IOE LE “UNCLE” I TUUAIGA A O LE FAIA O AMIOGA MATAGA

O le “uncle” a se tamaitai e 14 tausaga lea o lo o tuuaia i lona faia o uiga mataga i lea tamaitai, ua ia tautino i luma o le Faamasinoga Maualuga i le vaiaso nei, e faamaonia tuuaiga uma a le malo faasaga ia te ia.

E le o mafai e le Samoa News ona faailoa le suafa o lenei alii ona o puipuiga i le ono aafia o le tamaitai o lo o aafia i lenei mataupu.

O le ua molia na ulua’i tuuaia i moliaga mamafa e lua o le faiaiga ma se teineititi e laititi i lalo o le tulafono, atoa ai ma lona tagofia o itutinosa o se tamaitai e le o faaipoipo i ai, faapea ai ma le moliaga mama e tasi o lona faia lea o ni gaioiga e ono lamatia ai le saogalemu o fanau laiti, ae i lalo o le maliliega sa ia sainia ma le malo, ua ia tali ioe ai i le moliaga muamua o lo o i le pepa o tagi, ae talosaga le malo i le faamasinoga ina ia solofua moliaga e lua o lo o totoe ai.

I le tali ioe ai o le alii ua molia i le moliaga muamua sa ia tautino ai i luma o le faamasinoga e faapea, i se taimi o le masina o Ianuari 2012 i Amerika Samoa nei, sa la faiaiga ai ma se tamaitai e 14 tausaga le matua.

O le mataupu faasaga i le alii ua molia na tofu atu i le ofisa o leoleo ina ua faafesootai e le tina o le tamaitai na aafia leoleo mo se fesoasoani, ina ua fiu e saili lana tama ae te’i ina ua ia vaaia o lo o savavali faatasi mai ma le ua molia i le togavao e le mamao ese ma le latou fale.

O lo o taofia pea le ua molia i le toese e faatali ai le aso lea ua faatulaga e lau ai lona faasalaga i le masina fou.