Ads by Google Ads by Google

Tala otooto o Fa’amasinoga

TONE PULOU

 

O le aso 14 o Iuni 2013 lea ua tolopo i ai e le Faamasinoga Maualuga le iloiloga o le mataupu a Tone Pulou sa fuafua e faia i le taeao ananafi, ona o lo o finagalo alii faamasino latou te fia maua se faamatalaga a le Ofisa Tutotonu a le Ekalesia EFKAS e uiga i le mataupu a le ua molia.

 

O ananafi na faatulaga e iloilo ai e le faamasinoga le talosaga a le Ofisa Nofovaavaaia, pe le tatau ona taofi le toe tatalaina o le ua molia i tua mai le toese e faigaluega, ona o tuuaiga i lona ave o se fagu malosi i totonu o le toese ma latou inu ai ma ni alii pagota.

 

O ia tuuaiga o lo o matua teena malosi e Pulou e pei ona faaalia e lana loia fautua ia Mike White.

 

O Pulou o lo o tuli sona faaasalaga faafalepuipui e 28 masina i le toese i Tafuna, ina ua ta’usala o ia i le mataupu lea na la faiaiga ai ma se teineititi aoga e 13 tausaga le matua, ma i’u ina ma’itaga ai lea teineititi.

 

O le masina o Novema na te’a nei na talia ai e le faamasinoga se talosaga na faaulu e Pulou ma lana loia, mo se avanoa e tatala ai o ia i tua e alu e faigaluega i le avanoa lea ua ofa atu e le Ofisa o le Ekalesia EFKAS i Kanana Fou.

 

O lo o taofia pea Pulou i le toese i le taimi nei e faatali ai le aso e toe fofogaina ai lana mataupu i luma o le faamasinoga.

 

TETE’E SOPI SENIO JR I TUUAIGA A LE MALO

 

O le aso 22 o Iulai 2013 lea ua faatulaga e toe valaau ai le mataupu a Sopi Senio Jr i luma o le Faamasinoga Maualuga, i le mae’a ai ona ia teena o tuuaiga a le malo faasaga ia te ia i le taeao ananafi.

 

O Senio Jr o lo o tu’uaia i moliaga mamafa e lua o le faaleaga meatotino i le tulaga muamua ma le taumafai e gaoi ni meatotino a se tagata.

 

O ia tuuaiga na afua mai i le faalavelave lea na tula’i mai i le aso 24 o Oketopa 2012, lea o lo o tuuaia ai o ia i lona taumafai e faaleaga le masini ATM a le Faletupe o le ANZ o lo o tu i luma o le FJ & P Kruse i Leone.

 

O lo o tatala le ua molia i tua i lalo o poloaiga a le faamasinoga e faatali ai le aso lea ua faatulaga e toe tulai ai i luma o le faamasinoga.

 

O le alii loia fautua ia Douglas Fiaui o lo o tula’i mo le ua molia ae o Julie Pasquale o lo o tula’i mo le itu a le malo i lenei mataupu.

 

IOE FILITELE LEAUTU I TUUAIGA A LE MALO

 

O le alii lea na tuuaia e le malo i lona tagofia o itutinosa a se tamaitai e le’i faaipoipo i ai, ua ia ta’utino i luma o le Faamasinoga Maualuga i le taeao ananafi, e faamaonia tuuaiga faasaga ia te ia.

 

O se maliliega na sainia e Filitele Leautu ma le malo ma ua talia e le faamasinoga, o lo o ia ioeina ai le moliaga o le tagofia o itutinosa o se tamaitai i le tulaga muamua, ae solofua le moliaga o le faaoolima i le tulaga tolu.

 

Ua malilie loia la te talosagaina le faamasinoga mo se faasalaga mama mo le ua molia, peitai ua malamalama le ua molia, e pule le faamasinoga pe talia pe teena ia talosaga, na

 

e le mafai ona toe suia lana tali ioe ua tuuina atu i le faamasinoga, pe afai e tuuina mai se faasalaga a le faamasinoga ae le tusa ai ma lona mana’o.

 

O lo o taofia pea i le toese le ua molia e faatali ai le lauina o lana faasalaga i le masina fou.

 

O le tamaitai loia fautua ia Leslie Cardin na tulai mo le ua molia, ae o Julie Pasquale na tulai mo le itu a le malo.