Ads by Google Ads by Google

Tala otooto o Fa’amasinoga

FAASALA FAAMASINOGA IA SAVAII MATAGI I LE $100

 

E $100 le sala tupe ua faasala ai e le faamasinoga ia Savaii Matagi na te totogiina, ina ua tausala o ia i le solitulafono mama o le i ai lea ia te ia o se ta’ifau taufeai, lea na osofaia se tamaititi.

 

Ao lei tuuina atu le faasalaga a le faamasinoga ia Matagi, na maua lona avanoa e faatoese ai i le faamasinoga ma ia tautino ai na te le toe tausia ni ta’ifau feai i lona olaga.

 

Na talia e le faamasinoga le faatoesega ma faanofovaavaaia ai o ia mo le 6 masina i lalo o tuutuuga e ao ona usitai i ai e aofia ai lona totogia o le salatupe e $100 ma le $125 mo le pili o le falema’i i le taimi na togafitia ai le tamaititi na aafia i lenei faalavelave.

 

NOFOVAAVAAIA MICHAEL TUI MO LE 2 TAUSAGA

 

E lua tausaga lea ua nofovaavaaia ai Michael Tui i luma o le Faamasinoga Maualuga, ina ua tausala o ia i moliaga mama e lua o le faaoolima i le tulaga tolu ma le faatupu vevesi i nofoaga faitele lea na afua mai i se faalavelave na tupu i luma o le fale ta lavalava a Luisa i Iliili.

 

A’o le’i lauina le faasalaga a Tui, na maua lona avanoa e faatoese ai i le faamasinoga faapea ai ma le alii na aafia ona o le faalavelave e pei ona tuuaia ai o ia.

 

Na talia e le faamasinoga le faatoesega ma faia ai loa le faaiuga e faamalumalu le tuuina atu o Tui i le toese mo le tausaga, ae o le a nofovaavaaia o ia i le lua tausaga i lalo o tuutuuga e ao ona ia usitai i ai, e aofia ai lona totogia o le salatupe e $500 ma le $382.50 e totogi ai le pili o le falema’i a le alii na aafia.

 

FAASALA FAAMASINGOA MAUALUGA LE SUI FOFOGA FETALAI I LE $500

 

E $500 le salatupe lea ua faasala ai nei e le Faamasinoga Maualuga le Sui Fofoga Fetalai ina ua ta’usala o ia i le solitulafono o lona faaaoga sese o faamaumauga mai le Ofisa o le malo sa galue ai ao avea ma Faatonusili o le Matagaluega o Auaunaga ma Tautua Lautele a le malo.

 

E le gata i le salatupe, ae ua poloaina foi o ia na te faatinoina ni galuega mo le atunuu lautele mo le umi e 200 itula, i lalo o le faamalumaluga a le Ofisa Nofovaavaaia a le Faamasinoga.

 

I faafinauga a le loia a le susuga Iaulualo Talia Faafetai, o Sharron Rancourt, sa ia ta’ua ai e faapea, e i ai ni isi sa tatau ona molia e le malo ona o lo latou fesootai ai i lenei mataupu, peitai ua manatu le malo e lava na o Iaulualo e faila i ai moliaga.

 

Na faapupula foi e Rancourt i le faamasinoga e faapea, e ui i le mataupu na tulai mai, e le’i maua e Iaulualo se tupe po o se penefiti mo ia po o lona aiga i lenei mataupu, ma o se tasi lea o itu na taua foi e le loia a le malo ia Marcellus Talaimalo Uiagalelei i totonu o le maliliega sa latou sainia ma le ua molia.

 

Na maua le avanoa e molimau ai le faletua o le alii faipule ma sa ta’ua e Caroline Talia e faapea, e ui e le’i finagalo lona toalua e tulai e molimau, peitai e manao ina ia silafia e le faamasinoga le ituaiga tagata e i ai lona toalua, o dr tama alofa ma lelei mo ia ma lana fanau.

 

Sa ia taua e faapea, e le’i i ai lava se taimi na taumafai ai lona toalua e faia ni faiga faaalatua i le malo, pe maua mai ai foi ni mea e penefiti ai o ia ma lona aiga. Sa ia faamatala le mataupu ua faia faasaga i lona toalua, o se ma’ila e le mafai ona toe aveesea.

 

I le tusi faatoese na tuu atu e le sui fofoga fetalai i le ofisa nofovaavaaia, sa faailoa atu ai lona salamo.

 

Na taua e le alii loia ia Uiagalelei e le fesiligia le faatoesega ua tuuina atu e Iaulualo i le faamasinoga, atoa ai ma le faaiuga sa faia e le malo e pei ona i ai le maliliega na talia e le faamasinoga, ina ia faailoa ai ni isi o itu lelei mo le ua molia, atoa ai ma le tulaga lenei, o le naunau o Iaulualo e fia fesoasoani i se tagata mafatia ae ua avea ma itu ua ia soli ai le tulafono.

 

E tasi le tausaga lea ua nofovaavaaia ai I’aulualo i lalo o poloaiga a le faamasinoga e ao ona usita’i i ai, e aofia ai le taofia o ia i le toese mo le 15 aso, peitai o le a faamalumalu lea poloaiga, faavae lea i luga o lona usitaia o poloaiga uma o le a tuuina atu ia te ia.

 

O ni isi o poloaiga o lana nofovaavaaia e aofia ai le asiasi i le ofisa nofovaavaaia faatasi i le tolu masina, aua nei ona toe solia se tulafono, ma ia totogi le $200 o lana salatupe ao le’i taina le itula e 4:00 i le aso na lau ai lona faasalaga.