Tala otooto o Fa’amasinoga
MOLIA SE ALII I LONA TAUMAFAI E TALEPE MASINI ATM I LEONE
Ua molia nei e le malo i moliaga mamafa e lua o le faaleaga meatotino i le tulaga muamua ma le taumafai e ave faagaoi ni meatotino, ia le alii o Sopi Senio Jr., lea o lo o tuuaia i lona taumafai e talepe masini ATM a le Faletupe o le ANZ lea o lo o i luma o le faleoloa a le FJ & P Kruse i Leone ia Oketopa 24, 2012.
O le taeao ananafi na tulai ai Sopi i luma o le Faamasinoga Faaitumalo, ma ua toe faatulaga le isi ana iloiloga e faia i le taeao a taeao, lea ua faamoemoe e faamautu ai iina ma le taimi e faia ai lana ulua’i iloiloga, e faamaonia ai pe sa soli e lenei alii se vaega o le tulafono.
I faamaumauga a le faamasinoga o lo o taua ai e faapea, sa maitauina e ni tagata faigaluega a le ANZ ni faaletonu i le latou masini ATM i Leone, e foliga mai sa taumafai se tagata e talepe le pito i luma o le masini e ala i le fa’aaogaina o se ‘spray’ lanu uliuli e fana ai pito o le masini.
Na mafai ona faamaonia o le alii o Sopi na faia lenei gaioiga, e ala i ni masini pu’eata a le faleoloa ma e silia ma le $100 le tino i tupe sa i totonu o le masini i le taimi na tula’i mai ai le faalavelave.
E tusa ai ma faamaumauga a le faamasinoga o lo o taua ai, e tusa ma le $4,428.50 le tupe e toe faaleleia atoa ai le masini ATM na faaleagaina, e aofia ai le toe faaleleia o lona faitoto’a, o le toe faapipii o isi vaega ma le vaega maneta lea e mafai ai ona aumai i fafo tupe.
MOLIA KEITH TALOSAGA I LE FAOMEA MA LE FAAOOLIMA
O le alii lea o lo o tuuaia i lona tu’ia o le gutu o se alii ma fao faamalosi lana $10 ua molia e le malo i le faomea i le tulaga muamua ma le faomea i le tulaga lua, faapea ai ma le moliaga mama e tasi o le faaoolima i le tulaga tolu.
O moliaga faasaga ia Keith Talosaga na afua mai i se faalavelave na tulai mai i Amouli i le aso 15 o Me, 2013.
E toalua ni alii o lo o ta’ua na molimauina lenei faalavelave. Ina ua fesiligia e leoleo le ua molia e tusa ai o lenei mataupu, sa ia faamaonia ai lona tu’ia o le gutu o le alii na aafia, atoa ai ma lona fao faamalosi o lana $10.
O le moliaga o le faomea i le tulaga muamua, e mafai ona faasala ai se tasi i le toese mo le olaga atoa, poo le faasala foi i le faasalaga e amata mai i le 10 e oo atu i le 30 tausaga.
E $50,000 le vaega tupe lea ua faatulaga e le faamasinoga e totogi ona faatoa mafai lea ona tatala le ua molia i tua mai le toese i Tafuna.
IOE AFAESE I MOLIAGA O LE FAIA O UIGA MATAGA I SE TEINEITITI
O se alii e 28 tausaga le matua lea na tuuaia e le malo i lona faia o ni uiga mataga i se teineititi e 15 tausaga le matua, ua ia tautino i luma o le Faamasinoga Maualuga i le vaiaso nei, e faamaonia tuuaiga o lo o faia faasaga ia te ia.
O le alii o Tusitala Afaese na ulua’i tuuaia e le malo i moliaga e lima e aofia ai le toso teine, faia o amioga faasotoma, faaoolima mataga, tagofiai o itutinosa o se tamaitai e le faaipoipo i ai, atoa ai ma le moliaga mama e tasi o lona faia o ni amioga e ono lamatia ai le saogalemu o fanau laiti.
I se maliliega ua sainia e Tusitala ma le malo ma ua talia foi e le faamasinoga, ua ia tali ioe ai i moliaga o le faia o ni uiga mataga faafeusuaiga i se teineititi, tagofia o itutinosa o se teineititi e le’i faaipoipo i ai, atoa ai ma lona faia o ni amioga e ono lamatia ai le saogalemu o fanau laiti, ae solofua e le faamasinoga moliaga pito mamafa e lua o lo o totoe ai.
I faamaumauga a le faamasinoga o lo o taua ai e faapea, o le tama o le teineititi na aafia na talosaga i leoleo mo se fesoasoani i le tau sailiga o lona afafine ua sola ese ma le latou aiga.
A’o faagasolo suesuega a leoleo na ia maua ai se ripoti e faatatau ia Afaese ma lenei teineititi i se fale i Nuuuli ma o iina na maua atu ai i la’ua e leoleo.
O le aso 27 Iuni 2013 lea ua faatulaga e le faamasinoga e tuuina atu ai lana faasalaga faasaga i lenei mataupu.
O le afioga i le alii faamasino sili lagolago ia Lyle L. Richmond sa faatautaia lenei mataupu, i le lagolagosua a afioga i alii faamasino lagolago ia Mamea Sala Jr ma Muasau T. Tafili.