MOLIA JACKSON AUMALE FAIA UIGA MATAGA I SE TAMA’ITA’I 14 TAUSAGA

O le alii talavou lea o lo o tuuaia i lona toso faamalosi o se tama’ita’i 14 tausaga i totonu o se fale taele ae fai i ai uiga mataga faafeusuaiga, ua molia nei e le malo i moliaga mamafa e lua o le faia o amioga faasotoma ma le faia o uiga mataga faafeusuaiga, atoa ai ma le moliaga mama e tasi o lona faia o se gaioiga e ono lamatia ai le saogalemu o fanau e laiti i le lalo o le tulafono.

O tuuaiga faasaga ia Jackson Aumale, 21 tausaga le matua na afua mai ina ua sola ese le tama’ita’i na aafia mai lona aiga.

Ina ua maua e leoleo le tama’ita’i na aafia ma fesiligia e uiga i lenei mataupu, sa ia faailoa i leoleo e faapea, o le masina o Setema 2012 na amata faia ai e le ua molia uiga mataga ia te ia.

Na taua e le tama’ita’i i leoleo e faapea, a’o latou nofonofo ma ona tausoga e to’alua i tafatafa o le latou falesa ua uma a latou a’oga pese sa faia i le afiafi, sa ia faalogoina se tagata o valaau atu ia te ia mai tua o le fale taele a le aulotu.  Na i’u ina tula’i ese atu ona tausoga ae tu’u ai na o ia, ae faafuase’i ona ia faalogoina se tagata ua toso atu o ia aga’i i le fale taele a le aulotu.

Ina ua fesiligia e leoleo le tama’ita’i po o ai na faia uiga mataga nei ia te ia, na tali le tama’ita’i o Jackson Aumale.

Na taua e le tama’ita’i lona taumafai e tete’e gaioiga a lenei alii ae peitai sa le mafai, ae na avea lona ee leotele i luga ma itu na taufetuli atu ai ona tausoga ma fesoasoani ia te ia, ae o le taimi fo’i lea ua sola ese ai Jackson.

Na taua e le tama o le tama’ita’i na aafia i leoleo, ua maea ona faatoese atu matua o Jackson ia te ia e tusa ai o le mea sa tupu, ma ua ia faamagalo fo’i i lea alii.

Sa faamaonia foi e Jackson i leoleo ia lona faia o nei tulaga i le tamaitai na aafia.

O lo o taofia pea i le toese i Tafuna le ua molia e faatali ai taualumaga o lana mataupu lea ua faagasolo i luma o le faamasinoga i le taimi nei.

O le alii loia fautua ia Douglas Fiaui o lo o tula’i mo Aumale ae o le tamaitai loia ia Camil Phillipe o lo o tula’i mo le itu a le malo i lenei mataupu.

FA’ASA MIKA MAUIGOA ONA TOE TU I LE BOWLING ALLEY

Ua faasaina e le alii faamasino o John L. Ward II ia le alii o Mika Mauigoa ona toe alu i totonu o le Bowling Alley, pe latalata ai fo’i i le nofoaga o i ai lea fale kalapu i totonu o le 12 masina lea ua nofovaavaaia ai o ia i luma o le faamasinoga.

O Mauigoa na ta’usala i le solitulafono mama o le faatupu vevesi i nofoaga faitele, ona o le faalavelave lea na tulai mai i le aso 16 Aperila, ina ua faaumuumu ma faatupu vevesi solo a’o ‘ona i le Bowling Alley.

Na faailoa e Ward ia Mauigoa e faapea, “O lo o talavou lava lou olaga, e leai sau mea aoga e maua i le pia, na o le ma’imau ai o lou olaga ma atili ai ona e saisaitia i lalo o le tulafono.”

E 12 masina lea ua nofovaavaaia ai le ua molia i lalo o poloaiga a le faamasinoga. O ni isi o ia poloaiga e aofia ai le faasa ona ia toe tagofia le ava malosi ma ia totogi le salatupe e $100.

“AFAI E TE LE FAIGALUEGA E SILI AI LOU TOE FO’I I LOU AIGA...”

Na faailoa e le alii faamasino ia John L. Ward II i le alii o Nathan Tusagi, 24 tausaga o Tafuna e faapea, afai e le faigaluega i totonu o le teritori o Amerika Samoa e pei ona mafua ai ona oo mai, e sili ai pe a toe fo’i i lona aiga i Samoa e fai se isi galuega aoga mo lona lumana’i.

O Tusagi na ta’usala i le solitulafono o le faaoolima i le tulaga tolu, ona o le faalavelave lea na ia tu’iina ai se alii ave taxi i le masina na te’a nei, ina ua fai i ai le ave taxi e le o atoa lona pasese na avatu.

I faamaumauga a le faamasinoga o lo o taua ai e faapea, o Tusiga o lo o ia umia le ituaiga ID o le SP (Special Provision), ma o le ituaiga ID lea e agavaa ai o ia ona galue i totonu o le teritori.

Talu ona ulufale mai Tusiga i le teritori i le 2008 e oo mai i le taimi nei, e le’i faigaluega lava o ia.

Ua poloaina o ia e le faamasinoga na te totogi le salatupe e $150, ae afai e toe molia atu o ia i se isi solitulafono, o le a iloilo lea e le faamasinoga se faaiuga talafeagai mo ia, e aofia ai ma le toe faafo’i atu o ia i Samoa.