Ads by Google Ads by Google

Tala otooto o Fa’amasinoga

TETE’E GA’OTALA I TU’UAIGA A LE MALO

 

Na teena e Lizza Ga’otala tu’uaiga a le malo ina ua tulai i luma o le Faamasinoga Maualuga i le taeao ananafi mo lana ulua’i iloiloga ma ua faatulaga ai leisi ana iloiloga mo le aso 17 o Iuni, ina ua talia se talosaga a lana loia, o Mike White, mo le tolopoina o le mataupu mo seisi 45 aso.

 

O gaotala o lo o molia i moliaga mamafa e lua o le gaoi ma lona ave faagaoi o ni tupe sa tuuina atu i lalo o lana vaavaaiga, ina ua faila e le Peresetene o le Asosi a Matua ma Faiaoga (PTA) a le Aoga Maualuga a Samoana se tagi i le ofisa o leoleo, ona o se vaega tupe a le PTA e tusa ma le $2,200 na leiloa talu mai le amataga o le tausaga na te’a nei.

 

I faamaumauga a le faamasinoga o lo o taua ai e faapea, o se fonotaga a le PTA ia Tesema 2012, na malilie ai ina ia oo atu i le aso 31 Ianuari 2013 ua maea ona toe totogi e le ua molia le tupe, peitai e tuana’i le taimi lea e leai se tupe ua totogi.

 

O lo o tumau pea tuutuuga a le faamasinoga o lo o tatala ai le ua molia, e faatali ai le aso lea ua faatulaga e toe valaau ai lana mataupu.

 

SAUNI RYAN PITE E TALI IOE I ONA MOLIAGA

 

O le aso 17 o Me lea ua faamoemoe le itu a le malo e tatau ona oo atu i ai ua maea ona faila i luma o le faamasinoga la latou maliliega lea o le a sainia ma le alii o Ryan Pite ma faamuta ai loa talanoaga e uiga i lenei mataupu.

 

Ina ua valaau le mataupu a le ua molia i luma o le faamasinoga maulauga ananafi, na talosagaina ai e le loia a le malo ia Cammil Philippe le faamasinoga e toe tolopo le valaaulina i le mataupu, ae se’i faamaea a latou talanoaga ma le ua molia e faatatau i la latou maliliega lea ua toeititi maea.

 

Na taua e Philippe, e tatau ona oo atu i le masina fou ua maea ina faila la latou maliliega ma fofogaina loa i luma o le faamasinoga.

 

O lo o tuuia Pite i le moliaga o le faaoolima i le tulaga muamua, ona o le faalavelave lea na ia faaoo ai manu’a i le isi alii pagota sa loka faatasi i laua i le potu e tasi.

 

O se feeseeseaiga i le va o Pite ma le alii pagota lea e mafua mai i ni tala sa felafoa’i, ma faai’u ai loa i le faaaoga e le ua molia o se fasi u’amea maai e ta tui ai le manava o le alii na aafia.

 

E tupu le faalavelave e pei ona tuuaia ai Pite o lo o tuli lana faasalaga faa falepuipui i le toese i Tafuna, ona o le solitulafono o le talepe fale ma le gaoi na ta’usala ai o ia e le faamasinoga.

 

O lo o taofia pea Pite i le toese i Tafuna e faatali ai le aso lea ua faatulaga e toe fofogaina ai lana mataupu.

 

FAAAUAU PEA SUESUEGA A LEOLEO

 

E oo mai lava i le aso ananafi e le’i maea lava suesuega a le Matagaluega o Leoleo, faasaga i le mataupu lea na faaoolima ai ni alii mai Fagatogo i se alii e le atoa le malosi o le tino ma le mafaufau i le maketi i Fagatogo i le po o le aso Faraile na te’a nei.

 

Na taua e le sui komesina o leoleo ia Leseiau Laumoli e faapea, e le’i maea suesuega a leoleo e faatatau i le mataupu, ona o lo o taumafai pea e fesiligia molimau e uiga tonu i le faalavelave na tulai mai.

 

Saunoa Laumoli e faapea, e le o i ai se tagata poo ni tagata ua masalomia e faatatau i lenei faalavelave.

 

E oo mai lava i le taimi nei e le o manino lelei ni isi o le aufai faatoaga sa i ai i le maketi i le taimi na tupu ai le faalavelave, i le mafuaaga tonu o lenei faalavelave, pau la latou talosaga, ua tatau ona vaavaai le pulega o le maketi atoa ai ma le pulega a alii ma faipule o Fagatogo i ni auala e foia ai faafitauli faapenei e toe tulai mai i le lumana’i, e pei o le faa faigaluegaina lea o ni Leoleopo e galulue 24 itula i le maketi i faaiuga o vaiaso.