Tala otooto o Fa’amasinoga

TETE’E ASENATI MA FAASOOSOO I TU’UAIGA

 

O le aso 5 Tesema lea ua faatulaga e toe fofogaina ai le mataupu a Asenati Malae ma Faasoosoo Sosaiete i luma o le fa’amasinoga maualuga, ina ua la teena tu’uaiga a le malo faasaga ia te i laua i le vaiaso nei.

 

O Asenati o lo o tuuaia i moliaga e lua o lona faalavelave i molimau a le malo, atoa ai ma lona taumafai e ufiufi se solitulafono, ae o Faasoosoo o lo o tuuaia i lona faaleaga o mea molimau a le malo, faapea ai ma lona faalavelave i molimau a le malo.

 

O tuuaiga faasaga ia Asenati ma Faasoosoo na alia’e mai i le mataupu lea na taumafai ai Faasoosoo e faasufi se tasi o tamaitai o lo o avea ma molimau a le malo i le mataupu o lo o tuuaia ai Hanipale Malae, ina ia toe sui atoa lana faamatalaga ua maea ona tuuina atu i le malo.

 

O lo o taofia pea Faasoosoo i le toese i Tafuna sei vagana ua totogi le $5,000 ona faatoa mafai lea ona tatala o ia i tua, ae o Asenati ua maea ona tatala i tua ina ua ia totogi le $5,000, i lalo o tuutuuga e ao ona usita’i i ai.

 

O ni isi o ia tuutuuga e aofia ai le faasa lea ona toe taumafai e faafesootai molimau a le malo i so o se auala, pe taumafai foi e faia ni isi gaioiga e faalavelave ai i molimau a le malo.

 

O lo o tuuaia faatasi Asenati, Faasoosoo ma Hanipale i le mataupu fou lenei, ma ua faamoemoe o le itula e 1:30 i le aoauli o le aso e faataunuu ai le iloiloga autu a Hanipale i luma o le faamasinoga faaitumalo, lea o le a iloilo ai e le faamasinoga mau a le malo, pe lava ma totoe e lagolago ai tuuaiga fou faasaga ia Hanipale, lea ua tuuaia faatasi ma lona toalua o Asenati i moliaga o le faalavelave i molimau a le malo, atoa ai ma le taumafai e ufiufi se solitulafono.

 

O lo o taofia pea Hanipale i le toese e faatali ai taualumaga o lana faamasinoga o lo o faagasolo i le taimi nei.

 

MOLIA I LE AVE TA’AVALE A’O SE’I LONA LAISENE

 

O le ali’i e 42 tausaga le matua lea o lo o se’i e le faamasinoga lana laisene mo le 6 masina, e mafua mai ina ua faamaonia e le faamasinoga le moliaga o le ave ta’avale ‘ona sa tuuaia ai o ia i le masina na te’a atu nei, ua molia nei i le moliaga mamafa o le ave ta’avale a’o se’i lona laisene.

 

O tuuaiga faasaga ia Latu Finau na afua mai ina ua taofia e leoleo lana taavale i le vaiaso na te’a nei ona o le alu saoasaoa, ae maua ane ai o lana laisene o lo o se’i mo le ono masina.

 

I le aso na lau ai le faasalaga a Finau i luma o le faamasinoga faaitumalo i le masina o Me, sa fautuaina ai o ia e le alii faamasino ia John Ward II e faapea, e le mafai ona ia toe faafoeina se taavale i totonu o le ono masina lea ua se’i ai lona laisene.

 

Ae a maua o ia ma tuuaia e le malo i le ave taavale a’o se’i lona laisene, ae faamaonia e le faamasinoga, o le a mafai ona faasala o ia i se faasalaga faa falepuipui e le sili atu i le lima tausaga le umi, ae faamalosia ai le tuli o aso e 90 i le toese e pei ona faamalosi mai e le tulafono.

 

Na teena e Finau tuuaiga faasaga ia te ia, ma ua faatulaga ai loa le isi ana iloiloga e faia i totonu o le isi fa vaiaso, ma o lo o tumau pea tuutuuga o lo o tatala ai o ia i tua mai le toese, e aofia ai le faasa ona ia toe aveina se taavale i le taimi nei, sei vagana ua toe tuuina atu se isi poloaiga a le faamasinoga.

 

KAILI TUALAU

 

O le taeao a taeao lea ua fa’atulaga ai le iloiloga faapitoa a se alii pagota, ua silia i le lima tausaga o taofia i le toese i Tafuna e aunoa ma le iloiloina o lana fa’asalaga o lo o tuli i le taimi nei, se’i iloilo le tulaga ua i ai lana faasalaga sa tuuina atu e le faamasinoga ia Tesema 2009.

 

O Kaili Tualau o lo o tuli sana faasalaga faa falepuipui e 5 tausaga, ina ua ta’usala o ia e se vaega iloilo iuga i le masina o Aokuso 2009 i moliaga mamafa e lua o lona umia faasolitulafono o mariuana, atoa ai ma lona umia faasolitulafono o le pauta oona o le aisa ma le faamoemoe e tulei ma faatau atu i isi tagata.

 

O le masina o Setema 2008 na amata taofia mai ai Tualau i le toese, ina ua osofaia e leoleo lona fale i Nuuuli ma maua i ai fualaau faasaina e pei ona ta’usala ai o ia e le vaega iloilo iuga.

 

Ina ua fofogaina e le faamasinoga lana faaiuga mo Tualau i le 2009, sa poloaina ai le taofia o ia i le toese mo le umi e lima tausaga, a maea, ona ia tuua lea o le teritori ae toe foi atu i lona atunuu ma aumau ai mo le umi e 20 tausaga o lana nofovaavaaia.

 

O le faasalaga faa falepuipui a Tualau na tuuina atu i le 2009, sa aofia ai ma masina sa loka ai o ia talu mai Setema 2008.

Comment Here