manatu le faamasinoga e loka ai Sasala, peitai o le a nofovaavaaia o ia mo le 5 tausaga, ae ua lava aso e 322 lea ua uma ona ia tuliina i le toese e fai ma ana faasalaga.

 

Ua faasa ona ia toe tagofia le ava malosi, faasa ona toe eva ma tagata inupia, faasa foi ona toe alu i totonu o ni Fale e faatau ai pia, a ia avea o ia ma tagatanuu lelei e le toe solitulafono.

 

FALEPUIPUI AH SIU MO LE 28 MASINA

 

O le alii talavou mai Vaitogi lea na ta’usala i moliaga mamafa e lua o le talepe fale i le tulaga lua atoa ai ma le taumafai e talepe se fale, ua faasala e le faamasinoga maualuga e taofia i le toese i Tafuna mo le 28 masina.

 

Sa manatu le faamasinoga e umi atu se taimi e loka ai Taligalu Ah Siu i le toese, ona o le faalua ai lea ona tulai i le faamasinoga i ituaiga mataupa faapenei, ae talu ai o le talosaga a lana loia ia Joel Shiver ma le loia a le malo ia Tony Graf, ina ia toe tuu se isi avanoa mo le ua molia, na manatu ai loa le faamasinoga ua lava masina e 28 e loka ai o ia i le toese, o se tasi lea o tuutuuga o lana nofovaavaaia e 7 tausaga, ina ia maua ai le avanoa e auai atu ai o ia i aoaoga e fesoasoani ai i le faafitauli o lo o aafia ai o ia, o le fiafia lea e sogisogi i le penisini.

 

Na taua e le alii faamasino sili ia Michael Kruse e faapea, ua latou maua i le mataupu a Ah Siu, o aafiaga o lo o maua ai o ia, o ni mataupu e moomia ai togafitiga faa foma’i, ma e tatau ona maua se avanoa e alu ai o ia e auai i ni polokalame o lo o faatino i le falema’i, e togafitia ai le faafitauli o lona fiafia lea e senifi ia penisini.

 

Na faailoa e Kruse ia Ah Siu e faapea, afai e loka o ia i le toese mo le 7 tausaga, na te le toe maua se avanoa e sogisogi ai i penisini, e le toe aafia foi lona olaga i se solitulafono, ae afai e tatala o ia i tua, o le a maua le avanoa e togafitia ai le faafitauli o lo o aafia ai o ia.

 

O isi poloaiga o le nofovaavaaia a Ah Siu ua tuuina atu e le faamasinoga, o le aua lea nei ona toe solia se tulafono, aua nei ona toe tagofia le ava malosi poo fualaau faasaina, ua faasa foi ona ia toe faaaogaina isi ituaiga mea oona e pei o penisini ma karasini.

 

“Afai ete le usitai i poloaiga ua tuuina atu ia te ia, o le a toe taofia oe i le toese ma lua mafuta ai lava ma le pule o le falepuipui mo le isi 7 tausaga o lou olaga,” o le saunoaga lea a Kruse ia Ah Siu.

Comment Here