TUUAIA BROWN I LE TALEPE FALE MA LE FAAOOLIMA

Ua molia nei e le malo le alii talavou o David Brown i moliaga mamafa e lua o le talepe fale i le tulaga muamua, faaoolima i le tulaga lua ma le moliaga o le faaleaga o meatotino a se isi tagata.

O moliaga faasaga ia Brown na afua mai i se faalavelave na tula’i mai i Iliili i le aso 9 o Fepuari, ina ua la taumafai ma se alii e igoa ia James, e osofai se faleoloa, peitai e le’i manuia a la taumafaiga ina ua maua e le pule o le faleoloa i laua ma valaau ai loa le Ofisa o Leoleo.

I faamaumauga a le faamasinoga o lo o taua ai e faapea, na faateia le ulugalii Asia e ana le faleoloa ina ua la faalogoina se tagata o taumafai e talepe le faitoto’a pito i tua o le faleoloa pe tusa o le 4:33 i le vaveao.

Na ala i luga le tamaloa ma savali i le faitoto’a o lo o pao ma tatala, ae faateia ai ina ua ia vaaia ni alii se toalua o lo o tutu mai fafo, o le taimi lea na peti ai e James le tamaloa i le naifi tipi povi sa uu i lona lima, peitai na tu le naifi i le faitoto’a ina ua tapuni e le tamaloa le faitoto’a.

E leai ni oloa na gaoi e Brown ma lana uo o James ina ua maua i laua e le tamaloa e ana le faleoloa, ae sa la toe solomuli ma o ese loa i le taimi lava lea, peitai ina ua maea ona tuu atu e le ulugalii faamatalaga uma e faatatau ia te i laua i leoleo, na aga’i atu ai leoleo i luga o le auala ma la maua atu ai aualii ia e toalua, peita’i na alu i le atoa James ae na maua ai na o Brown.

Ina ua fesiligia Brown e leoleo, sa ia faailoa ai i leoleo e faapea, o lana uo o James na faia le tonu la te o e osofa’i le faleoloa na aafia, peitai e le’i manuia ina ua maua laua e le tamaloa ma la toe fo’i mai ai loa.

E $20,000 le tupe ua faatulaga e totogi ona faatoa mafai lea ona tatala Brown i tua mai le toese.

TAMALOTO AIAVA

E 20 masina lea ua loka mo’i ai le alii o Tamaloto Aiava i le toese i Tafuna, o se tasi lea o tuutuuga o lona nofovaavaaia e 5 tausaga, ina ua tausala o ia e le Faamasinoga Maualuga i le solitulafono o le faaoolima i le tulaga lua.

O isi tuutuuga o lana nofovaavaaia e aofia ai lona totogiina o le salatupe e $2,000, auai i ni aoaoga e fesoasoani ai i le loto ita, ma ia aua nei ona toe soliina se isi tulafono a le malo.

Na faatoese Aiava i le faamasinoga e tusa ai o le solitulafono sa ia faia, ma ia talosagaina ai se isi avanoa mo ia. Sa ia faatoese foi i le alii na aafia ma lona aiga, ina ia alolofa faamagalo o ia e tusa ai o le solitulafono sa ia faia.

Na talosaga le loia a Aiava o Michael White i le faamasinoga ina ia faanofovaavaaia le ua molia, ae ua lava masina e tolu lea na taofia ai o ia i le falepuipui e avea ma ana faasalaga i lenei mataupu, peitai na finau le loia a le malo e faapea, talu ai le matuia o le gaioiga sa faia e le ua molia, o lea e tatau ai ona faasala o ia i se faasalaga faafalepuipui.

O le mea na tupu ua mafua ai ona faasala e le faamasinoga le ua molia e pei ona saunoa le alii faamasino sili, sa ia faaaoga se u’amea tatala pa’u e ta ai foliga o le alii na aafia i lenei mataupu, ina ua valaau le alii lea i lana uo teine.

O le alii na aafia, o le peresetene o le PTA a le Aoga Maualuga a Samoana, ma o le faalavelave foi na tulai mai i totonu o le lotoa a le aoga a Samoana i le aso 21 Novema o le tausaga na tea nei.

TETE’E WESLEY MOTULIKI TUUAIGA A LE MALO

Na teena e le alii o Wesley Motuliki tuuaiga a le malo faasaga ia te ia, ina ua tulai i luma o le faamasinoga faaitumalo i le taeao ananafi. O moliaga e tolu o lo o tuuaia ai Motuliki e aofia ai le faiaiga ma se teineititi e laititi i lalo o le tulafono; tagofia o itutinosa o se tamaitai; atoa ai ma le faia o gaioiga e ono lamatia ai le saogalemu o fanau laiti.

O tuuaiga faasaga ia Motuliki na afua mai ina ua faila e le grandfather a le tamaitai e 16 tausaga o lo o aafia se tagi i le ofisa o leoleo faasaga ia te ia, ona o gaioiga sa ia faia i lona afafine lea ua i’u ina ma’itaga ai o ia.

O le masina o Aperila 2012 na amata faiaiga ai le ua molia ma le tamaitai ua aafia ao 16 ona tausaga, peitai o le vaiaso na te’a nei na faatoa iloa ai e le grandfather a le tamaitai lea o ia ua ma’itaga, ina ua faia sana siaki i le falema’i i Fagaalu.

O lo o taofia pea Motuliki i le toese i Tafuna ina ua le mafai ona ia totogi le $50,000 lea ua faatulaga e le faamasinoga e tatala ai o ia i tua.