Ads by Google Ads by Google

Tala otooto o Fa’amasinoga

TU’UAIA LUALEMAGA MA KAPPEL AVE TA’AVALE ‘ONA

 

O ananafi na tutula’i ai i luma o le fa’amasinoga fa’aitumalo le Kovana o le Falelima i Sisifo, le afioga a Lualemaga Edward Faoa ma le loia fautua a le Fono Faitulafono ia Henry Kappel, ona o tu’uaiga i lo la fa’afoeina o ni ta’avale a’o la tagofia le ava malosi.

 

Na atagia i fa’amaumauga a le fa’amasinoga le tatala i tua o Lualemaga ma Kappel i le faaiuga o le vaiaso na te’a, ina ua la totogi le vaega tupe na faatulaga e le faamasinoga e tatala ai i laua i tua, e faatalitali ai le taimi e tutula’i ai i luma o le faamasinoga.

 

O le alii loia ia Tala Uiagalelei o lo o avea ma loia fautua mo Lualemaga, ae o le alii loia ia David Vargas o lo o tula’i mo Kappel, ma ua tolopo le iloiloina o le la mataupu i le isi tolu vaiaso, ma o lo o tumau pea poloaiga o lo o tatala ai i laua i tua e faatali ai le aso lea ua faatulaga la te toe tutula’i ai i luma o le fa’amasinoga faaitumalo.

 

O le afioga i le ali’i fa’amasino ia Elvis P. Patea na taulimaina le mataupu a Lualemaga ma Kappel ananafi, ona o le aso Tofi na te’a nei na tuua ai e le alii faamasino ia John Ward II le atunuu mo ni isi o fonotaga i fafo.

 

TO’ALUA TAGATA FAIGALUEGA MOLIA GAOI MA LE FAIA O FAAMAUMAUGA SESE

 

E to’alua ni tagata faigaluega a le Matagaluega o le Soifua Maloloina a le malo ua tuuaia i moliaga mamafa e lua o le gaoi, atoa ai ma le faia o faamaumauga tau faasese.

 

O tuuaiga faasaga ia Taufau Maxine Sagale ma Sieni Paopao Ioapo, na afua mai i le faalavelave lea o lo o tuuaia ai i le tusi e le isi o se siaki ma teu i totonu o le teugatupe a le isi o i laua.

 

O le mataupu lenei na tofu atu i le Vaega o Leoleo Su’esu’e a le Ofisa o Leoleo a le malo, ina ua logo e le Ofisa o le Tupe se faaletonu i faamaumauga a le Ofisa o le Soifua Maloloina, ina ua maua e i ai se siaki e totogi ai se tagata faigaluega e faalua ona maua i faamaumauga a le faletupe, ma tofia ai loa le alii Leoleo Suesue ia Foma’i Paepule na te suesueina lenei mataupu.

 

O lo o manino i faamaumauga a le faamasinoga e faapea, o se siaki o  lo o masalomia na tusia e se tagata o lo o i ai le aofa’iga e $2,400, sa teuina lea i totonu o le teugatupe a Ioapo.

 

Na taua i faamaumauga a le faamasinoga e faapea, mai siaki e lua sa maua e faalua ona faamau i faamaumauga a le faletupe, o le siaki muamua e $131.02 le aofa’i o le tupe o lo o i ai, ma le siaki lona lua e $2,400 le aofa’i o le tupe o lo o i ai, ma o le siaki lea e lei fa’atagaina mai i totonu o siaki sa tuuina atu i le ‘payroll’ a le malo.

 

Na taua e Ioapo i leoleo ina ua ia fesiligia o ia e uiga i lenei mataupu, sa ia iloaina le mea ua tupu ina ua ia vaaia faamaumauga a le ofisa, ona o le taimi lea sa matua ia mana’omia ai se tupe e totogi ai le pili a lana tama i le aoga.

 

Na faamaonia fo’i e Ioapo i leoleo e faapea, o le tamaitai la te faigaluega faatasi ia Sagale na fesoaosani ia te ia i le faatinoina o le gaioiga atoa lenei, ma ina ua ia iloaina ua maea ona teu le siaki i totonu o lana teugatupe, sa fai loa ia Sagale la te o e tala mai i tua se tupe, lea na ia tala ai loa le $200 ma tuu atu le $100 ia Sagale.

 

Ae na taua e Sagale i leoleo e faapea, ina ua alu atu Ioapo ma fai atu ia te ia i se tupe, sa fai i ai e leai sana tupe o i ai, ae na te iloa le auala e mafai ai ona maua sina tupe mo ia. Na taua foi e Sagale i leoleo e faapea, sa fai ia Ioapa, e mafai ona ia fesoasoani atu ia te ia i lana mataupu, ae na o le faatasi lava le taimi e mafai ai ona ia faia, ona sa maua ai fo’i o ia i le taimi na ia faia ai lea auala, ma e o o mai lava i le taimi nei o lo o tipi le ta’i $250 mai lana siaki mo le toe totogiina o le tupe sa ia faaaogaina i se auala sese.

 

Na taua fo’i e Sagale e faapea, pe a ma le $12,000 sa ia teuina i lana teugatupe ina ua ia faia le auala lea i le taimi muamua, ae ina ua maua o ia, sa ia totogiina le $5,000, ma le vaega o lo o totoe ai o lo o faaauau pea ona ia totogiinai le taimi nei.

 

E ta’i $10,000 lea ua fa’atulaga e le fa’amasinoga e totogi ona fa’atoa mafai lea ona tatala i laua i tua mai le toese i Tafuna, e fa’atalitali ai taualumaga o a la mataupu.

 

MICHAEL TOLMIE

 

O le alii lea o lo o tuuaia i lona faaaoga faasolitulafono o tupe a le kamupani sa faigaluega muamua ai, ua ia talosaga i le faamasinoga maualuga e faatulaga loa se aso e faia ai lana faamasinoga autu.

 

O Michael Tolmie o lo o tuuaia i lona faaaoga faasolitulafono o tupe a le kamupani sa galue ai o le New Dimension Corporation e lata i le $3,000, i le va o le 2009 ma le 2010.

 

O lo o tuuaia e le malo Tolmie i lona faaaoga lea o tupe a le kamupani i mea e le fesootagai ma galuega a le kamupani, mo se faataitaiga, fai mai le malo e lata i le $3,000 na faaaoga e totogi ai oka sa faia i Fale’aiga, Fale Talimalo ma Fale Kalapu i Samoa.

 

O lo o tumau pea poloaiga o lo o tatala ai Tolmie i tua ina ua ia totogi le $7,500 e faatali ai le aso e valaau ai lana faamasinoga autu, lea ua faatulaga i le aso 20 Me, 2014, po o le aso 20 Oketopa, 2014.