IOE LIZZA GA’OTALA I TU’UAIGA A LE MALO

O le vaiaso nei na ioeina ai e le tama’ita’i o Lizza Ga’otala le moliaga o le gaoi e pei ona tuuaia ai o ia, i lalo o se maliliega sa latou sainia ma le malo ma ua talia fo’i e le fa’amasinoga maualuga.

I le tali ioe ai o Ga’otala i le moliaga o le gaoi, sa ia tautino ai i luma o le fa’amasinoga e faapea, i se taimi o le faaiuga o le tausaga e 2012 a’o avea o ia ma Failautusi o le Faalapotopotoga a Matua ma Faiaoga a le Aoga Maualuga a Samoana (PTA), sa ia ave fa’agaoiina ai se tupe sa tu’uina atu i lalo o lana vaavaaiga.

Ina ua talia e le fa’amasinoga maualuga le tali ioe a le ua molia, na talosaga ai loa le malo ina ia solofua le isi moliaga mamafa e tasi o lo o totoe ai i le pepa o tagi, le moliaga o lona ave faagaoi lea o se vaega tupe sa tu’uina atu i lalo o lana vaavaaiga.

Ua i ai manatu o loia o le a finau i le fa’amasinoga mo se faasalaga mama mo le ua molia, peita’i ua malamalama le ua molia, tusa lava pe finau loia i le faamasinoga mo se faasalaga mama mo ia, e pule le faamasinoga pe talia pe teena ia faafinauga.

E le mafai foi ona toe suia lana tali ioe ua tuuina atu i le fa’amasinoga, pe afai e tuuina mai se faasalaga a le fa’amasinoga ae le tau ai lona loto.

O se tasi o itu lelei mo le ua molia e pei ona taua e lana loia fautua ia Michael White, o le maea lea ona ia toe totogiina o le tupe na tuuaia o ia na ia gaoiina.

E ui na taua e le sui o le PTA i leoleo e tusa ma le $2,000 le vaega tupe na leiloa mai i totonu o le teugatupe a le PTA, na taua e le ua molia i leoleo, e $500 le tupe sa ia aveesea mai le teugatupe a le PTA.

O le masina fou lea ua faamoemoe e lau ai le faasalaga a le ua molia. O le moliaga o le gaoi, e mafai ona faasala ai se tasi i le toese i Tafuna mo le umi e le silia i le 7 tausaga, pe faasala foi i le salatupe e le silia i le $5,000.

SAUNI MALO FAILA MOLIAGA FAAOPOOPO FAASAGA IA SHARY MA ETEVISE

O le taeao nei lea ua faamoemoe le malo latou te failaina ai moliaga faaopoopo faasaga ia Shary Mua ma Etevise Tomasi, ona o le fa’alavelave lea na manu’a tigaina ai se isi tama’ita’i i le po o le aso To’ona’i na te’a nei i totonu o le fale kalapu a le Bowling Alley i Tafuna.

O le aso Tofi na te’a na fuafua le malo e tatau ona faila ai moliaga faaopoopo, ae ina ua valaau le mataupu a Shary ma Etevise, na faailoa ai e le malo i le faamasinoga, faatoa mae’a suesuega a leoleo i le faaiuga o le vaiaso nei, ma e tatau ona o o atu i le aso Gafua ua sauni moliaga faaopoopo mo le failaina.

I faamaumauga a le faamasinoga o lo o taua ai e faapea, ina ua sulu i luma o le Dance Floor le tama’ita’i na aafia ina ua uma ona taia e Shary, o le taimi lea na tago atu ai Shary ma po lona ulu, sosoo ai loa ma le tago atu o Etevise i se ipu malamalama sa i luga o le laulau ma togi ai ona foliga ma manu’a ai.

Na aapa atu foi Shary i le isi ipu malamalama ma togi ai le na aafia peita’i na misi, ae na toe lavea tonu ona foliga ina ua toe togi e Etevise o ia i le isi ipu malamalama, ma mana’omia ai filo e 16 e su’i ai lea manu’a.

O lo o taofia pea Shary ma Etevise i le toese i Tafuna se’i vagana ua totogi le ta’i $1,000 ona faatoa mafai lea ona tatala i laua i tua, ae i ai le talitonuga afai ae maea ona faila e le malo moliaga faaopoopo, e ono toe faaopoopo e le faamasinoga le vaega tupe e tatala ai i laua i tua.

FA’ATULAGA ASO FAI AI FAAMASINOGA AUTU A SE AU USO MAI FAGATOGO

O le aso 30 Setema 2014 lea ua faatulaga e faia ai le faamasinoga autu o se au uso mai Fagatogo, ona o se faalavelave na manu’a ai se ali’i i le masina o Fepuari na te’a nei i Fagatogo lava.

O McClusky Fa’agata Jr ma lona uso o Joe Fa’agata o lo o tuuaia i le moliaga o le faaoolima i le tulaga lua, ma o lo o la teena tuuaiga a le malo.

Na taua e alii na manunua i lenei faalavelave e faapea, a’o latou aai i le Falevaa i Fagatogo, na alu atu ai le alii o Fa’agata Jr ma lu’i latou latou te fufusu. Na toe fo’i Fa’agata Jr mo sina taimi ma o atu ai loa ma lona uso o Joe ma faaoolima loa i alii na aafia.