Ads by Google Ads by Google

Tala otooto o Fa’amasinoga

TU’I FAATAUOLOA AE GAOI FAGUPIA

 

O le alii talavou lea o lo o tuuaia i lona tu’ia o se faatauoloa i se faleoloa i Pago Pago, ae ave faamalosi ni fagupia mai totonu o le pusa aisa o le faleoloa, ua molia nei e le malo i le moliaga mamafa e tasi o le faomea i le tulaga lua ma moliaga mama e iva e aofia ai le moliaga e tasi o le gaoi;  moliaga e tolu o le faaoolima i le tulaga tolu; moliaga e lua o lona tuuina atu o le ava malosi i fanau laiti; faatupu vevesi i nofoaga faitele,; faaleaga meatotino i le tulaga tolu; atoa ai ma lona tagofia o le ava malosi ae le’i atoa lona 21 tausaga.

 

O le vaiaso na tea nei na tulai ai i luma o le Faamasinoga Maualuga le alii o Andrew Peters ma ia teena moliaga faasaga ia te ia, ma ua faatulaga nei lona ulua’i iloiloga e faia i le faaiuga o le masina nei.

 

O lenei mataupu na tulai mai i le amataga o le masina na te’a nei, peitai o lea faatoa maua e leoleo le ua molia i le vaiaso na te’a nei.

 

O se fusuaga na tulai mai i le va o tamaitai talavou se toalua sa inu faatasi ma Peters, na vili ai e ni isi o le nuu leoleo mo se fesoasoani.  Ae ina ua taunuu leoleo, sa na’o tamaitai talavou sa maua atu ai.

 

Ae pe tusa o le latalata i le 8:00 i le po lava lea, na toe maua ai foi e leoleo se isi telefoni mai Pago Pago, e faatatau i se tagata o lo o fasi e Peters i luma o le faleoloa o le Shinning Stars.

 

Na taunuu leoleo ma latou fesiligia ai ni molimau e silia ma le toafa sa i ai i luma o le faleoloa i le taimi na tulai mai ai lenei faalavelave.  Na taua e se tasi o molimau e faapea, na latou vaaia le ua molia ua savali atu ma tu’i le gutu o se alii sa tutu ai i luma o le faleoloa e aunoa ma se mafuaaga.

 

Fai mai molimau, ina ua maea le gaioiga lea a Peters, sa laa loa i totonu o le faleoloa ma tu’i foliga o se alii Asia  faatauoloa ma pa’u ai lea alii i totonu o le pusa aisa o lo o matala.

 

Na toe savali Peter ma u’u mai fagu pia e lua mai totonu o le pusa aisa, ma toe aga’i mai i fafo o le faleoloa e aunoa ma le totogia o nei fagu pia, e pei ona ta’ua i faamauamauga a le faamasinoga.

 

E toatolu isi molimau sa latou faamaonia le faamatalaga a le molimau muamua.  Sa taua foi e molimau i leoleo lo latou vaaia le ova o le ‘ona o Peters.

 

Na mafai foi e leoleo ona faaaoga faamaumauga sa maua i masini pu’e ata a le faleoloa e fesoasoani ai i le lagolagoina o faamatalaga a molimau e faatatau i lenei mataupu.

 

O lo o taofia pea i le toese i Tafuna le alii o Peters, sei vagana ua ia totogi le $50,000 ona faatoa mafai lea ona tatala o ia i tua mai le toese, afai foi e mafai ona tatala o ia i tua, ua faasa ona ia taumafai e faafesootai molimau a le malo o lo o taua i faamaumauga a le faamasinoga, ua faasa foi ona toe alu i le faleoloa na tulai mai ai le faalavelave.

 

TUUAIA IAKOPO I LE TALEPE FALE MA LE GAOI

 

O le alii lea na toalua i ai alii o lo o masalomia i le osofaia o se fale i Mesepa i le masina o Ianuari 2013, ua molia nei i le solitulafono mamafa o le  talepe fale i le tulaga muamua faapea ai ma le solitulafono o le gaoi.

 

O tuuaiga faasaga ia Joseph Iakono na afua mai i le faalavelave lea na tulai mai i le aso 8 Ianuari  2013 i Mesepa, ina ua la osofaia ma lana uo o Xavier Rodriguez le fale o le alii o lo o aafia i lenei mataupu.

 

Ua maea ona faila e le malo moliaga faasaga ia Rodriguez, ma ua i ai nei lana mataupu i luma o le faamasinoga maualuga i le taimi nei.

 

Na mafai ona maua e leoleo i luga o le masini pu’eata sa i totonu o le fale gaioiga uma a le ua molia ma lana uo sa faia. O mea totino o lo o tuuaia na gaoia i le osofaiga e aofia pepa fai telefoni, o pepa sikaleti  ma le tino i tupe e $800.

 

Na saili e leoleo le fale o Iakopo ma latou maua i ai ni pepa sikaleti o lo o masalomia na ia gaoiina mai i lenei osofaiaga. Sa faapeafoi ona maua atu ai e leoleo i totonu o le potu se alii talavou e 18 tausaga le matua, o lo o ia te ia ni pepa fai telefoni ma se $40, ma ina ua fesiligia e leoleo, na taua ai e le alii lea, o pepa fai telefoni ma le tupe sa tuu atu e Iakopo ia te ia.