MOLIA TERESA FALEALI’I I LE AVE TA’AVALE A’O SE’I LONA LAISENE

O le taeao ananafi na faila ai e le malo le moliaga mamafa o le ave ta’avale a’o se’i le laisene e faasaga ia Teresa Faleali’i, ona o se faalavelave na tulai mai i le aso 26 o Me 2013 i Pago Pago.

I faamaumauga a le faamasinoga o lo o taua ai e faapea, na maitauina e se alii leoleo se taavale o lo o alu saoasaoa i luga o le alatele i Pago Pago ia Me 26, 2013, i le 10 maila e ova ai i maila faatulagaina o lea vaega o le alatele.

Na taofi e le leoleo le taavale ma iloa ai o Teresa Faleali’i le ave taavale, ae ina ua tapa lana laisene ave taavale, sa le mafai e le ua molia ona tuuina atu lana laisene i le leoleo.

Mulimuli ane na maua e le leoleo le laisene a Faleali’i o lo o se’i mo le ono masina, amata mai i le aso 19 Tesema 2012 seia oo mai i le aso 19 Iuni 2013, ina ua ta’usala o ia i le solitulafono o le ave taavale ‘ona i le tausaga na te’a nei.

E $500 le tupe lea ua tatala ai i tua Falealii e faatali ai le isi ana iloiloga.

O lenei solitulafono e mafai ona faasala ai se tagata i le toese mo le umi e le silia i le lima tausaga, pe faasala foi i se salatupe e le silia i le $5,000, e aofia ai le tuli o aso e 90 i le toese i Tafuna.

MOLIA SE TAMA 56 TAUSAGA I LONA FAAOOLIMA I SE TAMAITITI

E 56 tausaga o se tama mai Pago Pago ua molia e le malo i le moliaga mamafa e tasi o le faaoolima i le tulaga lua ma moliaga mama e lua o le faaoolima i le tulaga tolu ma le faatupu vevesi i nofoaga faitele, ona o le faalavelave lea na manu’a ai se tamaititi talavou i Pago Pago i le aso 20 o Iuni 2013.

I faamaumauga a le faamasinoga o lo o taua ai e faapea, o moliaga faasaga ia Faasega Moananu na afua mai ina ua ia faaaoga se fasi paipa uga (PVC) e faaoo ai manu’a i le tamaititi na aafia ina ua fasi e le tamaititi lea lona atalii laititi.

Na taua e Moananu i leoleo e faapea, na vave ona oso lona ita ina ua tamo’e atu lona atali’i laititi ma tagi ma ta’u atu ua fasi e le ali’i na aafia o ia, ma o lona ita tele na mafua ai ona ia tago atu i le paipa ma ta ai le tamaititi ma manu’a ai.

Sa ia taua foi i leoleo e faapea, soo se taimi na te faatonuina ai lana fanau, na te faaaogaina ai lava soo se mea e taatia i ona autafa e sasa ai lana fanau.

Ae ina ua fesiligia e leoleo le ali’i na manu’a i le mafuaaga o le faalavelave, sa ia taua ai e faapea, ina ua uma ona ia oti le ulu o le atali’i a le ua molia, sa taoto ai loa e fai sana malologa, ae na te’i ina ua ala a’e i luga, e le gata na toe faaaoga e le tamaititi le kilipa oti ulu e toe oti ai lona lava ulu, ae sa oti ai ma lona ulu a’o moe, o le mafuaaga lea na ia ita ai loa ma po le tamaititi.

Na taua e le alii lea i leoleo e faapea, a’o taumafai e faamatala i le afafine matua a Moananu le mafuaaga o le vevesi, na te’i i le valaau mai o Moananu ia te ia pe fia fusu, ae sa tali atu i ai e leai, ona savali atu Moananu ma taumafai e titina faatolu lona ua.

Na taua e le tamaititi na aafia i leoleo e faapea, e faafitu ona sasa e Moananu lona lima, ma le ta mulimuli lea na tau i lona ulu ma matapogia ai.

O lo o taofia pea i le toese i Tafuna Moananu e faatali ai le isi ana iloiloga lea ua faatulaga e le faamasinoga.

E 4 filo na mana’omia e su’i ai le ta’e sa i luga o le ulu o le tamaititi na aafia, ma ua toe te’a o ia i tua mai le falema’i i Fagaalu.

FIA ULAVALE SOLO LE ‘OVER STAYER’

O se ali’i e 27 tausaga le matua lea na loka mai e leoleo i Mesepa i le vaveao o le aso To’ona’i na te’a nei, ina ua ripotia le malomaloå solo i luga o le auala tele, ma faalavelave ai i aiga o lo o momoe, ua toe taofia i le toese Tafuna e faatali ai le aso e toe tula’i ai i luma o le faamasinoga, ina ua faamaonia ua ova aso talu ona aumau i le teritori.

O le ali’i o Felise Toleafoa na ulufale mai i le teritori i se pemita e 30 aso i le tolu masina talu ai, ma ua tatau ona toe fo’i o ia i Samoa e tusa ai o faamaumauga a le Ofisa Femalagaaiga.

Ua molia o ia e le malo i le moliaga mama o le faatupu vevesi i nofoaga faitele, ma ua tuu atu nei o ia i lalo o le vaavaaiga a le Ofisa o Femalagaaiga.

Na taua e ni molimau i leoleo e faapea, ua latou fiu e faa filemu le ‘ona a Toleafoa, ae ua le mafai lava le pisapisao ma le fia ulavale solo i luga o le auala.