IOANE ‘UPUESE’ LOGOVII

Na talia e le faamasinoga fautuaga mai le Ofisa nofovaavaaia faapea ai ma le loia a le alii o Ioane Upuese Logovii, ua lava le umi lea na loka ai o ia i le toese ao faatalitali le faaiuga o lana faamasinoga e avea ma ona faasalaga.

O Logovii na tuuaia e le malo i le moliaga mamafa o le faaoolima i le tulaga muamua, ae i lalo o se maliliega ua sainia ma le malo ma talia e le faamasinoga i le lua vaiaso talu ai, ua tali ioe ai Logovii i le moliaga o le faaoolima i le tulaga tolu.

O lea moliaga na afua mai i le faalavelave lea na ia tatui ai lima o se isi alii i se naifi faamoe, ina ua masalomia e Logovii lea alii i le gaoia o ni meatotino mai totonu o lona fale.

A’o le’i tuuina atu le faasalaga a le faamasinoga i le vaiaso na te’a nei, na faatoese Logovii e tusa ai o lana solitulafono sa faia, ma ia talosagaina ai se isi avanoa sei faaauau ai lana galuega e tausi ai lona aiga.

Na faailoa e lana loia o Leslie Cardin i luma o le faamasinoga e faapea, o lo o maua pea le avanoa o le ua molia e galue ai i le vaa fagota sa galue muamua ai a’o le’i taofia o ia e leolea.

Sa tuuina atu foi e Cardin ni tusi mai ni isi latou te masani ma Logovii e pei o ana uo, o ni isi o le atunuu faapea ai le kamupani sa galue ai, e faailoa ai lo latou lagolagoina o itu lelei e faatatau ia te ia.

Ua maea ona toe tatala i tua Logovii mai le toese.

FAATULAGA LE FAAMASINOGA AUTU O STEPHANIA SULUSULU

O le aso 24 o Mati, 2014 lea ua faatulaga e le Faamasinoga Maualuga e faia ai le faamasinoga autu a Stephania Sulusulu, ina ua le mafai e itu e lua ona taunuu i se maliliega e faamuta ai lenei mataupu.

E ui o lea ua faatulaga le aso e faia ai le faamasinoga autu o lenei mataupu, peitai na fautuaina e le alii faamasino sili ia Michael Kruse loia a itu e lua mo le sailia o se maliliega.

O Sulusulu o lo o tuuaia i le moliaga o lona ave faagaoi o se tinoitupe e $11,900 sa tuuina atu i lalo o lana vaavaaiga e le kamupani a le GHC Reid Company, lea na galue ai.

O le tausaga e 2010 o lo o taua i faamaumauga a le faamasinoga, na amata masalomia ai e se tagata faigaluega a le kamupani e galue i vaega o tupe le faaletonu o le taulimaina e le ua molia o tupe a le kamupani.

Na malie Sulusulu e na te toe totogia le tupe atoa i le kamupani, peitai e tusa ai o faamaumauga a le faamasinoga, e na o le $1,050 ua maea ona ia toe totogia e oo mai i le taimi na faila ai lenei mataupu.

IOE SEALIITU MAUGA JR I ONA MOLIAGA

O le aso 31 Me, 2013 lea ua faatulaga e lau ai le faasalaga a le alii o Sealiitu Mauga Jr i luma o le faamasinoga maualuga, ina ua ia ioeina le moliaga o le faaleaga meatotino i le tulaga muamua, ae solofua e le faamasinoga moliaga o le faaoolima i le tulaga lua ma le faatupu vevesi nofoaga faitele na totoe ai.

I le tali ioe ai o Mauga Jr i le moliaga e pei ona tausala ai o ia e le faamasinoga, sa ia tautino ai e faapea, i se taimi o le aso 20 Ianuari, 2013 i Fatumafuti, na ia faaaogaina ai le suo e ta ai le tioata pito i tua o le taavale a le alii na aafia ma faaleagaina ai.

O le tau o le tioata na faaleagaina e $3,800 e pei ona taua i le vaega o le maliliega a le ua molia ma le malo lea foi ua talia e le faamasinoga.

O lea faalavelave na amata mai i se inugapia ae faaiu i le fusuaga e pei ona molia ai Mauga Jr e le malo.

O lo o taofia pea le ua molia i le toese e faatali ai le aso lea ua faatulaga e lau ai lona faasalaga.