Tala otooto o Fa’amasinoga

LOKA SIAEA MO LE 28 MASINA

 

O le alii talavou lea na molia i lona pikina mai o se teineititi aoga ma ave i se nofoaga la te faiaiga ai, ua faa falepuipui e le faamasinoga maualuga mo le 28 masina i le toese i Tafuna, o se tasi lea o tuutuuga o lana nofovaavaavia e 7 tausaga.

 

E lua moliaga mamafa na ta’usala ai Siaea Utoaluga e le faamasinoga maualuga, ina ua talia e le faamasinoga se maliliega na sainia e le ua molia ma le malo i le masina o Iulai, ma o ia moliaga e aofia ai lona faia o uiga mataga faafeusuaiga atoa ai ma le tagofia o itutinosa o se tamaitai e talavou i lalo o le tulafono.

 

Na faatoese le ua molia i le faamasinoga e tusa ai o lana solitulafono sa faia, ma ia talosagaina ai se faamagaloga mo ia. Sa ia faatoese foi i ona matua faapea ai le aiga o le tamaitai na aafia, ina ia faamagalo o ia.

 

Na tautino Siaea e faapea, o masina e ono sa taofia ai o ia i le toese, sa ia aoaoina ai se lesona taua mo lona olaga, ma ua ia lagona ai le salamo moni e tusa ai o le solitulafono sa ia faia.

 

Na talosaga le tama o le ua molia i le faamasinoga mo se avanoa e tatala atu ai lona atalii e saili sana galuega, e fesoasoani ai i le atina’eina o le aiga. Na taua e le tama e faapea, e tiga lava ona aoao e matua fanau ia ola usita’i, peitai e le taitai lagona e fanau manatu o lo o lagona e matua, o le mafuaaga foi lena o le tutupu o mea faapenei o olaga o fanau.

 

Ae i le faafinauga a le alii loia ia Tory Graf na tula’i mo le itu a le malo, sa ia taua ai le matuia o le gaioiga a Siaea sa fai, o lona alu lea i taeao e piki mai le teineititi na aafia i le taimi e usu ai i le aoga, ona la o lea la te faiaiga i se isi nofoaga.

 

Na taua e Graf i le faamasinoga e faapea, e silia i le faa sefulu ona faiaiga Siaea ma le tamaitai na aafia.

 

E 7 tausaga na manatu le faamasinoga e loka ai le ua molia, peitai ua faamalumalu lona tuliina o lea faasalaga, ae ua nofovaavaaia o ia mo le 7 tausaga i lalo o poloaiga a le faamasinoga.

 

O se tasi o poloaiga e aofia ai lona tuliina o masina e 28 i le toese, faasa ona toe taumafai e faafesootai le tamaitai na aafia, a ia lesitala lona igoa i le lisi o tagata ua tausala i le faia o uiga mataga i tamaitai laiti, ma ia faia se suega i lona tino po o ia tauaveina le siama o le faamai o le HIV.

 

FINAU LE MALO E FA’AFO’I MELVIN GO I LONA ATUNUU

 

Ua talosagaina e le loia a le malo ia Camille Phillipe le Faamasinoga Maualuga i le taeao ananafi, ina ia faia sana poloaina e tuua ai e le alii o Melvin Go le teritori ma aumau ai i fafo atu o le atunuu mo le isi tausaga o lana nofovaavaaia, e faatali ai le taimi e valaau ai lana Fono i luma o le Komiti Faafoe o le Ofisa o Femalagaaiga mo lona pepa nofomau.

 

O Melvin na tausala e le faamasinoga i le moliaga o le faaoolima ma faatulaga ai loa le lauina o lona faasalaga ananafi, ae talu ai o lo o fia maua e le faamasinoga se ripoti mai le Ofisa o Femalagaaiga i le tulaga ua i ai pepa nofomau a le ua molia, ua toe tolopo ai lenei mataupu i le taeoa nei, lea o le a molimau ai se sui o le Ofisa o Femalagaaiga i luma o le faamasinoga e faatatau i lenei mataupu.

 

Na faatoese Melvin i le faamasinoga e tusa ai o lana solitulafono sa faia, sa ia faatoese foi i lona aiga ina ia faamagalo o ia.

 

Na finau le loia a Melvin ia Douglas Fiaui i le faamasinoga ina ia nofovaavaaia le ua molia, ae ua lava aso e 193 lea ua maea ona ia tuliina i le toese e fai ma ana faasalaga i lenei mataupu.

 

Na lagolago e le loia a le malo le talosaga a Fiaui ina ia nofovaavaaia le ua molia, faatasi ai ma lana talosaga, ia nofovaavaaia le ua molia mo le lua tausaga i lalo o se poloaiga a le faamasinoga, e poloa’i ai o ia e nofo i fafo atu o le atunuu mo le lua tausaga, e faatali ai le taimi e valaau ai lana fono i luma o le Komiti o le Ofisa o Femalagaaiga, ona o lo o manino le tulafono o Femalagaaiga, e le tatau ona i ai i le atunuu le tagata mai fafo o lo o faatali le taimi e valaau ai lana fono, sei vagana ua o o i le taimi e valaau ai le fono ona faatoa i ai lea i le teritori.

 

Saunoa le afioga i le alii faamasino sili lagolago ia Lyle L. Richmond e faapea, talu ai e manaomia se faamaninoga mai se sui o le Ofisa o Femalagaaiga e faatatau i le mataupu lenei, o le a tolopo ai le lauina o le faasalaga a Melvin i le taeao nei, ae sei aami se sui o le Ofisa o Femalagaaiga na te faamalamalama i le faamasinoga tulaga o pepa nofomau a le ua molia.

 

O lo o taofia pea i le toese Melvin e faatali ai le taimi e toe tulai ai i luma o le faamasinoga i le taeao nei.

Comment Here