Tala otooto o Fa’amasinoga

FALEPUIPUI ULU TA’ATIA MO LE 20 MASINA

 

O le alii lea na ta’usala e le Fa’amasinoga Maualuga i le masina na te’a nei i le solitulafono o le fa’ao’olima i le tulaga lua, ua poloaina e le faamasinoga ina ia lokaina i le toese mo le 20 masina, o se tasi lea o tuutuuga o lana nofovaavaaia e 5 tausaga.

 

A’o le’i tuuina atu le fa’asalaga a le faamasinoga maualuga mo Ulu Ta’atia i le aso Faraile na te’a nei, na fa’amatala e ni isi o lona aiga i luma o le fa’amasinoga, o Ulu o se tama kerisiano, e alofa i lona toalua ma lana fanau laiti e to’alua, e tautua aiga ma loto maualalo, ae le iloa pe na mafua aisea le faalavelave e pei ona faasala ai nei o ia e le faamasinoga.

 

Na faatoese Ulu i luma o le faamasinoga, faapea ai lona aiga ma le aiga o le fafine na aafia e tusa ai o sona sese, ma ia talosagaina ai i latou ina ia faamagalo o ia.

 

Na faaaoga e Ulu mau mai le Tusi Paia e lagolagoina ai lana tautinoga i le faamasinoga, o ia ua salamo moni e tusa ai o lana solitulafono. Sa ia taua fo’i e faapea, afai e salamo se tagata se to’atasi, e fiafia ai agelu uma o le lagi ina ua salamo le tagata agasala e pei o ia ma liliu ese mai i lana solitulafono.

 

Na taua e se sui o le aiga o Ulu e faapea, o lo o nenefu pea le latou aiga i le mafuaaga o lenei faalavelave, ona e le faapea le ituaiga tagata e i ai Ulu.

 

Na taua e le molimau e faapea, o le aiga o Ulu faapea ai le aiga o le fafine na aafia, e nonofo faatasi i le fanua a lona aiga i Alofau, e le’i i ai fo’i laua ma lona to’alua i le atunuu i le taimi na tula’i mai ai le faalavelave e pei ona faaoolima ai Ulu i le fafine na aafia, e mafua mai ina ua fasi e le fafine le atalii a Ulu.

 

Na faaiu le molimau a le sui o le aiga i lona talosagaina o le fa’amasinoga, ina ia tatala Ulu i tua e faigaluega e tausi lona aiga, ae lava na o se salatupe e faasala ai o ia.

 

Na lagolagoina e le loia a le malo ia Tony Graf le talosaga a le loia a Ulu ia Michael White, e nofovaavaaia le ua molia ae ua lava masina e 6 talu ona loka o ia i le falepuipui e fai ma ona faasalaga i lenei mataupu.

 

E 5 tausaga na manatu le faamasinoga e faasala ai Ulu, peitai ua faamalumalu lona tuliina o lea faasalaga, ae ua nofovaavaaia o ia mo le 5 tausaga i lalo o poloaiga a le faamasinoga.

 

O ni isi o poloaiga a le faamasinoga e aofia ai lona tuliina o masina e 20 i le toese ma ia aua ne’i ona toe solia se tulafono.

 

Talu ai e le o lelei le ID nofomau a Ulu, ua fautuaina ai o ia e le faamasinoga ina ia faafou lona ID i se taimi vave lava, ma afai e vave ona faafou lona ID nofomau, ona tatala loa lea o ia i tua tusa lava pe le uma ona ia tuliina masina e 20 i le toese.

 

NOFOVAAVAAIA TOM SEIGAFO MO LE 12 MASINA

 

O le ali’i lea na ta’usala i le solitulafono mama o le faaleaga meatotino i le tulaga lua atoa ai ma le faatupu vevesi i nofoaga faitele, ona o le faalavelave lea na ia tu’iina le tioata o le ta’avale a le tuagane a lona to’alua, ua nofovaavaaia mo le umi e 12 masina i lalo o poloaiga a le faamasinoga e ao ona usita’i i ai.

 

O ni isi o poloaiga ua tuuina atu e le faamasinoga faaitumalo ia Tom Seigafo e aofia ai lona totogiina o le tau o le tioata sa ia faaleagaina, faasa ona ia toe tagofia le ava malosi, faasa foi ona ia toe soliina se tulafono, a ia auai i ni aoaoga e fesoasoani ai i le faafitauli o le ita o lo o aafia ai o ia.

 

O ia poloaina na tuuina atu e le faamasinoga ia Seigafo, ina ua talia e le faamasinoga le faatoesega a le ua molia atoa ai ma talosaga a loia, ina ia nofovaavaaia le ua molia.

 

Na taua e le loia a le ua molia e faapea, ua maea ona toe teuteu le vevesi na tulai mai i le va o Seigafo ma le tuagane a lona toalua, ua toe sologa lelei foi le mafutaga a le aiga i le taimi nei.

 

Na faailoa e le faamasinoga ia Seigafo e faapea, afai na te le usitaia poloaiga ua tuuina atu ia te ia ma ia toe tagofia ai le ava malosi, e feololo le vevesi na tulai mai muamua i se isi vevesi e toe tula’i mai mulimuli, e le iloa pe te’i ua ma’imau ai ma se soifua o se tasi.

 

“Tuu lou tago i le ava e le o se uo lelei lena mo te ia,” o le fautuaga malosi lea a le faamasinoga na tuuina atu ia Seigafo.

 

TETE’E FANOLUA LEVI I TU’UAIGA A LE MALO

 

Ua teena e le alii o Fanolua Levi tuuaiga a le malo faasaga ia te ia, ina ua tulai i luma o le faamasinoga maualuga i le vaiaso na tea nei.

 

I le tete’e ai o Levi i le moliaga mamafa o le faaoolima i le tulaga lua, ua faatulaga ai lana ulua’i iloiloga e faia lea i le aso 25 Oketopa, lea o le a iloa ai pe tuuina atu lana mataupu e faataunuu sona faamasinoga autu, po o le sainia foi o se latou maliliega ma le malo ma faamuta ai lana mataupu.

 

O tuuaiga faasaga ia Levi na afua mai i le faalavelave lea na tulai mai i le masina na te’a nei i Tafuna, lea na ia faaaoga ai se fagupi e ta ai le ulu o se alii na alu atu ma faatupu vevesi atu i lo latou aiga.

 

I faamaumauga a le faamasinoga o lo o taua ai e faapea, e faalogo mai Levi o lo o inupia ma lona uso laititi i tua o le umukuka, o lo o tau upu atu lona to’alua ma se isi tagata. Na savali mai le ua molia i luma o le fale ma ia vaaia ai le alii na aafia ma lona to’alua o lo o tau upu atu ma lona tuafafine.

 

E le’i ma’imauina se taimi e su’esu’e ai e Levi le mea o lo o tupu, ae na savali atu loa ma le fagupia o lo o uu i lona lima ma ta ai le ulu o le alii na aafia ma ta’e ai, ae ina ua vaaia e Levi ua palasi le alii na aafia i lalo, na vave lona toe tago ma taumafai e faatu mai i luga ina ne’i tula’i mai ai se isi faalavelave e sili atu ona matuia.

 

O lo o taofia pea i le toese Levi e faatali ai le aso lea ua faatulaga e toe tulai ai i luma o le faamasinoga maualuga.

 

Comment Here