MOLIA NI ALI’I TALAVOU SE TO’ALUA I LE GAOI

E ta’itasi moliaga mamafa o le gaoi ua molia ai e le malo ni ali’i talavou se to’alua mai Mesepa ina ua tuuaia i laua i lo la gaoia o ni sipika, laau ta’avale ma se iPod mai se ta’avale sa paka i se faleoloa i Malaeimi i le vaiaso na tea nei.

O i laua ua molia e ta’i 16 tausaga le matutua, ma ua tatalaina nei i tua i lalo o le vaavaaiga a la matua e faatali ai le aso e toe tutula’i ai i luma o le Fa’amasinoga Faaitumalo.

Na faailoa e le tagata e ana nei meatotino i leoleo e faapea, e le’i atoa se lima minute na alu ai i totonu o le faleoloa ae toe fo’i mai ua leai lana ato ta’ita’i sa i tua o lana pikiapu. Ae o le aso na soso’o ai na valaau atu ai sana uo ave pasi e iai se sipika ma se laau taavale a sana uo o lo o fia faatau i se tau taugofie, ae maua mulimuli ifo, o ana mea totino ia sa gaoia.

Na fesootai le na aafia i leoleo ma faailoa i ai ana sipika ua toe maua, sei vagana ai le iPod na faatoa maua ina ua loka e leoleo i laua ua molia i le vaiaso na tea nei.

Na taua e le isi o le toalua lea i leoleo e faapea, ina ua la vaaia le pikiapu ua paka i luma o le faleoloa ae savali le ave taavale i totonu o le faleoloa, sa faia ai loa le la tonu la te o e gaoi le ato o lo o taatia i tua o le pikiapu, atonu e maua ai se tupe mo i laua.

Na atili ona la fiafia ina ua la fetagofi atu i le ato e mamafa, ae na la tete’i ina ua tatala atu le ato e na o sipika ma le laau taavale o lo o i ai, ae o le isi tamai ato na maua i ai le iPod, o lea na la taumafai ai loa e saili se tagata e faatau i ai mea na la gaoia ina ia maua ai se la tupe.

Ua poloaina nei alii e le faamasinoga ina ia aua nei o la toe o i le faleoloa na tulai mai ai le faalavelave, faasa foi ona la toe tuua o la aiga amata atu i le 6:00 i le afiafi seia oo i le 6:00 i le taeao, sei vagana ua latou malaga faatasi o la matua.

Na taua e le loia a le malo ia Terri Bullinger e faapea, o i laua ua molia faatoa molia lava ia i ni solitulafono.

FA’ASA SE ALI’I ONA TOE OO I LE BOWLING ALLEY

O le ali’i e 34 tausaga le matua lea ua ta’usala e le faamasinoga faaitumalo i le moliaga o le faatupu vevesi i nofoaga faitele, ua poloaina e le faamasinoga ina ia aua ne’i toe alu i le nofoaga o lo o i ai le fale kalapu o le Bowling Alley i totonu o le 6 masina lea ua nofovaavaaia ai o ia.

O le moliaga lea ua ta’usala ai Okesene Alapati o Faleniu na afua mai i le faalavelave na tulai mai i le masina na tea nei, ina ua maua atu e leoleopo o le Bowling Alley o lo o ia taumafai e tatala le faitoto’a o se ta’avale sa paka i fafo o le fale kalapu.

Na faatonu e le leoleo le ua molia e alu ese peita’i sa fa’alii ma fia fusu i le leoleo, atoa ai ma lona lafo o ni upu mataga i le ali’i leoleopo.

Na faailoa e John L. Ward II ia Alapati e faapea, o le tiute o le leoleopo sa faia i le po na tulai mai ai le faalavelave, ia mautinoa e malupuipuia taavale a tagata o lo o tafafao i totonu o le Bowling Alley, ae ua avea lona ‘ona ma itu na ia le usita’i ai i le fa’atonu.

Ua poloaina foi le ua molia na te totogiina le salatupe e $100, aua nei ona toe tagofia le ava malosi ma ia aua i ni aoaoga e fesoasoani ai i le tulaga o le ita.