Ads by Google Ads by Google

Tala otooto o Fa’amasinoga

MOLIA SE ALI’I FAIA UIGA MATAGA TEINEITTI 15 TAUSAGA

 

O le vaiaso na te’a nei na tulai ai i luma o le fa’amasinoga faaitumalo se ali’i talavou, ona o tu’uaiga i lona faia lea o ni uiga mataga i se teineititi e 15 tausaga le matua ma i’u ina ma’itaga ai lea teineititi.

 

O moliaga faasaga ia Tapeni Pio e aofia ai le faiaiga ma se teineititi e laititi i le tulafono: faia o amioga faasotoma atoa ai ma moliaga e lua o le faia o uiga mataga, ma o lo o taofia pea o ia i le toese i le taimi nei, sei vagana ua totogi le $25,000 ona faatoa mafai lea ona tatala o ia i tua mai le toese i Tafuna.

 

I faamaumauga a le faamasinoga o lo o taua ai e faapea, o le mataupu faasaga ia Pio na tofu atu i le Ofisa o Leoleo, ina ua logo e se sui o le Ofisa o Tautua Lautele le Ofisa o Leoleo faasaga i se teineititi e 15 tausaga le matua ua 4 masina le umi o lona ma’itaga.

 

Ina ua fesiligia e leoleo le teineititi na aafia sa ia taua ai e faapea, o le masina o Mati 2012 na amata ai ona la momoe ma le ua molia i lona aiga i Fagali’i, sosoo ai loa ma le isi i le masina o Iuni 2012.

 

Ae ina ua fesiligia e leoleo le ua molia e tusa ai o lenei mataupu, sa ia ioeina ai faamatalaga a le teineititi sa faia faasaga i le la mafutaga. E ui e le’i manatua e Pio le taimi ma le aso na amata ai le la mafutaga, peitai sa ia faailoa i leoleo, na pau le taimi sa ia manatua na la momoe ai ma le teineititi na aafia, o le masina o Iuni 2012 ma Ianuari 2013 ma ua ia mautinoa fo’i ua ma’itaga le na aafia ona o ia.

 

O le vaiaso nei lea ua faatulaga e faia ai le ulua’i iloiloga o lenei mataupu i luma o le faamasinoga faaitumalo, e iloilo ai po o lava mau a le malo e lagolago ai tuuaiga faasaga i le ua molia, ae po o ia fo’i lea o lo o tu’uaia i le soliina o le tulafono.

 

IOE MARA SAFUIFATU I TU’UAIGA A LE MALO

 

O le masina fou o Aokuso lea ua faatulaga e fofogaina ai le faasalaga a le faamasinoga maualuga faasaga ia Mara Safuifatu, ina ua ta’usala o ia i le solitulafono mama o le i ai lea ia te ia o ni ta’ifau taufeai, i lalo o se maliliega na latou sainia ma le malo ma talia e le faamasinoga i le vaiaso na te’a nei.

 

O le moliaga ua ta’usala ai le ua molia na afua mai i le faalavelave lea na osofa’i ai e sana ta’ifau se tamaitiiti i Taputimu, ma mafua ai loa ona molia o ia e le malo i le moliaga mamafa, peitai o lea ua faaitiitia i le solitulafono mama.

 

I le tali ioe ai o le ua molia i le solitulafono e pei ona ta’usala ai o ia, sa ia tautino ai e faapea, i le aso e pei ona taua, sa ia te ia se ta’ifau na osofaia se tamaititi ma manu’a ai.

 

Na taua e le ua molia i leoleo e faapea, na faateia o ia ina ua osofa’i e lana ta’ifau le tamaititi, ae o lana ta’ifau o se ta’ifau filemu e le tau feai.

 

LE LAVA TUPE AE FASI AI LE FAFINE

 

E 42 tausaga o se ali’i mai Iliili ua molia e le malo i le faaoolima ma le faatupu vevesi i totonu o lona aiga, ona o le fa’alavelave lea na ia faaoolima ai i lona to’alua i le vaiaso na te’a nei e ala i lona ta tu’i o ona foliga ma sasa i le ta’avale meataalo a lona atali’i a’o matamata i ai lana fanau laiti e to’alua.

 

O lea mataupu na tofu atu i le ofisa o leoloeo i Tafuna ina ua valaau e ni aiga tuaoi se fesoasoani a leoleo, i le mae’a ai lea ona latou faalogoina o si fafine o lo o ee mai totonu o le latou fale mo se fesoasoani.

 

Na taua e se molimau i leoleo e faapea, e silia ma le itula talu ona latou faalogoina leo foliga mai o ni meaafale o lo o fetogia’i solo i totonu o le fale atoa ai ma leo o ni tagata o lo o tauupu, ae maona a’e loa i luga ma le ee a le fafine mo se fesoasoani, ma ia logoina ai loa leoleo mo se fesoasoani.

 

Na fiu leoleo e tu’itu’i le faitoto’a o le fale ina ua latou taunuu ae le’i tatalaina lava, mulimuli ane ina ua toe valaau leoleo i le igoa o le fafine, na savali atu ai loa le na aafia ma tatala le faitoto’a, ma vaaia ai e leoleo ni manu’a laiti i foliga o le fafine e pei o se fula i le isi ona mata atoa ai ma ma’osia i ona foliga.

 

Na taua e le fafine na aafia i leoleo e faapea, o le vevesi na mafua mai ina ua iloa e lona toalua e laititi lana siaki sa maua mai lona totogi, mai le aofa’i e masani ona ia maua i vaiaso uma taitasi, ma o iina na amata mai ai loa le vevesi ina ua la tau upu ma lona to’alua mo se afa itula, ona alu ese ai loa lea o lona toalua ma le fale, ma toe fo’i atu ai i le fale ua ‘ona i le tuana’i ai o le 3 itula ma amata loa ona faamisamisa atu ia te ia, seia o’o lava i lona fa’ao’olima ia te ia a’o vaai i ai lana fana ma fetagisi.

 

Na taua e le fafine i leoleo, e le o se taimi muamua lenei ua fasi ai o ia e lona toalua, ma o le tele lava o taimi na te fasia ai o ia a’o matamata lana fanau.

 

Na faamaonia e ni molimau se to’alua e tuaoi ma le aiga na tulai mai ai le faalavelave i leoleo e faapea, toeitiiti o vaiaso uma la te faalogoina ai vevesi i totonu o le aiga lea e pei o le fasi mai o tamaiti po o le latou tina fo’i, ae o isi taimi latou te faalogoina ai le leoleoa o le tamaloa ma palauvale solo i totonu o le latou aiga.

 

Ua poloaina a le ali’i faamasino ia John L. Ward II le ua molia ina ia aua ne’i ona toe taumafai e faafesootai lona toalua ma lana fanau i soo se auala, a’o faagasolo ai taualumaga o lana mataupu i luma o le faamasinoga.

 

Ua faasa fo’i ona ia toe taumafai e saili se auala e faafefe pe faamata’u ai lona to’alua ma lana fanau, ma ia saili se isi nofoaga e nofo ai mo le taimi nei.

 

O le aso Lulu o le vaiaso nei lea o lo o faamoemoe le malo e tatau ona taunuu atu ai ua mautu ni moliaga faaopoopo e ono faila faasaga i le ua molia.