Tala otooto o Fa’amasinoga

MOLIA PELENISE TAALA I LE AVE TA’AVALE ‘ONA

 

O ananafi na tula’i ai i luma o le Faamasinoga Faaitumalo le ave taavale o le Toyota 4runner lanu moana lea na lavea i Pava’ia’i ma maliu ai se alii talavou, i le taeao o le Aso Toonai na te’a nei, ina ua faila e le malo le moliaga o le ave ta’avale ‘ona.

 

E ui o lea ua molia Perenise Taala i le moliaga mama o le ave ta’avale ‘ona, peitai na taua e le loia a le malo e faapea, o le a mafai ona faila e le malo moliaga faaopoopo faasaga ia Taala i se taimi o lenei vaiaso, pe a mae’a lelei suesuega a leoleo o lo o faagasolo i lenei mataupu.

 

Na taua e ni tagata sa i ai i le taimi o le faalavelave i leoleo e faapea, o le taavale na aga’i atu i le a’ega i Aoloau i le taimi ma taia ai le pito i tua i se pou moli.

 

O le moliaga o le ave ta’avale ‘ona, afai ae ta’usala ai se tasi e le faamasinoga, e mafai ona faasala i le toese mo le umi e le silia i le tausaga atoa, pe faasala foi i le salatupe e le silia i le $1,000, po o le faasala fo’i i faasalaga uma ia e lua.

 

MOLIA SE ALII PAGOTA I LE FAATUPU VEVESI

 

O le alii pagota lea na masalomia i lona faaaoga o se telefoni e vili ai se tama’ita’i ua molia nei e le malo i le solitulafono mama o le faatupu vevesi i nofoaga faitele.

 

O ananafi na tula’i ai i luma o le Faamasinoga Faaitumalo le alii o Sopa Siagigi ma ia teena ai tuuaiga faasaga ia te ia, ma ua toe tolopo lana iloiloga e toe fofogaina i le faaiuga o le masina nei.

 

I faamaumauga a le faamasinoga o lo o taua ai e faapea, o le mataupu lenei na tofu atu i le Ofisa o Leoleo i Tafuna, ina ua faila e le aiga o le tamaitai na aafia sa latou faasea i leoleo, faasaga ia Siagigi i lona vili vili so’o atu i le latou telefoni ma mana’o e fia talanoa i le tama’ita’i o lo o aafia.

 

E tusa ai ma faamatalaga na tuuina atu e le aiga i leoleo, o le uso matua o le tamaitai na aafia na ia avea le telefoni ia Siagigi i totonu o le toese, ina ia mafai ai ona vili atu le alii pagota i le numera a lona uso laititi la te talanoa ai, ae ina ua iloa e le tamaitai matua ua le toe talanoa atu le alii pagota ia te ia ae ua amata ona vili vili atu ma talatalanoa ma lona uso laititi, o lea na ia faafesootai ai loa le Ofisa o Leoleo ma faailoa i ai le mataupu.

 

O le Aso Tofi na te’a nei na aami ai e leoleo le tamaitai na aafia mo se latou talanoaga, ae vili atu Siagigi a’o ia talanoa ma Leoleo, ma maua ai loa le avanoa o le isi tamaitai leoleo na te fesiligia ai le tagata o lo o vili atu i le telefoni po o ai o ia, ae tali le tagata o ia o ‘Sopa’.

 

O le taimi lava lea na faafesootai ai loa e leoleo le pule o le toese i Tafuna, ina ia saili le potu o lo o loka ai Siagigi ona o lea e vili vili atu i le tamaitai o lo o latou fesiligia.

 

Na saili e leoleo o le toese le potu o lo o loka ai Siagigi peitai e le’i maua i ai se telefoni, ae ina ua tatala uma ese laei o le ua molia, na tago ai loa Siagigi ma aumai le telefoni sa nana i totonu o lona ofu laititi sa fai (tulou), ona ia togi lea o le telefoni i lalo ma malepe ai.

 

O le ita o Siagigi i le pule o le falepuipui na palauvale ai ma ia folafola i ai lona fasiotia o ia ma lona aiga pe afai e magalo atu i tua.

 

Na taua fo’i le lafo e le ua molia o upu mataga e faamaasiasi ai le pule o le toese atoa ai ma lona aiga.

 

O lo o taofia pea Siagigi i le toese mo le tuliina o lona faasalaga faafalepuipui, e faatali ai le aso lea ua faatulaga e toe tulai ai i luma o le faamasinoga.

 

FA’AI’U I LE FALEPUIPUI LE MAFUAGA A SE TAMALOA MA LANA TAMA’I TEINE

 

O le tamaloa mai Nuuuli lea na maua atu e lona afafine e 9 tausaga o lo o momoe telenoa (tulou) mai ma lana tama’i teine i totonu o le la potu ma lona to’alua, na taofia uma e leoleo i le toese i Tafuna i le faaiuga o le vaiaso na te’a nei faatasi ai ma le to’alua, ina ua tula’i mai se vevesi i le va o le ulugalii e mafua mai o le tama’i teine a le tamaloa.

 

O ananafi na tutula’i uma ai le ulugalii ma le teine a le tamaloa i le faamasinoga faaitumalo ma latou teena ai tuuaiga o le faia lea o gaioiga e save’u ai le nonofo filemu o tagata i totonu o le aiga.

 

O le mataupu lenei na tofu atu i le ofisa o leoleo i Tafuna, ina ua logo e ni aiga tuai le ofisa o leoleo mo se fesoasoani, ina ua leoleoa le misa a le ulugalii ma tau le maua ai se nofo filemu o tagata tuaoi.

 

I faamaumauga a le faamasinoga o lo o taua ai e faapea, na alu atu le afafine o le tamaloa e 9 tausaga e aumai ona ofu lotu i le taeao o le aso Sa na te’a nei mai totonu o le potu a ona matua, ae tei ina ua tatala atu le potu o lo o momoe mai ai lona tama ma se tamaitai e leai uma ni lavalava o fai.

 

Na toe fo’i le teineititi ma ta’u i lona tina o lo o moe i le fale a ona matua le mea ua tupu, ma alu atu ai loa le fafine ma se fasi paipa u’amea ma sasa ai lona toalua ma lana tama’i teine, ma manu’a ai le ulu o le tamaloa ina ua oso atu ma taumafai e pupuni lana teine mai le manu’a i gaioiga a lona to’alua.

 

Na fai fai tetele le vevesi ma i’u ina fasi ai loa e le tamaloa lona to’alua, ma o lo o i ai le fuafuaga a le malo, o se taimi o le vaiaso nei latou te faila ai moliaga faaopoopo faasaga i le ulugalii ona o le faalavelave na tulai mai.

 

O moliaga faaopoopo faasaga i le tamaloa e aofia ai lona faia o sauaga faasaga i lona to’alua, a o le fafine o lo o faamoemoe e molia i le faaoolima i lona faaaogaina o le fasi paipa e faaoo ai manu’a i lona to’alua.

Comment Here