Tala otooto o Fa’amasinoga

MOLIAGA FAAOPOOPO MO FUALAAU TUUA

 

Ua faailoa e le loia a le malo ia Camille Philippe i luma o le faamasinoga maualuga i le vaiaso na te’a nei, le ono mafai lea ona faila e le malo o moliaga faaopoopo fa’asaga ia Fualaau Tuua, ona o se mataupu fou faatoa alia’e faatoai atu i le malo e tai foliga tutusa ma le mataupu o lo o tuuaia ai o ia i le taimi nei.

 

O Tuua o lo o tuuaia i moliaga o le gaoi ma le faia o faamaumauga tau faasese, e mafua mai i le faalavelave lea na ia gaoiina ai ni siaki mai totonu o le ofisa a le Kolisi Tuufaatasi, saini ma tala faamalosi lea siaki.

 

O le vaiaso na tea nei na faatulaga e faia ai le uluai iloiloga a Tuua i luma o le faamasinoga maualuga, peitai ina ua valaau lana mataupu, na talosaga Philippe i le faamasinoga mo se avanoa e toe tolopo ai le faaauauina o le uluai iloiloga o lenei mataupu, ae sei faagasolo suesuega a le malo faasaga i tuuaiga fou ua tuuina atu.

 

O tuuaiga faasaga ia Tuua na aliae mai i le taimi ao faigaluega i le ofisa a le Kolisi Tuufaatasi, lea na ia gaioina ai se siaki mai luga o le laulau ae tala i le fale’aiga o le Family Mart i Nuuuli, peitai ane na ia toe totogi le $500 i le pule o le faleoloa ina ua ia maua le tala ua iloa lana mea pi’o sa fai.

 

O lo o taofia pea o ia i le toese i Tafuna i le taimi nei, ina ua le mafai ona ia totogiina le $20,000 na faatulaga e tatala ai o ia i tua.

 

UETI SCHWENKE

 

O le alii mai Nuuuli lea o lo o tuuaia e le malo i le moliaga o le faaoolima i le tulaga lua, ua ia finau i le faamasinoga maualuga ina ia faatulaga se aso e faia ai lana faamasinoga autu.

 

Ina ua toe valaau le mataupu a Ueti Schwenke i le vaiaso na te’a nei, na faailoa ai loa e lana loia ia Michael White i luma o le faamasinoga ina ia faatulaga se aso e faia ai le faamasinoga autu a Schwenke i luma o tagata iloilo iuga.

 

O tuuaiga faasaga ia Schwenke na afua mai i le faalavelave na tulai mai i le fanua o le aiga o Fanene i Nuuuli i le masina o Fepuari 2013, ma talosagaina ai loa e ni isi se fesoasoani a leoleo.

 

I suesuega sa faia e leoleo na taua ai e faapea, o le vevesi na mafua mai i se uta pefu na alu atu ma se loli la’u uta, ina ua tau saili po o fea tonu le vaega o le fanua e tatau ona sasa’a ai le uta.

 

O lo o tumau pea poloaiga a le faamasinoga o lo o tatala ai i tua Schwenke e faatali ai le masina o Setema 2014 lea ua faatulaga e faia ai lana faamasinoga autu.

 

AUKUSITINO FANENE

 

O le aso 29 Aokuso 2013 lea ua faatulaga e fofoga ai le faasalaga a le faamasinoga faasaga ia Aukusitino Fanene, ina ua talia e le fa’amasinoga maualuga se maliliega na sainia i le va o le ua molia ma le malo i le vaiaso na te’a nei.

 

O Fanene na ulua’i tuuaia e le malo i le moliaga mamafa o le faaoolima i le tulaga lua, ona o le faalavelave lea na tulai mai i Pago Pago i le masina o Novema 2012, ina ua ia faaoolima i se alii ma manua tigaina ai o ia.

 

Na faamatala e le ua molia i leoleo e faapea, ina ua la taunuu atu ma lona toalua i le la fale i le aso na tulai mai ai le faalavelave, sa ia maitauina ai le na aafia o lo o i totonu o le fale, ma e foliga mai na ia talepe le fale ae alu i totonu.

 

E tula’i mai le faalavelave e pei ona tuuaia ai le ua molia, o lo o nofovaavaaia o ia i lalo o poloaiga mai le faamasinoga, ona o ni isi o solitulafono na ta’usala ai o ia e le faamasinoga i tausaga ua mavae.

 

Ua tusa ma le 9 masina talu ona taofia Fanene i le toese i Tafuna i le taimi nei, e faatali ai le fofogaina o lona faasalaga i le masina fou.

 

DICKLAH TE’O

 

O le ali’i mai Pago Pago lea o lo o tuuaia i lona sasaina o le ulu a lona uso matua i le samala, ua ia finau i le faamasinoga ina ia faatulaga se aso e faia ai lana faamasinoga autu.

 

O Dicklah Te’o o lo o tuuaia e le malo i le moliaga o le faaoolima i le tulaga lua, ma ua faamoemoe o le masina o Setema 2014 o le a faataunuuina ai lana faamasinoga autu i luma o tagatanuu lautele.

 

Ina ua valaau le ulua’i iloiloga a Te’o i le vaiaso na te’a nei, na talosagaina ai loa e lana loia fautua ia Michael White le faamasinoga ina ia faatulaga loa se aso e faia ai le faamasinoga autu o lenei mataupu, ma o lo o tumau pea le teena e le ua molia o tuuaiga faasaga ia te ia.

 

O le vevesi e pei ona tuuaia ai le ua molia na amata mai i se la inugapia ma lona uso matua, ma faai’u ai loa i se feeseeseaiga i lo la va, e mafua mai ina ua la talanoaina tulaga o le faiga o pepa o le to’alua a le na a’afia.

 

O lo o tumau pea poloaiga a le faamasinoga o lo o tatala ai Te’o i tua mai le toese i Tafuna, e faatali ai le taimi ma le aso lea ua faamoemoe e faia ai lana faamasinoga autu.

Comment Here