Ads by Google Ads by Google

Tala otooto o Fa’amasinoga

NOFOVAAVAAIA JESS POGIA MO LE 5 TAUSAGA

 

O le alii lea na tausala e le Faamasinoga Maualuga i lona gaoia o ni oloa mai totonu o se fale sa ia osofaia i le masina o Aokuso o le tausaga na te’a nei, ua faanofovaavaaia mo le lima tausaga, ae ua lava le tolu ma le afa masina na taofia ai o ia i le falepuipui e fai ma ona faasalaga i lenei mataupu.

 

Ua poloaina Jess Pogia e le faamasinoga na te faatinoina ni galuega mo le atunuu lautele mo le 300 itula, i lalo o le vaavaaiga a le Ofisa Nofovaavaaia, faatasi ai ma lona toe totogia o le $200 i le tagata e ana le fale sa ia gaoia.

 

Na faamanino e le afioga i le alii faamasino sili lagolago ia Lyle L. Richmond e faapea, e faalua ona talepe e Pogia le fale o le aiga na aafia i Tafuna i le masina o Aokuso 2012, ma gaoi se tama’i pusa sa teu ai tupe, o le ituaiga fana o le ‘.22 rifle’, o se uati ma se DVD player.

 

Na toe maua e leoleo isi mea na gaoia e Pogia sei vagana ai le tupe e $200 sa ia faailoa i leoleo sa faaaoga e faatau ai ana meaai, ae o le fana sa ia faatauina atu i le $130.

 

Na faatoese Pogia i le faamasinoga e tusa ai o lana solitulafono sa faia, ma ia talosagaina ai le faamasinoga ina ia faamagalo o ia.

 

O ni isi o tuutuuga o le nofovaavaaia a Pogia e aofia ai le faasa ona ia toe soli se tulafono, aua foi ne’i o latou toe fesoota’i ma ana uo sa latou aafia i lenei mataupu.

 

I faamaumauga a le faamasinoga o lo o taua ai e faapea, o Pogia ma ni isi alii talavou se toalua na latou osofaia le fale a le aiga na aafia, ma latou gaoi mai ai ni isi o mea aoga, peitai i le faaiuga o suesuega a le malo, na molia ai na o Pogia ae leai ni moliaga na faia faasaga i isi alii e toalua.

 

IOE EKELAGI OFAGALILO I TUUAIGA A LE MALO

 

O le tamaitai e 30 tausaga le matua lea na tuuaia i lona faia o ni uiga mataga i se tamaititi e 13 tausaga le matua, ua ia tautino i le Faamasinoga Maualuga e faamaonia tuuaiga faasaga ia te ia.

 

O Ekelagi Ofagalilo na ulua’i tuuaia e le malo i le moliaga mamafa o le taumafai e faia ni uiga mataga faafeusuaiga faasaga i se tamaititi laititi atoa ai ma le moliaga mama o le faia o gaioiga e ono lamatia ai le saogalemu o fanau laiti, ae i lalo o se maliliega lea na latou sainia ma le malo ma ua talia foi e le faamasinoga, ua ia tali ioe ai i le moliaga muamua lea ua toe teuteu e le malo, ina ia faailoa ai le solitulafono mama o le faaoolima i le tulaga tolu, ae solofua ai le moliaga.

 

I le tali ioe ai o Ofagalilo i le moliaga e pei ona tausala ai o ia e le faamasinoga, sa ia ioeina ai lona tagofia o itutino o se tamaititi na aafia i se auala e le tusa ai ma le tulafono.

 

O le aso 20 Iuni lea ua faatulaga e le faamasinoga e tuuina atu ai lana faasalaga faasaga ia Ofagalilo.

 

O le tamaitai loia ia Leslie Cardin na tulai mo le ua molia, ae o le tamaitai loia ia Julie Pasquale na tulai mo le itu a le malo.

 

O le afioga i le alii faamasino lagolago ia Lyle L. Richmond na faatautaia le iloiloga o lenei mataupu, i le lagolagosua a afioga i alii faamasino lagolago ia Mamea Sala Jr ma Muasau T. Tofili.

 

NOFOVAAVAAIA JAMES VE’A MO LE 12 MASINA

 

O le alii 32 tausaga le matua mai Aua lea na tausala i lona faaaoga o se laupapa e sasa ai le papatua o se alii la te tuaoi, ua faanofovaavaaia mo le 12 masina i luma o le Faamasinoga Faaitumalo i lalo o poloaiga faapitoa e ao ona usita’i i ai e aofia ai lona auai i ni aoaoga e fesoasoani ai i le tulaga o le ita, aua nei ona toe faatupuina se vevesi i va o ia ma latou aiga tuaoi, ma ia ona totogia le $74.50 o le pili o le falema’i mo le alii na aafia.

 

O le mataupu na tuuaia ai James Ve’a na tulai mai i le masina o Fepuari 2013 i Aua, ina ua tau upu le ua molia ma se alii la te tuaoi, e mafua mai i le paipa na pa ina ua oso ai i luga le pikiapu a le alii na aafia, ma faaiu ai le taugaupu ina ua faaaoga e Ve’a se laupapa e sasa ai le papatua o le alii na aafia.

 

Na faatoese le ua molia i le faamasinoga e tusa ai o lana solitulafono sa faia, sa ia faatoese foi i le alii na aafia i lenei mataupu ina ia faamagalo o ia.

 

I faamaumauga a le faamasinoga na taua ai e faapea, ua maea ona toe faaleleia le vevesi na tulai mai i le va o Ve’a ma le alii na aafia, ma ua toe lelei le la mafutaga e oo mai i le taimi nei.

 

O Ve’a na ta’usala i le solitulafono o le faaoolima i le tulaga tolu, ae solofua e le faamasinoga le moliaga mama o le faatupu vevesi i nofoaga faitele.