FAATULAGA FAAMASINOGA AUTU O ALII LEOLEO E TOALUAUa maea nei ona faatulagaina e le Faamasinoga Maualuga le aso e faataunuu ai faamasinoga autu a alii leoleo e toalua mai le toese i Tafuna, lea ua tuuaia i lo la fesoasoani i le faasolaina o ni pagota mai i le falepuipui.O alii leoleo o Rocky Tua ma Fiti Aina o lo o tuuaia e le malo i moliaga taitolu, ona o tuuaiga i lo la faatagaina o se pagota e alu e faatau mai ni a latou pia, meaai ma pepa telefoni.O lo o tumau pea tuutuuga o lo o tatala ai i laua nei i tua e faatali ai le aso o la laua faamasinoga autu.FA’ASALA I LE TOESE TAMA’ITA’I SA GALULUE KAMUPANI INISIUAO tamaitai e toalua ia na la ave faagaoi le silia i le $10,000 mai le kamupani Inisiua a Florence Saulo, ua faasala e le faamasinoga e loka i faaiuga o vaiaso e lima, o se tasi lea o tuutuuga o le la nofovaavaaia e lima tausaga.O le itula e 6:00 i le afiafi nei lea ua faamoemoe e amata tuli ai lea faasalaga, seia oo atu i le 6:00 i le afiafi o le Aso Sa.O Herema Taupau ma Priscilla Toelei’u na tausala e le faamasinoga i le moliaga o le ave faagaoi o ni tupe sa tuuina atu i lalo o le la vaavaaiga, ma o lea solitulafono e mafai ona faasala ai se tasi i le toese mo le umi e le silia i le lima tausaga, pe faasala foi i se salatupe e le silia i le $5,000, poo faasalaga uma e lua.O Taupau ma Toelei’u na galulue i le kamupani Inisiua a Florence Saulo i le taimi na tulai mai ai le faalavelave, ae i le taimi na lau ai le la faasalaga, na saunoa ai le alii faamasino sili ia Michael Kruse e faapea, e tusa ai o se faamatalaga a le pule o le kamupani Inisiua i le Ofisa Faanofovaavaaia, e le o manao e faa falepuipui i laua nei, sei vagana ai le toe totogi atu o le tupe na la aveese mai i le kamupani.E tolu tausaga na manatu le faamasinoga e faasala ai i laua nei i le falepuipui, peitai o le a faamalumalu le tuliga o lea faasalaga, ae faanofovaavaaia i laua mo le lima tausaga i lalo o poloaiga a le faamasinoga.O ni isi o ia poloaiga e aofia ai le taofia o i laua i le falepuipui mo le tausaga atoa, peitai ua finagalo le faamasinoga, ua lava faaiuga o vaiaso e 5 e loka mo’i ai laua, ma ua poloaina foi i laua e totogi e le tagata e toatasi le $6,150 agai i le kamupani mo tupe na la faaaogaina.IOE HYMEI SEFO I TUUAIGA A LE MALOO le masina o Mati lea ua faatulaga e lau ai le faasalaga o Hymei Sefo, ina ua na ioeina tuuaiga na faasaga ia te ia, i lona taliaina o ni oloa sa ave faagaoi e ni isi tagata.O Sefo na tuuaia i moliaga o le talepe fale i le tulaga muamua, fesoasoani i se isi tagata e faatino le solitulafono o le talepe fale, atoa ai ma le talia o oloa na ave fagaoi e isi tagata.I le tali ioe ai o Sefo i le moliaga e tasi lea ua tausala ai o ia e le faamasinoga, na ia tautino ai e faapea, i se taimi o le tausaga na tea nei, na ia maua mai ai ia Mu Matuu se komipiuta feavea’i, ae talu ai e lei manao e maua e leoleo o ia ma lea komipiuta, o lea na ia tiaia ai.Ua malie Sefo o le a ia totogia le $1,400 i le Matagaluega o Aoga a le malo, mo le tau o le komipiuta sa ia tiaia, ua ia malamalama foi, afai e tuuina mai se faasalaga a le faamasinoga e tusa ai o le solitulafono ua ia tautino ai ae le tusa ai ma lona loto, e le mafai ona toe suia lana tali ioe ua tuuina atu i le faamasinoga.Ua malilie foi loia a itu e lua, o le a tuuina atu i le faamasinoga ni a laua faafinauga mo se faasalaga mama mo le ua molia.O Sefo na tuuaia e le malo i le talepeina o le faleoloa o FJP Kruse i Leone, atoa ai ma le talepeina o le faleaoga a le aoga maualuga a Leone.Ina ua fesiligia e leoleo, na ioeina ai e Sefo lo latou osofaia ma ni isi alii se toalua le faleoloa, lea na tu ai i fafo e vaai ni isi e o atu ao faatino e isi alii e toalua le solitulafono o le talepe ma gaoi le faleoloa. O lo o taofia pea Sefo i le toese i Tafuna e faatali ai le aso lea ua faatulaga e fofogaina ai lona faasalaga.