MOLIA LEROY FUIMAONO I LE GAOI

Ua tuuaia nei e le malo le alii o Leroy Fuimaono i le moliaga mamafa o le gaoi, e mafua mai i le fa’alavelave lea na ia gaoia ai ni ‘screwdrivers’ se 8 e ta’i 4 inisi le uumi mai le faleoloa o le TSM Mart i Tafuna e aunoa ma le totogiina.

O lenei mataupu na tofu atu i le Ofisa o Leoleo i Tafuna, ina ua talosagaina e le pulega a le faleoloa o le TSM se fesoasoani a leoleo.

I faamaumauga a le faamasinoga o loo taua ai e faapea, i le taeao o le aso 7 Aokuso, na maua e le aufaigaluega a le TSM Mart i luga o le latou masini pu’e ata gaioiga a le ua molia sa faia, i lona tu’u lea o ni ‘screwdrivers’ se 8 i totonu o le taga o lona ofu sa fai ma alu loa ma ia i fafo, e aunoa ma le totogiina o ia oloa i luma o le fa’atauoloa.

Na maua e leoleo le ua molia ma latou fesiligia loa e tusa ai o lenei mataupu, lea sa ia ta’utino ai e fa’amaonia tu’uaiga fa’asaga ia te ia.

I luma o le fa’amasinoga maualuga i le vaiaso nei, na teena ai e Fuimaono le moliaga e tasi ua tuuaia ai o ia, ma faatulaga ai loa lana ulua’i iloiloga e faia lea i le masina fou o Setema, ae o loo taofia pea o ia i le toese i Tafuna, se’i vagana ua totogi le $10,000 ona fa’atoa mafai lea ona tatala o ia i tua.

O le moliaga mamafa o le gaoi, e mafai ona faasala ai se tasi i le toese mo le umi e le silia i le 7 tausaga, pe faasala foi i le salatupe e le sili atu i le $5,000, pe afai ae fa’amaonia e le fa’amasinoga le solitulafono.

IOE NICHOLAS KUKA I TU’UAIGA FA’ASAGA IA TE IA

O le aso 9 Oketopa lea ua fa’atulaga e tu’u atu ai le fa’asalaga a le fa’amasinoga maualuga fa’asaga i le ali’i o Nicholas Kuka, i le mae’a ai lea ona ta’usala o ia i le moliaga o lona faia lea o uiga mataga fa’afeusuaiga fa’asaga i se tama’ita’i e laititi i lalo o le tulafono.

I le tali ioe ai o Kuka i le moliaga e pei ona ta’usala ai o ia e le fa’amasinoga maualuga, sa ia ta’utino ai e fa’apea, i le va o le aso 22-23 o Aperila 2015 i Amerika Samoa, sa ia faia ai uiga mataga fa’afeusuaiga ma se tama’ita’i e laititi i lalo o le tulafono, ma o le gaioiga sa ia faia sa le tusa lea ma ala o le tulafono.

O Kuka, 21 tausaga le matua o loo tu’uaia fa’atasi e le malo i le mataupu lenei ma se tama’ita’i e 22 tausaga le matua, i lo la faia lea o uiga mataga i le tama’ita’i talavou o loo a’afia i lenei mataupu.

O le mataupu lenei na tofu atu i le ofisa o leoleo, ina ua faila e le tina o le tama’ita’i na a’afia sana tagi i le ofisa o leoleo fa’asaga ia Kuka, i lona faia o uiga mataga fa’afeusuaiga i lana tama, i le taimi na sola ese ai le tama’ita’i mai lona aiga.

Ae ina ua fesiligia e leoleo le tama’ita’i na a’afia i le mafua’aga na sola ese ai mai lona aiga, ma mafua ai ona tula’i mai le fa’alavelave e pei ona molia ai Kuka, sa tali le tama’ita’i na a’afia, sa sola ese ona o lona fefe i lona tausoga (le tama’ita’i o loo molia fa’atasi ma Kuka), ina ua ia faia uiga mataga ia te ia e aofia ai le tagofia o ona itutinosa.

I le talia ai e le fa’amasinoga maualuga o le tali ioe a Kuka, na talosaga ai loa le malo i le fa’amasinoga ina ia solofua uma isi moliaga o loo totoe ai i le pepa o le tagi sa latou fa’aulu fa’asaga ia Kuka, ma o loo taofia pea le a molia i le toese e fa’atali ai le aso lea ua fa’atulaga e lau ai lana fa’asalaga.