Ads by Google Ads by Google

Tala otooto o Fa’amasinoga

IOE IEREMIA CAMERON I LE MOLIAGA O LE GAOI

 

O le vaiaso na tea nei na talia ai e le Faamasinoga Maualuga le tali ioe a le alii o Ieremia Cameron i le moliaga mamafa o le gaoi, i lalo o se maliliega sa latou sainia ma le malo ma ua ia tautino ai e faapea, i se taimi o le masina o Ianuari 2013 i Nuuuli, sa ia gaoia ai se tupe e tusa ma le $1,680 mai ile Taumafa Store.

 

Ua solofua ai nei moliaga e lua o le moliaga mamafa o le talepe fale i le tulaga muamua ma le faatupu vevesi i nofoaga faitele.

 

Ina ua fesiligia e le alii faamasino ia Michael Kruse ia Ieremia pe fia le tupe sa ia gaoia mai totonu o le masini tupe, na ia tali e na o le $1,300, ona ia ave lea o le $300 i le alii sa la toalua o Wayne Peleiupu.

 

I faamaumauga a le faamasinoga o lo o taua ai e faapea, na ulufale Cameron, 21 tausaga le matua i totonu o le faleoloa, oomi le masini ae sei mai faaputuga ta’i $20 sa i totonu o le masini tupe a’o le taimi lea o lo o savalivali solo le faatauoloa i totonu o le faleoloa.

 

Ua manatu loia o le a faatali le tuuina atu o ni a laua faafinauga mo se faasalaga mama mo le ua molia, sei maea ona la faitau i le ripoti a le ofisa nofovaavaaia.

 

O lo o taofia pea le ua molia i le toese e faatali ai le aso 7 o Iuni, 2013 lea ua faatulaga e lau ai lona faasalaga.

 

SIANINI FOSTER

 

O le aso 16 o Tesema 2013 lea ua faatulaga e faia ai le faamasinoga autu a Sianini Foster, ina ua le mafai e itu e lua ona faia se maliliega e faamuta ai taualumaga o lana mataupu.

 

O Foster o lo o tuuaia e le malo i le moliaga mamafa o le gaoi. O lea moliaga na afua mai i se tagi na faaulu e se tina i le ofisa o leoleo, ona o le keke faaipoipoga e $920 sa ia totogi ia Foster, peitai e oo mai i le aso o le faaipoipoga e leai se keke na maua.

 

I faamaumauga a le faamasinoga o lo o taua ai e faapea, e faatolu ona totogi e le tina o lo o tagi ia tupe ia Foster mo le keke faaipoipo. Sa faailoa ai foi le taimi ma le aso e manaomia ai le keke, ae ina ua oo atu i le aso o le faaipoipoga, sa fiu le aiga e faatali le keke.

 

Ina ua fesiligia e leoleo, sa ia faailoa i ai e faapea, o tupe e lua sa totogi muamua atu e le fafine sa ia teuina i lana teugatupe i le faletupe, ae o le tupe mulimuli na totogi atu, sa ia faaaoga mo ia lava.

 

O lo o tumau pea poloaiga o lo o tatala ai le ua molia i tua e faatalitali ai le taimi ma le aso lea ua faatulaga e faia ai lana faamasinoga autu i luma o tagatanuu o Amerika Samoa.