Ads by Google Ads by Google

Tala otooto o Fa’amasinoga

MOLIA I LE GAOIA O SE SIAKI MAI LE KOLISI

 

Ua molia nei e le malo le tama’ita’i o Fualaau Tuua i moliaga mamafa e lua o le gaoi ma le faia o faamaumauga tau faasese ina ua tuuaia o ia i lona gaoia o se siaki mai totonu o le Ofisa a le Kolisi Tuufaatasi a Amerika Samoa (ASCC) ae tala i le Family Mart i Nuuuli i le 2012.

 

I faamaumauga a le faamasinoga o lo o taua ai e faapea, o le masina o Novema 2012 na logoina ai e se sui o le ASCC ia le Ofisa o Leoleo ona o se siaki sa gaoia ma tala i se faleoloa i Nuuuli.

 

Na alia’e lenei mataupu ina ua o’o atu le pule o le Family Mart i le ASCC ona o se siaki na tala i lo latou faleoloa, ae ua te’a le aso e aoga ai, ma o lea siaki sa tusia ai le suafa o se tagata faigaluega i le ASCC.

 

Na te’ena e le tagata sa i ai lona igoa i luga o le siaki, e na te le’i talaina se siaki i le Family Mart ma e le’i piki foi sana siaki mai i le ASCC.  Na mafai ona faamaonia le eseese o le saini sa i luga o le siaki ma le saini a le tagata e ana le siaki.

 

Ae o luga o le masini pu’eata na maua ai le ata o Tuua i le taimi na alu atu ai e tala le siaki.  Na faamaonia e le ASCC, o Tuua o se tamaitai aoga sa galue i totonu o le ofisa ale aoga i le taimi na tulai mai ai le faalavelave.

 

Ua mae’a ona toe totogi e Tuua le $500 i le Family Mart ae o le taeao nei lea ua faamoemoe e tulai ai i luma o le Faamasinoga Maualuga mo le fofogaina o lana mataupu, ma o lo o taofia pea o ia i le toese i le taimi nei ina ua le mafai ona ia totogia le $20,000 sa faatulaga e tatala ai o ia i tua.

 

GAOI LE FAGU UAINA MAI LE COST-U-LESS

 

E 16 tausaga o se ali’i talavou ua molia nei e le malo i le solitulafono o le gaoi, ona o le faalavelave lea na tulai mai i le aso 21 o Iuni 2013 i Tafuna, lea na maua ai o ia e se tagata faigaluega a le Cost-U-Less o ia nanaina se fagu uaina i totonu o lona ofu.

 

Na logo e le tagata faigaluega le pule ma taofia ai loa le ua molia a’o ia taumafai e tuua le faleoloa.

 

Ina ua fesiligia e leoleo le ua molia sa ia taua ai e faapea, sa faatonu o ia e se tagata e alu e aumai le fagu uaina mai le faleoloa ae avatu mulimuli le tupe ia te ia.

 

Ua toe tatala i tua le ua molia e faatali ai taualumaga o lona faamasinoga, ma ua poloaina o ia e le faamasinoga ina ia aua ne’i toe alu i le nofoaga o iai le Cost-U-Less.

 

MOLIA NI ALII MAI FAGALI’I I LE FA’ATUPU VEVESI

 

O le afiafi o le Aso Faraile na te’a nei na taofia ai e leoleo ia Vaiula Mose ma Mikaele Seigafo mai i Fagalii, ma tutula’i ai i luma o le fa’amasinoga i le Aso Gafua na te’a nei, ma la teena ai moliaga o le faatupu vevesi i nofoaga faitele ma ua faatulaga ai le toe valaauina o a la mataupu i le masina fou, ae ua tatala i tua i laua ma faatonuga a le faamasinoga, ua faasa ai ona o la toe tagofia le ava malosi, faasa ona taumafai e faafesootai molimau a le malo, faasa foi ona la toe solia se tulafono a le malo.

 

I faamaumauga a le faamasinoga o lo o taua ai e faapea, o le pulenuu o Fagalii na faafesoota’ia le ofisa o leoleo ina ua faalogoina le pisapisao o se inugapia sa faia i le fale a Mose, atoa ai ma le ki faaleo tele i luga o le laau pese i taimi o faigalotu o le afiafi i le nuu.

 

Na taua e le molimau i leoleo e faapea, soo se taimi lava e fai ai se inugapia i le fale o Mose, e logo atoa ai le nuu i le pisapisao ma le leotele o le laau.

 

Na taua e Mose i leoleo, o se feeseeseiga i le va o ia ma Mikaele i le taimi o le latou inugapia, na mafua ai ona ita ma palauvale ai ae na taua e Mikaele i leoleo e faapea, o lona ita ia Mose na mafua ai ona ia togia le fagupia i lalo o le palapala ma ta’e ai.