TAGI INA UA TAUNU’U LEOLEO E LOKA O IA

Na taua i fa’amaumauga a le fa’amasinoga le tagi o le ali’i lea na ia fasia lona to’alua a’o ona, ina ua ia vaaia le aga’i atu o leoleo e pu’e fa’apagota mai o ia, i le fale o loo latou nonofo mautotogi ai i Petesa i le fa’aiuga o le vaiaso na te’a nei.

O le mataupu lenei na tofu atu i le Ofisa o Leoleo i Tafuna, ina ua fa’afesoota’i e le Pule o le Fale Mautotogi le ofisa o leoleo mo se fesoasoani, i le mae’a lea ona sulu atu o le fafine na a’afia ma fai atu ia te ia sa fasi o ia e lona to’alua.

Na taunu’u leoleo ma latou vaaia ai le fafine na a’afia o loo nofo mai i tafatafa o le pule o le fale mautotogi lea o loo latou nonofo ai ma lona to’alua ma le la fanau.

Na fa’ailoa e le fafine na a’afia i leoleo e fa’apea, o latou ma lana fanau sa momoe i le fale ae loka le faitoto’a, ae ina ua manava mai lona to’alua, sa ia tu loa i luga ma alu e tatala le faitoto’a o le fale, peita’i o le taimi lava na matala ai le faitoto’a, sa fesili atu ai lona to’alua ia te ia pe sa la feusua’i ma se isi tamaloa fua i lona lokaina o le faitoto’a, ae sa ia tali atu i ai e leai, na mafua ona loka le faitoto’a, ona na o ia ma tamaiti o loo momoe i le fale.

Na taua e le tina na a’afia i leoleo, le fa’ateia o ia ina ua pasasa le tu’i a lona to’alua i lona gutu, atoa ai ma lona tago una’i o ia i lalo. O le avanoa sa ia maua na alu ai loa i le atoa i fafo ma le fale, ae o le taimi fo’i lea ua feala uma ai si ana fanau ma fetagisi.

Na fesili leoleo i le tina na a’afia poo fea lona to’alua, ae na tali le fafine o loo i ai o ia i totonu o le fale.

O le taimi lava na vaai mai ai le ua molia ua aga’i atu leoleo i le fale, na savali mai ai loa i fafo ma le fale ma tagi ma fa’atoese i leoleo fai mai, e fa’amagalo o ia e tusa ai o le televave o lona ita ma fasi ai lona to’alua.

I le taimi na taofia faapagota ai le ua molia, sa fa’alogoina e leoleo le malosi o le manogi pia o loo sau mai lona tino.

I luma o le fa’amasinoga fa’aitumalo, sa teena ai e le ali’i ua molia tu’uaiga o le fa’aoolima atoa ai ma le fa’atupu vevesi i totonu o lona aiga fa’asaga ia te ia, ma ua poloaina nei o ia e le fa’amasinoga e aua nei ona toe taumafai lava e fa’afefe pe toe faaoolima i lona to’alua, a’o fa’agasolo ai taualumaga o lenei mataupu.

FAUTUA LE FA’AMASINOGA I NI ALII E TAUSI LE FILEMU

O ali’i e to’alua ia na la taumafai e fa’atupu se vevesi i le fale o se isi alii o le nu’u i Leone, ua fautuaina e le fa’amasinoga i laua ina ia tausi le filemu i taimi uma, ma aua ne’i o la toe tagofia le ‘ava malosi.

O le mataupu fa’asaga ia Mikaele Aulaumea ma Manuele Aulaumea na tula’i mai i le vaveao o le aso Sa na te’a nei, ina ua logo e se tama’ita’i le ofisa o leoleo mo se fesoasoani, ina ua o atu ona uncles e to’alua ma taumafai e fasi lona tama o loo i totonu o le latou fale.

Na taua e le tama’ita’i i leoleo e fa’apea, na fa’ateia i latou ina ua aga’i atu ona uncles ia e to’alua ma fesili atu poo fea o i ai lona tama, ae ina ua fa’ailoa atu i ai o lona tama o loo i totonu o le fale, sa fa’apea loa ona laulauvavale i laua ua molia ma faia isi uiga mataga, atoa ai ma le la taumafai e faatupu se misa i le va o i laua ma le tama o le tama’ita’i na logoina leoleo.

Ua toe tatalaina nei i tua Manuele ma Mikaele e aunoa ma se tupe e totogi, i lalo o poloaiga e ao ona la usita’i i ai, e pei o le fa’asa lea ona la toe tagofia le ava malosi, pe la te toe taumafai fo’i e fa’afeso’ota’i le tagata na a’afia i lenei mataupu.