Tala otooto o Fa’amasinoga

FALEPUIPUI I LE GAOI MA TALEPE FALE MO LE 15 TAUSAGA

 

O le alii e 21 tausaga le matua lea foi ua toe ta’usala e le faamasinoga i moliaga o le talepe fale ma le gaoi, ua poloaina e le faamasinga maualuga ina ia faa falepuipui o ia mo le 15 tausaga, i le maea ai lea ona ia ioeina o moliaga mamafa e tolu e aofia ai le talepe fale i le tulaga muamua, gaoi atoa ai ma le tete’e atu i leoleo a’o taumafai e pu’e faapagota o ia.

 

Na faatoese le alii o Logotaeao Amituana’i i le faamasinoga e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i lona aiga.

 

Ae na taua e le alii faamasino sili ia Michael Kruse e faapea, e le malamalama le faamasinoga po o le a le isi avanoa lea ua talosaga atu ai Amituana’i i le fa’amasinoga, ae o lea fo’i sa tuu atu muamua i ai e le faamasinoga le avanoa ia te ia.

 

Saunoa Kruse e faapea, a’o tuli le faasalaga faa falepuipui a Amituana’i i le toese i Tafuna, ina ua ta’usala o ia i le solitulafono mamafa o le talepe fale, e mafua mai i le faalavelave lea na ia osofaia ai le Pamu Kesi o le Tripple S i Tafuna, sa faia se fautuaga a le Ofisa Nofovaavaaia ina ia tatala o ia i tua mai le toese ae faaauau ai pea ona nofovaavaaia i luma o le faamasinoga maualuga, peitai e le’i umi lava ona tatala le ua molia i tua ae ona osofaia loa le kamupani a le Harthorne Machinery of Samoa i Tafuna.

 

“O le manatu o le fa’amasinoga, ana matou le tatalaina Amituana’i i tua atonu na te le osofaia le kamupani a le Harthorne i Tafuna,” o le saunoaga lea a Kruse.

 

Na finau le loia a Amituana’i ia Douglas Fiaui i le faamasinoga, ina ia faa falepuipui le ua molia mo le 5 tausaga, ona e le o se taimi muamua lea ua ta’usala ai o ia i ituaiga solitulafono nei, ma o lea talosaga na lagolago i ai le loia a le malo.

 

Mo le solitulafono o le talepe fale i le tulaga muamua, e 15 tausaga ua faasala ai le ua molia i le toese, mo le solitulafono o le gaoi, e 7 tausaga ua faasala ai o ia i le toese, ma le solitulafono o le tetee atu i leoleo a’o taumafai e pu’e faapagota o ia, e 5 tausaga e faasala ai o ia i le toese, ma o nei faasalaga uma e tuli faatasi, lona uiga e 15 tausaga o le a loka ai o ia i le toese i Tafuna.

 

Na taua e Kruse ia Amituana’i e faapea, o lana faasalaga ua tuu atu e le faamasinoga, o lo o faavae mai lea i le talaaga o lona olaga, ina ua manatu le faamasinoga, e leai se mea o le a toe nofovaavaaia ai o ia, na te lei aoaoina lava se lesona mai lana solitulafono muamua.

 

FALEPUIPUI TAPENI PIO MO LE 28 MASINA

 

O le alii e 19 tausaga le matua lea na fai’aiga ma se teineititi e 14 tausaga le matua ma i’u ina ma’itaga ai lea tamaitai ma ia fanauina ai se pepe tama, ua poloaina e le faamasinoga ina ia taofia o ia i le toese mo le 28 masina, o se tasi lea o tuutuuga o lana nofovaavaaia e 7 tausaga.

 

E fa moliaga mamafa na ulua’i tuuaia ai e le malo le alii o Tapeni Pio, ae i lalo o se maliliega na sainia e le ua molia ma le malo ma talia fo’i e le faamasinoga maualuga, sa ia tali ioe ai i moliaga feololo e lua o le faia lea o amioga mataga faafeusuaiga ma se tama’ita’i e laititi i lalo o le tulafono, ae solofua e le malo moliaga e lua pito sili ona mamafa, o le faiaiga lea ma se teineititi e laititi i lalo o le tulafono atoa ai ma le fai i ai o amioga faasotoma.

 

Na faatoese Pio i luma o le faamasinoga e tusa ai o lana solitulafono sa faia, ma ia talosaga ai se isi avanoa mo ia se’i toe fo’i atu ai i lona aiga.

 

Sa ia faatoese foi i le aiga o le tama’ita’i na aafia, faapea ai ona matua, nuu ma le ekalesia ina ia faamagalo ao ia ona o se sese sa ia faia, ua mafua ai ona ta’u valea le igoa o lona aiga.

 

E ui na finau le alii loia ia Michael White i le faamasinoga mo se faasalaga nofovaavaaia, peitai na finau le loia a le malo ia Tony Graf ina ia faa falepuipiu Pio mo le lua tausaga, ona o le matuia o le solitulafono sa ai faia.

 

Na taua e le alii faamasino sili ia Michael Kruse e faapea, o le mea sa tupu ua mafua ai ona nofosala Pio i luma o le faamasinoga, ona o se la mafutaga faaleuo sa faia ma se tamaitai e 14 tausaga le matua, lea na i’u ina ma’itaga ma fanau ai e lea tamaita’i se pepe, ma ua maea foi ona tautino le ua molia i le Ofisa Nofovaavaaia, o ia le tama moni o le pepe, ua manao fo’i e alu e saili sana galuega e faatino ai lona tiute faa tama i le tausiga o lona atalii.

 

Na talia e le faamasinoga le talsoaga a Pio ma poloaina ai loa o ia e faapea, a maea ona ia tuliina ulua’i masina e ono o lana faasalaga faa falepuipui e 28 masina, ona talosaga lea i le Pule o le Toese mo se avanoa e tatala ai o ia i tua e faigaluega, pe afai e faamaonia ua maua sana galuega tumau e faigaluega ai, e sue ai se tupe e faatino ai lana polomisi sa fai i le Ofisa Nofovaavaaia, mo se tupe e tausi ai lona atalii.

 

Ua poloaina fo’i Pio ina ia lesitala lona igoa i le lisi o i latou ua ta’usala i le faia o uiga mataga i fanau teine laiti, ma ia faia se suesuega i lona tino po o ia tauaveina siama o le gasegase o le HIV.

Comment Here