TUUAIA SINAVE TUPUOLA I LE FAAOOLIMA

O le vaiaso na tea nei na faila ai e le malo moliaga faaopoopo o le faaoolima i le tulaga lua faasaga ia Sinave Tupuola, ona o le faalavelave lea na tula’i mai i le aso 8 Fepuari, lea na manu’a ai se isi alii ina ua ia faaoolima i ai.

I faamaumauga a le faamasinoga o lo o taua ai e faapea, sa manao Tupuola i sana nonofgatupe e $300 mai le alii na manu’a, peitai e na o le $200 sa mafai ona maua atu. O le ita o le ua molia ina ua le maua atoa atu le tupe sa mana’o ai, na ia tago ai i le fagupia a le alii na aafia ma toe ta ai lona ulu ma manu’a ai.

Ina ua maea le faalavelave, sa fusi e le alii na manu’a lona ulu i lona mitiafu ma alu sa’o loa i le Ofisa o Leoleo i Leone ma faaulu ai lana tagi faasaga ia Tupuola. E toalua isi molimau na la faamaonia i leoleo le faalavelave sa tupu.

E $5,000 lea ua faatulaga e le faamasinoga e tatala ai Tupuola i tua mai le toese, ma ua faamoemoe o le vaiaso nei e toe valaau ai lana mataupu i luma o le faamasinoga faaitumalo, mo le faatulagaina o le aso e faia ai lana ulua’i iloiloga.

TETE’E SEFO MA DEREK I TUUAIGA FAASAGA IA TE I LAUA

Ua teena e alii pagota e toalua o lo o tuuaia i le sosola i tua ma le toese tuuaiga a le malo faasaga ia te i laua, ina ua la tutula’i i luma o le faamasinoga maualuga i le vaiaso na tea nei.

O le teena ai e Sefo Lemalu ma Derek Ropati o moliaga taitasi o le sosola ese lea ma le toese, ua faatulaga ai loa le la uluai iloiloga e faia i le masina fou.

O le aso 31 Me 2011 o lo o tuuaia e le malo na sosola ai i tua mai le falepuipui i Tafuna Sefo ma Derek, ao tuli ai ni a laua faasalaga faafalepuipui.

MOLIA SE ALII FUIMU I LE FAAOOLIMA MA LE FAALEAGA MEATOTINO

O le alii Fuimu lea o lo o tuuaia i lona togiina o se maa i se taavale ma manu’a ai se isi tagata, ua molia e le malo i le solitulafono o le faaoolima i le tulaga lua, faaleaga meatotino i le tulaga muamua, atoa ai ma le faatupu vevesi i nofoaga faitele.

O le vaiaso na tea nei na tulai ai i luma o le faamasinoga faaitumalo le alii o Falealo Savea Mauga, ma faatulaga ai loa e le faamasinoga le $5,000 e tatala ai o ia i tua e faatalitali ai taualumaga o lona faamasinoga.

Na taua e se molimau le togi e le ua molia o se maa aga’i i se taavale, ao i ai se tina ma se tamaititi i totonu o le taavale. Fai mai faamaumauga a le faamasinoga, o le maa lea na togi e le ua molia, na manu’a ai le na aafia i lona tino ma ona foliga.

Sa faapea foi ona faaleagaina ai ma le taavale i le maa lava lea na togi e le ua molia, ma e tusa ma le $2,125 le tupe e moomia ona toe faaleleia ai mea sa faaleagaina.

LOKA LE ALII NA OSOFAIA FALE E TOLU

E tolu mataupu eseese ua tuuaia ai e le malo le alii o Gabriel Tinai, ona o lona osofaia o ni fale se tolu i nofoaga eseese i le tausaga ua tuana’i, ma gaoia ai ni meatotino mai totonu o nei fale.

O le taeao o le aso Faraile na tulai ai Tinai i luma o le faamasinoga mo le faatulagaina o le aso e faia ai lana ulua’i iloiloga i luma o le Faamasinoga Faaitumalo.

O se tasi o mataupu o lo o tuuaia ai Tinai na tulai mai i Pava’ia’i i le aso 26 Tesema 2012, ina ua ia ulufale faamalosi i totonu o se fale ma ave faagaoi ni meatotino, na aofia ai se telefoni ma se ‘stereo system’.

Na vili e le alii e ana le fale lana numera i le aso na sosoo ai ae tali mai e se tagata.  Na musu le alii sa i ai le telefoni e toe faafoi le telefoni i le tagata e ana le fale, sei vagana ua totogi muamua atu le $50, ma malie ai loa le alii e ana le telefoni.

I le aso 28 Tesema 2012, na o ai le alii e ana le telefoni ma se leoleo, ma latou feiloai ma le alii o lo o i ai le telefoni, ma toe faafoi atu ai loa lana telefoni.

Na faailoa e le alii o Sulu Atina’e Jr o Iliili i leoleo e faapea, o le alii o Gabriel Tinai na tuuina atu le telefoni ia te ia, ina ua maea ona ia totogia i ai le $20.

Na taua e isi molimau i leoleo e faapea, i le po o le aso 26 Tesema 2012, sa latou vaaia ai le ua molia ma se tasi o ana uo o savavali ane i luma o le falesa a le ekalesia EFKAS i Pava’ia’i ma se atigipusa o lo o uu atu i o la lima.

Na vaaia e molimau se laau pese ma ni sipika o lo o i totonu o le atigipusa, ma latou fesiligia ai loa le ua molia poo fea na aumai ai nei mea, peitai e lei tali le ua molia ma lana uo, sei vagana ai lo la tutu i luga ma o ese.

Ina ua fesiligia e leoleo le uo a Tinai e uiga i lenei mataupu, sa ia faamaonia ai le alu o Tinai i totonu o le fale ma talepe le faitoto’a, ona alu lea i totonu ma sau ai ma se laau pese ma sipika e fa, mulimuli ane ina ua toe ulufale i totonu o le fale sa ia sau ma aumai se DVD player.

O le laau pese ma sipika na faatau e Tinai ma lana uo ia Pele Finau. O le tau aofa’i o meatotino o lo o tuuaia Tinai sa ia gaoiina e silia i le $100.

E ese mai i le mataupu e pei ona tuuaia ai Tinai, e lua isi mataupu tau solitulafono o lo o tuuaia ai foi o ia e le malo.

O le mataupu lea e tuuaia ai o ia i lona gaoiina o se ‘stereo system’ ma se telefoni mai se fale i Pava’ia’i, e $30,000 le tupe ua faatulaga e le faamasinoga e tatala ai o ia, ae o isi mataupu e lua e ese mai ai, e ta’i $20,000 i le mataupu e tasi ua faatulaga e le faamasinoga e totogi ona faatoa mafai lea ona tatala o ia i tua.

O le taeao nei lea ua faamoemoe e tulai ai Tinai i luma o le faamasinoga maualuga, mo le taimi muamua, ina ua ia faaagafua ona aia tatau ma le faataunuuina ai lana ulua’i iloiloga lea sa faamoemoe e faia i luma o le alii faamasino o John L. Ward II i le taeao ananafi.