Ads by Google Ads by Google

Tala otooto o Fa’amasinoga

MOLIA PAGOTA E TOALUA I LE SOSOLA MA LE TOESE

 

Ua molia nei alii pagota e toalua, o Derek Ropati ma Sefo Lemanu, i le solitulafono mama o le sosola ese mai i le toese i le aso 31 o Me 2011 ma ua faamoemoe e tutula’i i luma o le Faamasinoga Maualuga i le taeao nei mo le faaauauina o le la mataupu.

 

Na pisi leoleo i le sailiga o i laua nei, ma maua ai Derek i totonu o le lotoa a le Aoga a Manulele, pe tusa o le itula e 6:00 i le afiafi o le aso lava lea, ae o Sefo na maua i tua o le faleoloa o Tutuila pe tusa o le itula e 8:47 i le po.

 

E le o se taimi muamua lea ua sosola ai i tua mai le toese ia Derek ma Sefo.

 

TETE’E DAVID BROWN I TUUAIGA A LE MALO

 

Ua teena e le alii o David Brown moliaga o lo o tuuaia ai o ia e le malo e aofia ai le talepe fale i le tulaga muamua; faaoolima i le tulaga lua ma le faaleaga meatotino i le tulaga tolu, ina ua tulai i luma o le faamasinoga maualuga i le taeao ananafi ma ua faatulaga ai lona ulua’i iloiloga e faia i le masina fou.

 

O tuuaiga faasaga ia Brown na afua mai i le faalavelave lea na la taumafai ai ma lana uo o James e talepe se faleoloa i Iliili i le vaveao o le aso 9 Fepuari na te’a ne.  O lo o taumafai leoleo e saili le alii o James.

 

O lo o taofia pea Brown i le toese i Tafuna sei vagana ua totogi le $20,000 ua faatulaga e le faamasinoga ona faatoa mafai lea ona tatala o ia i tua.

 

TOALUA SITISENI SAMOA TOE FA’AFO’I

 

Ua toe faafoi e le malo o Amerika Samoa ia Filo Sua ma Sailau Suaava ina ua faamaonia i faamaumauga a le faamasinoga, le tulaga faaletonu o a la pepa nofomau.  O Filo lea ua fuafua e malaga ese atu ma lona aiga, i le taeao nei ae o Sailau na malaga ese atu i le aso ananafi.

 

O Filo na taofia mai e leoleo i le Aso Gafua na te’a nei ona o tuuaiga i le faatupu vevesi i nofoaga faitele. O le aso ananafi na tali ioe ai Filo i le solitulafono o le faatupu vevesi i nofoaga faitele, ma faasala ai loa o ia i le nofovaavaaia mo le lua tausaga i lalo o tuutuuga e ao ona usitai i ai,  aofia ai lona tuua o le teritori mo le tasi tausaga.

 

O Sailau sa tuuaia e le malo i le moliaga o le faatupu vevesi i nofoaga faitele, peita’i na solofua e le faamasinoga lea tuuaiga ina ua le mafai e le malo ona faamaonia i luma o le faamasinoga.  Ae talu ai tulaga faaletonu i ona pepa nofomau, na mafua ai ona taofia pea Sailau i le toese seia oo mai i le taeao ananafi, lea na faailoa ai e lana loia i le faamasinoga, ua sauni Sailau e tuua le teritori ma toe foi atu i Samoa.

 

O se tasi o tulaga faanoanoa na taua e le loia a Sailau, o lenei tamaitai na aumai faatama fai mai Samoa ina ua faatoa fanau o ia, ma e oo mai lava i le taimi nei ina ua 23 ona tausaga, e le’i faia lava ni ona pepa nofomau, ma o le taimi muamua lenei o lona olaga ua tuvae ai i Samoa talu ona soifua mai.

 

PAULO PETELO

 

O le alii lea na taofia mai e leoleo i le vaveao ananafi mai Pava’ia’i, ona o tuuaiga i le faaumuumu i totonu o le nuu ma laulauvavale, o lo o taofia pea i le toese i Tafuna i le taimi nei, ina ua maua i faamaumauga a le faamasinoga o lo o faaletonu ona pepa nofomau, e le gata i lea, sa maua ai foi i le taga o lona ofu sa faia se paipa e faaaoga e ula ai le pauta oona o le aisa.

 

O se leoleopo i se tasi o faleoloa i Pavaiai na logoina le ofisa o leoleo i le vaveao ananafi, ma talosaga i ai mo se fesoasoani, ina ua faaumuumu ma laulau vavale solo le ua molia i totonu o le nuu a’o ‘ona.

 

Na taunuu leoleo ma latou pu’eina mai ai le alii o Paulo Petelo, peitai i faamaumauga o lo o taua ai e faapea, o le faila a Paulo Petelo i le Ofisa o Femalagaaiga na tapunia i le 2007, lona uiga e le o tusa ai lona aumau i le teritori ma tulafono a le Ofisa o Femalagaaiga.

 

O le taeao nei lea ua faamoemoe e toe tulai ai Petelo i luma o le faamasinoga mo le isi ana iloiloga.