TU’UAIA TAMAITAI UIGA LE MANUIA

O le tama’ita’i lea o loo tu’uaia e le malo i lona faia o uiga mataga i se isi tama’ita’i e 16 tausaga le matua, ua molia nei o ia i moliaga mamafa e tolu e aofia ai lona faia o amioga fa’asotoma, tagofia o itutinosa o se tama’ita’i, atoa ai ma lona faia o ni uiga mataga fa’afeusuaiga.

Na teena e le tama’ita’i ua molia tu’uaiga a le malo fa’asaga ia te ia, ina ua tulai i luma o le fa’amasinoga maualuga i le taeao ananafi.

I lona teena ai o tu’uaiga fa’asaga ia te ia, ua fa’atulaga ai loa e le fa’amasinoga lana ulua’i iloiloga e faia i le fa’aiuga o le masina fou o Iulai, ma o loo taofia pea o ia i le toese i Tafuna, ina ua ia le mafai ona totogi le $20,000 ua fa’atulaga e tatala ai o ia i tua.

O le mataupu lenei na tofu atu i le Ofisa o Leoleo i le aso 23 Aperila 2015, ina ua faila e le aunty o le tama’ita’i na a’afia sana tagi i le ofisa o leoleo, fa’asaga i se ali’i e 21 tausaga le matua sa ia faia ni uiga mataga fa’afeusuaiga i le tama’ita’i na a’afia, i le taimi na sola ese ai le tama’ita’i lea mai le latou aiga.

Na fesiligia e leoleo le tama’ita’i na a’afia pe aisea na sola ese ai mai le aiga o lona aunty sa nofo ai, lea lava ua avea ma ona aiga, ae na fa’ailoa e le tama’ita’i na a’afia i leoleo e fa’apea, na mafua ona sola ese, ona ua faia e le tamaita’i ua molia uiga mataga ia te ia, ma mafua ai loa ona alu ese ma le aiga, ae la fetaui ai loa ma le ali’i e 21 lea na la o i lona aiga i Malaeloa ma la faiaiga ai.

Na taua e le tama’ita’i na a’afia i leoleo e fa’apea, ao moe i le latou fale i le po o le aso 22 Aperila 2015, na fa’ateia o ia ina ua tago atu le tamaitai ua molia ia te ia ma tago atu i lona itutinosa, ma i’u ai lava i lona fa’asaga atu ua fai uiga mataga ia te ia.

Na avea le fefe o le tama’ita’i ua aafiai amioga na fai atu ia te ia ma itu na sola ese ai loa ma le latou aiga, ma tula’i mai ai loa le fa’alavelave e pei ona faia ai e le ali’i o Nicholas Kuka uiga mataga fa’afeusuaiga ia te ia.

Ina ua fesiligia e leoleo le tamaita’i ua molia e tusa ai o lenei mataupu, sa ia ioeina ai lona faia o uiga mataga fa’afeusuaiga i le tama’ita’i na a’afia, e ala lea i lona tagofia o ona itutinosa.

Na ia taua atili i leoleo e fa’apea, o le gaioiga sa ia faia sa le tusa lea ma ala o le tulafono, sa ia faia fo’i e aunoa ma le malie i ai o le tama’ita’i na a’afia.

TALIA FA’AMASINOGA LE TALOSAGA A MAFOA MIKAELE

Na talia e le fa’amasinoga maualuga i le taeao ananafi le talosaga a le ali’i o Mafoa Mikaele, o lona tina, Ofisa Nofovaavaaia fa’apea ai loia fautua, ina ia taofia le toe tu’uina atu o ia i le falepuipui mo se isi umi, ae tatala loa o ia i tua e alu e saili sana galuega e tausi ai lona tina, ae ua lava le 9 ma ona tupu masina lea na taofia ai o ia i le falepuipui e fai ma ana fa’asalaga i le mataupu e pei ona ta’usala ai o ia.

O Mikaele na ta’usala e le fa’amasinoga i le masina o Me na te’a nei i le solitulafono mamafa o lona umia fa’asolitulafono lea o vaega o le laau fa’asaina o le mariuana, i lalo o se maliliega sa latou sainia ma le malo lea fo’i na talia e le fa’amasinoga.

Ao lei tuuina atu le faasalaga a le fa’amasinoga ananafi, na faatoese le ua molia e tusa ai o lana solitulafono sa faia, ma ia talosagaina ai le faamasinoga mo se isi avanoa sei toe foi ai e saili sana galuega e tausi ai si ona tina, pe toe faaauau fo’i lana aoga e saili ai se lumana’i manuia mo ia.

Na ta’utino le ua molia e faapea, o masina e tele sa taofia ai o ia i le toese, ua fai lea ma lesona aoga mo ia i le lumana’i, ma ua ia lagonaina ai, o le toese, e le o se nofoaga lelei lea mo se tagata talavou e pei o ia.

Na ta’utino Mikaele i luma o ali’i fa’amasino, o le taimi muamua ma le mulimuli fo’i lenei o le a toe tula’i ai i luma o le fa’amasinoga.

Na talosaga fo’i si ona tina i le fa’amasinoga mo se avanoa e toe tatala atu ai Mikaele i tua e fesoasoani i lo la aiga. Na taua e le tina i le fa’amasinoga e fa’apea, na maliu le tama o le aiga fa’atoa 2 tausaga o Mikaele, ao lenei ua 19 tausaga lona matua, na o laua lava fo’i lo la aiga.

I lona nofo to’atasi ai na o ia, sa le lelei sana moe i lona misia o si ana tama, atoa ai ma lona mana’omia o ia i totonu o le aiga.

Sa ia taua fo’i e fa’apea, ua uma ona ia folafola i lana tama, afai ae toe tula’i mai se isi solitulafono faapenei ia te ia i le lumana’i, na te le toe vaaia ona foliga o alu atu e asi atu o ia i le falepuipui poo luma o le fa’amasinoga.

Na tutu fa’atasi le loia a Mikaele ia Joel Shiver ma le loia a le malo ia Jessica Bargmann e talosaga i le fa’amasinoga e faanofovaavaaia le ua molia, lea fo’i na talia e le faamasinoga, ma nofovaavaaia ai loa Mikaele mo le 5 tausaga i lalo o poloaiga e ao ona ia usita’i i ai.

O ni isi o ia poloaiga e aofia ai lona tuliina o le umi e 9 masina lea ua oo mai i le taimi nei ua mae’a ona ia tuliina, atoa ai ma lona totogiina o le salatupe e $1,000 i totonu o le 12 masina.

Ua poloaina fo’i o ia e saili sana galuega tumau, aua ne’i ona toe tagofia le ava malosi poo fualaau faasaina, a ia avea o ia ma tagatanu’u e tausisi i tulafono a le malo i taimi uma.