Tala otooto o Fa’amasinoga

AMATA LE FA’AMASINOGA AUTU O LE FBI PEPELO

 

O le ali’i lea na alu ma fai i tagata o ia o le sui o le FBI i Amerika Samoa, o le taeao nei lea ua faatulaga e amata aloaia ai taualumaga o lana faamasinoga autu, lea o le a iloiloina e tagatanuu o Amerika Samoa.

 

O Alatise Fonoti o lo o tuuaia faatasi laua e le malo ma Aperaamo Levi i moliaga mamafa e lua o le gaioi, ma o le vaiaso na te’a nei na tali ioe ai Levi i le isi moliaga o le gaoi ae solofua e le faamasinoga le isi moliaga e tasi o lo o totoe ai i le pepa o tagi na faaulu e le malo, ma ua faatulaga le lauina o lona faasalaga i le aso 24 Oketopa, 2013.

 

O le taeao nei lea ua faatulaga e sailia ai le vaega e toafitu e fai ma faamasino latou te iloiloina se faaiuga o le mataupu a Fonoti, lea o lo o taofia pea i le toese i Tafuna talu mai le taimi na taofia ai i laua e leoleo i le amataga o le tausaga nei.

 

O lo o tuuaia e le malo Fonoti i lona faa faigaluegaina o ni tagata se toa 25 e faamama lona fanua, ona ia folafola lea i ai o penefiti latou te maua mai a latou galuega e pei o totogi ta’i $10 i le itula; ponesi e o o atu i le ta’i $4,000 le maualuluga; $100 i le aso mo se tasi na te ofoina atu lana ta’avale e piki ma toe momoli ai tagata faigaluega, faapea ai ma isi faamanuiaga e pei o le latou mauaina lea o masini faapa’u falaoa; microwaves; DVD players ma TV.

 

E tusa ai ma faamaumauga a le fa’amasinoga, e leai ma se faamanuiaga o nei faamanuiaga uma na maua e i latou e to’a 25 na faa faigaluega e Fonoti, ae ina ua latou taumafai e fesiligia le ua molia e tusa ai o latou totogi, na faafefe e Fonoti i latou ma folafola i ai le ta loka o i latou i le falepuipui a le FBI mo le umi e ta’i lua tausaga.

 

O le masina o Aperila na te’a nei na sainia ai e Fonoti sa latou maliliega ma le malo ma fofogaina ai loa i luma o le ali’i faamasino sili ia Michael Kruse, peita’i ina ua latalata ina maea tolaulauga a le faamasinoga e tusa ai o le maliliega a le ua molia ma le malo, na toe faailoa ai e Fonoti i le fa’amasinoga lona mana’o e faaleaoga le latou maliliega ma le malo, ae tu’u sa’o atu loa lana mataupu e fa’ataunuu sona fa’amasinoga autu.

 

O lana uo o lo o tuuaia faatasi i laua e le malo i lenei mataupu ia Levi, sa ia tali ioe i le moliaga o le gaoi i le vaiaso na te’a nei, ma ua sauni e talia lana faasalaga e tu’u ina atu e le fa’amasinoga i le masina o Oketopa, ma o se tasi o tuutuuga a Levi ma le malo ua uma ona faamauina i luma o le fa’amasinoga, o lona molimau lea ma le fa’amaoni i le fa’amasinoga autu a lana tama o Fonoti.

 

IOE PONALI I TU’UAIGA A LE MALO

 

O le ali’i lea o lo o tu’uaia i lona faia o uiga mataga i se tama’ita’i e 16 tausaga le matua, ua ia sauni e tali ioe i moliaga e lua o lo o tu’uaia ai o ia e le malo, i lalo o se latou maliliega ma le malo sa ia sainia i le vaiaso na te’a nei, lea fo’i ua maea ona faila i luma o le fa’amasinoga.

 

E fa moliaga mamafa o lo o tuuaia ai e le malo le alii o Eti Ponali, ona o le fa’alavelave lea na la faiaiga ai ma se tama’ita’i e talavou i lalo o le tulafono i le aso 21 Mati, 2013, ae i le maliliega lea ua latou sainia ma le malo, ua ia tali ioe ai i moliaga mamafa o le tagofia o itutinosa o se tama’ita’i ma le faia o gaioiga mataga faafeusuaiga, ae solofua ai e le malo moliaga pito sili ona mamafa atu, le moliaga o le faiaiga ma se tama’ita’i e talavou i lalo o le tulafono, faapea ai ma lona faia i ai o ni uiga faasotoma.

 

I le tali ioe ai o Ponali i moliaga mamafa e lua e pei ona ia taua, ua ia tautino ai e faapea, i le masina o Mati e pei ona taua i faamaumauga a le faamasinoga, sa ia faiaiga ai ma se tama’ita’i e talavou i lalo o le tulafono, e ui sa ia iloa o lenei tama’ita’i e le’i atoa le 16 tausaga o lona matua.

 

Ua ta’utino fo’i le ua molia, o le gaioiga sa ia faia ua le tusa ai ma ala o le tulafono a Amerika Samoa.

 

Ua malilie loia o le a latou fautua i le fa’amasinoga mo se faasalaga mama mo Ponali, peita’i ua malamalama le ua molia, tusa lea pe finau loia i le fa’amasinoga mo se faasalaga mama mo ia, e pule le fa’amasinoga pe talia pe teena ia faafinauga, aua o lo o i ai i le fa’amasinoga le malosi e fa’asala ai o ia i so o fa’asalaga e manatu le fa’amasinoga e talafeagai ma le solitulafono sa ia faia.

 

Ua malamalama fo’i Ponali, e le mafai ona toe suia lana tali ioe ua tuuina atu i le fa’amasinoga, pe afai e aumai se fa’asalaga a ali’i fa’amasino e le tusa ai ma lona mana’o.

 

FA’ASA ONA TOE INU PIA SE ALI’I MO LE 24 MASINA

 

O se tasi o tuutuuga o le nofo vaavaaia a le ali’i o Simeona Talaleu o Aua na tu’uina atu e le fa’amasinoga i le vaiaso na te’a nei, o le fa’asa lea ona ia toe tagofia le ava malosi, ua fa’asa fo’i ona ia toe soliina se tulafono a le malo.

 

O Talaleu na ta’usala e le fa’amasinoga i le vaiaso na te’a nei i moliaga e lua o le faaoolima i le tulaga tolu, ona o se fa’alavelave na tula’i mai i Aua i le masina o Me 2013, lea na ia fa’ao’olima ai i se ali’i ave taxi ma lona atali’i latou te tuaoi, e mafua mai ina ua fa’aleaga e le fanau a le ali’i na a’afia ana laau toto o lo o si’omia ai lona fanua.

 

E tupu le fa’alavelave ae o lo o inupia Talaleu ma ana uo i luma o le latou fale, ma alu atu ai loa le ua molia ma fasi le tamaititi na faaleagaina ana laau toto, toe tu’i ma lona tama ina ua oso atu le tamaloa e sefe lona atali’i.

 

Na faatoese le ua molia i luma o le faamasinoga e tusa ai o lana solitulafono sa faia, ma ia taua ai le maea lea ona teuteu o le vevesi na tula’i mai i le va o ia ma le aiga na aafia.

 

Talia e le fa’amasinoga fautuaga a loia e nofovaavaaia le ua molia i lalo o poloaiga e ao ona usita’i i ai.

 

O ni isi o ia poloaiga e aofia ai le faasa ona ia toe faatupu vevesi i lona nuu ma aiga tuaoi, faasa ona toe inupia ma aua fo’i ne’i ona toe solia se tulafono i totonu o le isi 24 masina.

Comment Here