Tala otooto o Fa’amasinoga

“O LE ‘AVA E LE O SE UO LELEI MO OE”

 

Ina ua fofogaina le fa’asalaga o le ali’i o Anthony Lomitusi i le vaiaso na te’a nei i luma o le Fa’amasinoga Faaitumalo, na saunoa ai le ali’i fa’amasino ia John L. Ward II e fa’apea, o le pia o lo o fiafia e inu, e le o se uo lelei lea mo ia.

 

“E te fiu e te inu i le pia e te le maua ai se mea aoga mo oe ma lou aiga, na o le loka ai o ia ma i’u ina ma’imau ai lou ola i se taimi o i luma,” o le fautuaga lea a le ali’i faamasino ia Lomitusi.

 

O Lomitusi na ta’usala i le solitulafono o le fa’atupu vevesi i nofoaga faitele, e mafua mai i le laulau vavale i leoleopo o le fale kalapu a le Bowling Alley i le masina o Me na te’a nei, ina ua fai atu i ai leoleopo e aua na te gaoia pia a tagata mai luga o latou laulau ae fa’ali’i ai le ua molia.

 

Ua nofovaavaaia o ia mo le ono masina i lalo o tuutuuga a le faamasinoga e pei o le faasa ona toe tago i le ‘ava malosi, fa’asa fo’i ona toe o’o i le Bowling Alley.

 

MOLIA TALALELEI FAUFANO I LE AVE TA’AVALE A’O SE’I LONA LAISENE

 

O le vaiaso na te’a nei na faila ai e le malo le moliaga mamafa o le ave ta’avale a’o se’i lona laisene ave ta’avale faasaga ia Talalelei Faufano, ona o le fa’alavelave lea na maua ai o ia e leoleo i Nu’uuli o ia fa’afoeina se ta’avale a’o se’i lona laisene.

 

O le fa’alavelave na tula’i mai ina ua vaaia e se ta’avale leoleo sa tiute i se vaega o Nu’uuli le alu atu saoasaoa o le ta’avale na fa’afoeina le ua molia i maila e 32, i vaega o le alatele e na o le 20 maila i le itula le saoasaoa fa’atulagaina.

 

Na tuliloa e le taavale a leoleo le ta’avale a le ua molia ma taofi ai i luma o le Tutuila Store, ma faatonu ai loa e leoleo le ua molia e avatu lona laisene ave ta’avale, peita’i na pepelo i ai le ua molia o lana laisene ua leiloa, ae ina ua saili mulimuli ane, o lana laisene na se’i i le masina o Fepuari 2013 e le ali’i fa’amasino o le fa’amasinoga fa’aitumalo, ina ua fa’amaonia le solitulafono o le ave ta’avale ‘ona na tu’uaia ai o ia e le malo, ma se’i ai loa lana laisene mo le 6 masina.

 

E taofi e leoleo Faufano ma molia i lea solitulafono, ae toe tolu lava aso o lo o totoe mae’a le ono masina na se’i ai lona laisene.

 

So o se tasi e ta’usala e le fa’amasinoga i le solitulafono o le ave ta’avale a’o se’i le laisene, e ono mafai ona fa’asalaina i le toese i Tafuna mo le umi e le silia i le 5 tausaga, ae faamalosia e le tulafono le tuli o aso e 90 i le toese i Tafuna.

 

TU’UAIA SE ALI’I I LONA FA’AO’OLIMA I LONA ATALI’I 12 TAUSAGA

 

O le vaiaso na te’a nei na tula’i ai i luma o le fa’amasinoga faaitumalo se ali’i e 45 tausaga le matua mai Iliili, ona o tu’uaiga i lona fa’ao’olima lea i lona atali’i i luma o lana fanau laiti.

 

E le o faalauiloaina le suafa o le ua molia ona o puipuia i le ono aafia atu ai ma le tamaititi o lo o a’afia i lenei mataupu.

 

O le mataupu na tofu atu i luma o le ofisa o leoleo i Tafuna i le amataga o le vaiaso na te’a nei, ina ua vili e ni aiga tuai leoleo mo se fesoasoani, ina ua faalogoina se misa i le fale o le aiga na tula’i mai ai le fa’alavelave.

 

Na taunu’u leoleo ma iloa ai, o lo o pisa le ulugali’i e mafua mai ina ua fa’ao’olima le tama o le aiga i lona atali’i e 12 tausaga le matua, e ala i lona po o ona foliga toe una’i lona ulu i le puipui simå o le fale.

 

Sa maitauina e leoleo ni maosia i foliga o le tamaititi na aafia, faapea ai ma se tama’i fula i le isi itu o lona ulu.

 

Ua molia lenei le tamå i le solitulafono o le fa’atupu vevesi i nofoaga faitele, e faatali ai pe i ai ni moliaga fa’aopoopo e ono faila e le malo fa’asaga ia te ia.

 

I le toe tatala ai i tua o le ua molia mai le toese i Tafuna, ua poloaina ai o ia ina ia saili se isi nofoaga e nofo ai i le taimi nei, ae aua ne’i toe nofo i lona aiga i Iliili, se’i vagana ua toe tu’uina atu se isi poloaiga a le fa’amasinoga.

 

Ua poloaina fo’i o ia ua fa’asa ona ia toe taumafai e fa’afeso’ota’i lona to’alua ma lana fanau, pe na te toe faia fo’i i ai ni amioga tau fa’amata’u e aofia ai ma le fa’ao’olima ia i latou.

 

28 MASINA LOKA AI NI ALII SE TO’AFA

 

E ta’i 28 masina lea ua faasala ai e le Faamasinoga Maualuga ni alii se to’afa, i le toese i Tafuna ina ua ta’usalaina i latou i le faia o ni suiga mataga i se teineititi e 14 tausaga le matua.

 

Na amata tula’i mai lenei faalavelave a’o 13 tausaga o le teineititi.  A’o le’i lauina le faaslaga mo Peniamina “Peni” Levi, Tavita Mariota, Lewis Lokeni ma Anthony Sioka, na o latou ulua’i faatoese i le faamasinoga ma o latou talosagaina seisi avanoa mo i latou.  Ae peita’i na saunoa le alii faamasino sili ia Michael Kruse, o le mamafa o le faasalaga mo lenei ituaiga solitulafono e o’o i le 15 tausaga i le toese, mo le tagata e toatasi.

 

Na manatu le faamasinoga e faasala nei alii i le ta’i fitu tausaga i le toese, ae peitai, ua faamalumalu lea faasalaga, ae ua faasala i le ta’i 28 masina ma o le a nofovaavaaia mo le ta’i 17 tausaga.  Ma ua faatonu foi i latou e lesitala o latou igoa i le lisi o tagata ua ta’usal ai le faia o uiga mataga i fanau teine laiti faatasi ai ma le faia o ni suesuega i o latou tino po o latou tauaveina ni siama o le faama’i o le HIV.

Comment Here