Ads by Google Ads by Google

Tala otooto o Fa’amasinoga

TE’A I TUA ALII PAGOTA NA TAOFIA I LE FALEMA’I

 

Ua te’a i tua mai le falema’i i Fagaalu ni alii pagota se toalua ia na sipaka i se uaea eletise i le vaiaso na tea nei, ma ua taua i se ripoti le faasolosolo manuia o i laua.

 

E ui e le o mafai ona faalauiloa igoa o mei alii pagota, peitai na faamaonia mai e le ali komesina o Leoleo ia William Haleck i le Samoa News e faapea, o alii pagota na aafia i le faalavelave ua toe tulaga manuia i laua, ma ua toe faafo’i atu i la’ua i le toese.

 

Na tula’i mai lenei faalavelave a’o fesoasoani nei alii pagota i alii leoleo i le sisiga o le fu’a i luma o le Ofisa o Leoleo i Tafuna, lea na pa’u ai se tasi o pou o le fu’a i luga o se uaea eletise ma sipaka ai i la’ua.  Na ta’ua e le alii komesina, o lenei faalavelave faafuasei na tula’i mai ina ua le faaeteete alii pagota i le taimi na la sisiina ai le fu’a i luga o le pou.

 

Na taua e se molimau e lei finagalo e faailoa lona suafa e faapea, o alii pagota na aafia o lo o avea o ni pagota faatuatuaina (trustees) e fesoasoani i leoleo i le tele o taimi i galuega ma mea e manaomia ai la laua fesoasoani.

 

TALIA LE TALOSAGA A LE LOIA A STERLING FUGA

 

Ua talia e le Faamasinoga Maualuga le talosaga na faaulu e le alii loia fautua ia Mike White o lo o tulai mo Sterling Fuga, ina ia toe tolopo sona iloilo, ae se’i faia se suesuega faapitoa i lona mafaufau e faamaonia ai pe ua gafatia lona malosi faalemafaufau e tali ai fesili e faatatau i ona moliaga.

 

O le vaiaso na nei na fuafua e fofogaina ai i luma o le faamasinoga se maliliega ua maea ona sainia e le malo ma le alii o Fuga, peitai ina ua valaau le mataupu mo le fofogaina o le maliliega aufaatasi.

 

Na taua e White e faapea, i le tele o taimi na talanoa ai ia Fuga e uiga i le ofa a le malo, sa manino mai ai le le malamalama o le ua molia i le tulaga o moliaga o lo o tuuaia ai o ia.

 

O Fuga o lo o tuuaia i le moliaga mamafa e lua o le gaoi ma le talepe fale, ona o se faalavelave na tulai mai i le aso 16 o Ianuari 2013 i Leone, ina ua ia ulufale faamalosi i totonu o le fale o se aiga ma gaoi se meaalofa atoa ai ma le $4 sa i luga o le laulau.

 

Na taua e le fafine e ana le fale i leoleo e faapea, ina ua ia faalogoina se pao mai luma o le latou fale, sa le’i manatu mamafa i ai, peitai ina ua ia toe faalogoina le pao faalua, sa savali mai loa i le pito i tua o le fale ma e fetaui lava lona taunuu ane i le potu malolo ae ona vaaia loa Fuga ua savali ese mai ma le faitoto’a o le latou fale, o lo o uu i lona lima le meaalofa sa i luga o le fata.

 

TUUAIA SEFO AMITUANA’I I LE AVE TAAVALE A’O SE’I LANA LAISENE

 

O le vaiaso nei na faila ai e le malo le moliaga mamafa faasaga i le alii o Sefo Amituana’i, o le ave taavale a’o se’i le laisene, o se solitulafono e mafai ona faasala ai se tasi i le toese mo le le silia i le 5 tausaga, ae faamalosia ai le tuli o aso e 90 i le toese, pe faasala foi i le salatupe e le silia i le $5,000.

 

O Amituana’i o lo o nofo vaavaaia mo le 12 masina talu mai Ianuari ina ua faamaonia e le faamasinoga faaitumalo lona moliaga o le ave taavale ‘ona sa molia ai o ia e le malo i le masina o Tesema 2012.

 

I le aso na faasala ai Amituana’i e le alii faamasino ia John L. Ward II, sa fautuaina ai o ia ina ia le toe aveina se taavale ao se’i ai lona laisene mo le ono masina. Sa faailoa foi e le faamasinoga ia Amituana’i, afai ae maua o ia o lo o ia faafoeina se taavale a’o se’i lana laisene, o le a mafai ona molia o ia e le malo i le moliaga mamafa o le ave taavale a’o se’i lona laisene.

 

O le masina o Mati na te’a nei na taofi ai e leoleo se taavale pikiapu ina ua alu saoasaoa i luga o le auala i Tafuna, ma maitauina ai e leoleo o lo o ‘ona le ave taavale i le taimi na taofia ai lana taavale.

 

Ao faaauau pea suesuega a leoleo na manino ai, o le ave taavale o ia lea o Amituanai, ma o lo o se’i foi lona laisene ave taavale.

 

O lo o tatalaina pea i tua Amituana’i e faatali ai le taimi lea ua faatulaga e toe fofogaina ai lana mataupu i luma o le faamasinoga i le faaiuga o le masina nei.

 

FAASALA MATTHEW IFOPO I LE $300

 

O le alii mai Tafuna lea na molia i le solitlafono o le faaoolima i le tulaga tolu, ona o le faalavelave lea na ia sasaina ai le papatua o le isi tamaloa o lona aiga i le suo, e mafua mai i ni feeseeseaiga i totonu lava o le aiga, ua faamalumalu le tuuina atu o ia e le faamasinoga i le falepuipui, ae ua faanofovaavaaia mo le 12 masina i lalo o poloaiga a le faamasinoga e ao ona usitai i ai.

 

O se tasi o ia tuutuuga e aofia ai lona alu e faatoese i le na aafia, totogi le salatupe e $300 ma ia tausi le filemu i totonu o lona aiga.

 

Ua poloaina foi o ia ina ia aua nei ona toe faatupuina se vevesi i le va o ia ma le alii na aafia, ua faasa foi ona ia toe soliina se isi tulafono a le malo.

 

E lei ona le ua molia i le taimi na tupu ai le faalavelave, e le’i aafia fo’i le na aafia i ni manu’a tuga ona o le faalavelave na tulai mai.