Ads by Google Ads by Google

Tala otooto o Fa’amasinoga

POLOA’I FAAMASINOGA SE ALII E TUUA LE ATUNUU MO LE TAUSAGA ATOA

 

E tasi le tausaga lea ua poloaina ai e le alii faamasino o Elvis P. Patea le alii o Osooso Kilisi na te tuua ai le teritori o Amerika Samoa ma o lea tuutuuga, o se tasi o poloaiga o lona nofovaavaaia mo le lua tausaga, ina ua faamaonia e le faamasinoga le moliaga o le ave taavale ‘ona.

 

O le masina na te’a nei na loka ai e leoleo le ua molia ina ua maua o lo o ia faafoea se taavale ae o lo o ‘ona, ae ina ua saili e le faamasinoga faamaumauga a le Ofisa o Femalagaaiga na maua ai, e le o toe lelei ona pepa nofomau.

 

Na faatoese Osooso i luma o le faamasinoga, e tusa ai o lana solitulafono sa faia, ma ia talosagaina ai se isi avanoa  lea na talia e le faamasinoga.

 

O aso e 24 na taofia ai Osooso i le toese talu mai le taimi na loka ai, o le a faaaoga e avea ma ana faasalaga, ma ua faamoemoe o le Aso Tofi o le vaiaso nei na te tuua ai le atunuu ae toe foi atu i Samoa.

 

O Osooso o lo o nofovaavaaia i luma o le Faamasinoga Maualuga, ina ua faamaonia e le faamasinoga le solitulafono o le gaoi na tuuaia ai o ia, ona o le faalavelave lea na ia osofaia ai le Yacht Club i Utulei i le masina o Oketopa 2009.

 

O le masina o Ianuari 2010 na faasala ai e le faamasinoga le ua molia i le toese mo le 7 tausaga, peitai na faamalumalu lea faasalaga ae nofovaavaaia o ia mo le 7 tausaga i lalo o tuutuuga, e na o le 6 masina e loka mo’i ai o ia i le toese, atoa ai ma le faasa lea ona ia toe tagofia i le ava malosi.

 

Na faailoa e le faamasino sili ia Osooso i le aso na lau ai lona faasalaga e faapea, na te toe tagofia loa le ava malosi, o le aso lava fo’i lea e faati’eti’e ai o ia i le va’a ma toe fa’afo’i atu i Samoa.

 

TETEE COLIN BODE I TUUAIGA A LE MALO

 

Na teena e Colin Bode le moliaga mamafa e tasi o lo o tuuaia ai o ia e le malo, ina ua tulai i luma o le faamasinoga maualuga i le taeao ananafi. I lona teena ai o tuuaiga a le malo, ua faatulaga ai loa lana ulua’i iloiloga e faia lea i le faaiuga o le masina fou, lea o le a iloilo ai e le faamasinoga ni faafinauga e itu e lua, i le ono tuuina atu lea o lenei mataupu e faataunuu sona faamasinoga autu, poo le faia foi lea o se maliliega ma le malo e faamuta ai lenei mataupu.

 

O le aso Gafua na te’a nei na faataunuuina ai le ulua’i iloiloga o le mataupu a Bode i luma o le alii faamasino ia Elvis P. Patea, mo le tau sailia pe lava mau a le malo e lagolago ai sa soli le tulafono, ae poo Bode foi lea o lo o tuuaia i le soliina o le tulafono.

 

I le maea ai o lea iloiloga, na faaiuina ai loa e le alii faamasino le lava o mau a le malo e lagolago ai lenei mataupu, ma tuuina atu ai loa i luma o le faamasinoga maualuga.

 

O Bode o lo o tuuaia i le moliaga e tasi o lona umia faasolitulafono o se vaega o le pauta faasaina o le aisa, ona o le faalavelave lea o lo o masalomia ai o i le taga pepa sa i ai vaega o le aisa na maua i totonu o le Ofisa o le Tiute i le malae vaalele i Tafuna.

 

Na muamua tuuaia e le malo ia Bode i le moliaga o lona umia faasolitulafono o mariuana, ina ua maua ia te ia se afifi mariuana ina ua taunuu mai le malaga a le Hawaiian Air i le po o le aso 8 Mati, 2013, ma taofia ai loa o ia i le toese i Tafuna.

 

Ao i ai o ia i le toese, sa ia faamatala i se alii pagota e faapea, sa ia te ia foi se taga pepa na i ai se vaega o le aisa, peitai na vave ona ia tia’i ese ina lea taga pepa i totonu o le Ofias o le Tiute, a’o le’i oo i le taimi na siaki ai lona tino e alii Ofisa Tiute.

 

O lo o tumau pea tuutuuga o lo o tatala ai le ua molia i tua e faatali ai le aso lea ua toe tolopo i ai lana mataupu.

 

NOFOVAAVAAIA LUFILUFI MO LE 24 MASINA

 

E 24 masina lea ua nofovaavaaia ai Lufilufi Peneueta i lalo o tuutuuga mai le Faamasinoga Faaitumalo, ina ua ta’usala e le faamasinoga o ia i le solitulafono o le faatupu vevesi i nofoaga faitele i le maea ai o lana faamasinoga iloilo na faatautaia e le alii faamasino o Elvis P. Patea, o ia foi lea na tuuina atu le faasalaga mo le ua molia.

 

Ao lei tuuina atu le faasalaga a Peneueta, na maua lona avanoa e faatoese ai i le faamasinoga e tusa ai o le solitulafono sa ia faia. Sa ia faatoese foi i ona aiga na aafia i lana solitulafono.

 

Na taua e le alii faamasino e faapea, e le o se taimi muamua lea ua tulai ai le ua molia i luma o le faamasinoga ona o tuuaiga i lona faatupuina lea o le vevesi. I faamaumauga a le faamasinoga o lo o taua ai, o le tausaga e 2006 ma le 2009 na molia muamua ai fo’i le ua molia i le moliaga lava lea e tasi.

 

Na finau le loia a le malo ia Lornalei Meredith-Fanene e nofovaavaaia le ua molia mo le 24 masina, atoa ai ma le 45 aso e loka ai o ia i le toese, ae i le faasalaga a le faamasinoga, ua nofovaavaaia ai Peneuta mo le 24 masina i lalo o poloaiga e ao ona usita’i i ai.

 

E 20 aso na manatu le faamasinoga e loka ai le ua molia i le toese, peitai o le a faamalumalu le faataunuuina o lea faasalaga, pe afai na te usitaia poloaiga ua tuuina atu ia te ia.

 

E $500 le salatupe na manatu le faamasinoga e totogi e le ua molia, peitai ua faamalumalu lona totogiina o le $300, ae lava na o le $200 e totogi faatasi ai ma le $25 mo le totogi o le faamasinoga.

 

O isi tuutuuga a le faamasinoga mo le ua molia e aofia ai le tausiaina o le filemu i soo se taii, ma ia auai i ni aoaoga e faatonutonu ai le tulaga o le ita. Na faamamafa e Patea ia Peneueta le tatau lea ona ia usita’i i poloaiga a le faamasinoga ua tuuina atu ia te ia.

 

O tuuaiga ua ta’usalaina ai le ua molia na afua mai i se faalavelave na tulai mai i Faleniu, ina ua o atu le ua molia ma ni isi o lona aiga e tuuina atu se tusi e aveese ai le aiga na aafia mai le fanua.

 

Na taua i faamaumauga a le faamasinoga le tago o le ua molia ma una’i le tina o le tamaitai na aafia aga’i i le faitotoa o le latou fale.