IOE PAEA LATU I TUUAIGA A LE MALO

O le alii e 41 tausaga le matua lea na tuuaia i lona so’aina o le taavale a se fafine ma sana fanau i lana taavale, ua ia tautino i le faamasinoga maualuga e faamaonia tuuaiga faasaga ia te ia.

E tolu moliaga na uluai tuuaia ai e le malo le susuga a Paea Latu, ae i lalo o le maliliega sa ia sainia ma le malo ma ua talia foi e le faamasinoga maualuga, ua ia tali ioe ai i le moliaga mamafa o le faaoolima i le tulaga lua, ae solofua moliaga mama e lua o lo o totoe ai i le pepa o tagi sa faaulu e le malo, le moliaga o le faaleaga meatotino i le tulaga tolu, ma le moliaga o lona faia o ni gaioiga e ono lamatia ai le ola manuia o fanau.

I le tali ioe ai o Latu i le moliaga e pei ona tausala ai o ia, sa ia tautino ai i luma o le faamasinoga e faapea, i se taimi o le aso 15 Aokuso, 2012, sa ia so’aina ai i lana taavale le taavale a se tina, ao i ai lea tina ma nisi tagata se toalua i totonu o lea taavale.

Na tautino Latu e faapea, e faatolu ona ia so’aina le taavale a le tina na aafia, ao i ai lana tama ma se pepe e 4 tausaga le matua, ma o lana gaioiga sa faia i lea aso ua le tusa ai ma ala o le tulafono.

O le aso 13 Tesema, 2013 lea ua faatulaga e lau ai le faasalaga a Latu, ma o lo o tumau pea poloaiga o lo o tatala ai o ia i tua.

SUI LE MOLIAGA UA TALI IOE AI ETEVISE TOMASI

O le tina talavou lea na tali ioe i le vaiaso na te’a nei i le solitulafono o le faaoolima i le tulaga muamua, i lalo o se maliliega ma le malo, ua suia nei le moliaga e tali ioe ai o ia, i le maea lea ona malilie o loia i le suiga e pei ona faailoa i le faamasinoga.

O Etevise Tomasi na ulua’i tuuaia e le malo i moliaga mamafa e lua, lea e aofia ai le moliaga o le faaoolima i le tulaga muamua, atoa ai ma le moliaga o le faaoolima i le tulaga lua.

O le ulua’i maliliega na saini e Tomasi ma le malo, sa ia tali ioe ai i le moliaga mamafa o le faaoolima i le tulaga muamua, lea e mafai ona faasala ai o ia i le toese mo le umi e amata atu i le 10 e o o atu i le 30 tausaga, ae o le maliliega fou lea na latou toe sainia ma le malo i le vaiaso na tea nei ma talia foi e le faamasinoga, ua ia tali ioe ai i le moliaga feololo ane, o le faaoolima lea i le tulaga lua, lea e na o le 5 tausaga e mafai ona faasala ai se tasi i le toese.

I le tali ioe ai o Tomasi i le solitulafono e pei ona tausala ai, sa ia tautino ai e faapea, i se taimi o le aso 28 Iulai, 2013 i Amerika Samoa, sa ia faaoo ai manu’a i le tamaitai na aafia, e ala i lona togiina lea o ona foliga i se ipu malamalama ma manu’a tigaina ai o ia.

Na taua e le malo e faapea, e 5 manu’a loloto na aafia ai foliga o le tamaitai na manu’a, ma manaomia ai filo e 16 e tau su’i ai nei manu’a. O le faaiuga o lenei faalavelave, e le gata na laulua ai se ponaivi o le isu o lenei tamaitai, ae o ma’ila fo’i o lo o pipi’i i ona foliga, o le a tumau ai pea i le olaga atoa.

Ua manino i le faafofoga a le faamasinoga, ua maea ona uia e le aiga a Tomasi tu ma agaifanua a Samoa, o le faia lea o se ifoga i le aiga o le tamaitai na aafia, ma ua taliaina foi e le aiga o lea tamaitai le ifoga sa avatu, ma ua maea ona faaleleia feeseeseaiga na tulai mai i le va o aiga e lua, ma o lea tulaga o le a avea ma itu e silasila toto’a i ai alii faamasino i le taimi e tuu mai ai la latou faasalaga i le aso 13 Tesema.