Ads by Google Ads by Google

Tala otooto o Fa’amasinoga

IOE TALIGALU I LE MOLIAGA O LE TALEPE FALE

 

O le ali’i lea na tu’uaia e le malo i lona osofaia o se fale i Vaitogi i le masina o Fepuari, 2013 ma gaoia se fagu kesi, ua ia ta’utino i le Fa’amasinoga Maualuga e fa’amaonia tu’uaiga fa’asaga ia te ia.

 

E tolu moliaga mamafa na ulua’i tu’uaia ai e le malo le alii o Taligalu Ah Siu, ae i lalo o se maliliega ua talia e le fa’amasinoga, ua ia tali ioe ai i moliaga e lua o le talepe fale i le tulaga lua ma lona taumafai e talepe se fale, ae solofua e le fa’amasinoga le moliaga pito i mamafa lona fa’asalaga, o le gaoi.

 

I le tali ioe ai o Taligalu i tu’uaiga a le malo na ia tautino ai e faapea, i se taimi o le aso 13 Fepuari, 2013 i le ao, na ia ulufale fa’amalosi ai i totonu o le fale o Senouefa Bartley ma gaoi se fagu kesi sa i ai e aunoa ma se fa’atanaga a le aiga.

 

I le po o le aso lava lea na ia taumafai ai e talepe le faitoto’a o le o le Hall a le Ekalesia Aso Fitu i Vaitogi ma le fa’amoemoe e ulufale ai i totonu, ae na tu’u lea gaioiga ina ua ki atu moli o se ta’avale ia te ia ma alu ai loa i le atoa.

 

Ua malilie loia o le a finau i le fa’amasinoga mo se fa’asalaga mama mo Taligalu, peitai ua malamalama lelei le ua molia, tusa lava pe finau loia mo se fa’asalaga mama mo ia, e pule le faamasinoga i le ituaiga faasalaga e faasala ai o ia, e le mafai foi ona toe suia lana tali ioe ua tuuina atu i le faamasinoga pe afai e tuu mai le faasalaga a le faamasinoga ae le tusa ai ma lona manao.

 

O lo o taofia pea Taligalu i le toese i Tafuna e faatali ai le aso 1 Oketopa lea ua fa’atulaga e lau ai lona fa’asalaga.

 

TETE’E LAULU MA SEMU I TU’UAIGA A LE MALO

 

O ali’i e to’alua ia o lo o tu’uaia i lo la umia fa’asolitulafono o vaega o le laau fa’asaina o le mariuana, ua la teena tuuaiga a le malo fa’asaga ia te i laua i le vaiaso na te’a nei.

 

O Tenari Laulu o lo o tuuaia i lona umia fa’asolitulafono mariuana ma le fa’amoemoe e tulei ma fa’atau atu i tagata, ae o Mafo’e Semu o lo o tuuaia i lona umia fa’asolitulafono o vaega o le mariuana.

 

O tu’uaiga fa’asaga ia Laulu ma Semu na tula’i mai i le vaiaso na te’a nei ina ua vili Laulu i se tagata ma fai i ai pe mana’o e fa’atau sana sikaleti mariuana, ona fa’afeso’ota’i ai loa lea e le tagata lea le Ofisa o Leoleo, ma mafua ai loa ona fa’atulaga e leoleo le auala e fa’atau ai e le tagata lea mariuana ae pu’e fa’apagota ai Laulu.

 

I le taimi na faia ai le fefa’atauaiga, sa i ai fa’atasi Laulu ma Semu i totonu o le ta’avale, ma o lo o taua i fa’amaumauga a le malo e faapea, na fa’atonu e Laulu ia Semu e tago e tu’u atu le sikaleti mariuana i le tagata fa’atau.

 

O lo o taofia pea i laua nei i le toese i Tafuna se’i vagana ua totogi le tupe ua fa’atulaga ona fa’atoa mafai lea ona tatala i laua it ua.

 

NOFOVAAVAAIA FELISE TOGIASO MO LE 12 MASINA

 

O le alii e 34 tausaga le matua lea na ta’usala i lona tu’iina o le isi ali’i i le taimi o se latou inugapia, ua manatu le fa’amasinoga o le a fa’amalumalu le tu’uina atu o ia i le toese mo le 12 masina, ae o le a nofovaavaaia ai o ia i lalo o poloaiga a le fa’amasinoga.

 

O ni isi o ia poloaiga e aofia ai lona totogiina o le pili o le falema’i mo le taimi na taofia ai le ali’i sa manu’a, fa’asa ona ia toe tagofia le ava malosi, ae tatau ona auai i ni aoaoga e fesoasoani ai i le fa’afitauli o le ita ma le ava.

 

Na fa’atoese le alii o Felise Togiaso i luma o le fa’amasinoga e tusa ai o le mea sa tupu, sa ia fa’atoese foi i le alii na a’afia, lea fo’i sa i ai i totonu o le potu fa’amasino.

 

Na taua e Togiaso e faapea, o le ali’i na manu’a o lana uo mamae lava, o se feeseeseaiga i lo la va i le taimi o le latou inugapia na mafua ai ona tula’i mai lea fa’alavelave, ma o le taimi nei, ua maea ona toe teuteu ma faalelei lo la va.

 

Na faailoa e le ali’i faamasino ia Togiaso e faapea, ana le tago i le ava malosi i le po lea e le tula’i mai le vevesi i le la va ma lana uo, ma o iina fo’i ua atagia mai ai, o le ava malosi e le o se uo lelei lea mo ia.